زيانى ءتيۋى مۇمكىن: ۆيتسە-مينيستر التاي اينابەكتىڭ جاڭبىر تەحنولوگياسىنا تۋرالى پىكىر ءبىلدىردى
استانا. KAZINFORM - اۋىل شارۋاشىلىعى ۆيتسە- ءمينيسترى ازات سۇلتانوۆ ۇكىمەت وتىرىسىنان كەيىن وتكەن باسپا ءسوز ءماسليحاتىندا «جاڭبىر ادام» اتانىپ كەتكەن التاي اينابەكتىڭ ارالدى جاڭبىر سۋىمەن تولتىرۋ جوباسى تۋرالى پىكىر ءبىلدىردى.
«الەۋمەتتىك جەلىدە التاي اينابەك دەيتىن ازاماتتىڭ بۇلت شاقىرۋ ارقىلى جاڭبىر جاۋعىزىپ جاتقانى تۋرالى مالىمەتتەر قىزۋ تالقىلانىپ جاتىر. ەرتەڭ وسىنداي تەحنولوگيا ارقىلى شابىندىعىن جاسىلداندىرىپ، ەگىس شىعىمىن كوبەيتۋ جوباسىنا سۋبسيديا سۇرايتىندار شىقسا، قولداۋعا دايىنسىزدار ما؟» - دەپ سۇرادى باق وكىلى.
ۆيتسە- مينيستر مۇنداي جوبامەن شەتەلدىكتەر دە جۇگىنگەنىن ەسكە سالدى.
«ءبىز زاڭدى بىرنەشە رەت زەرتتەدىك. بىزگە وسىنداي سۇراقپەن شەتەلدەن دە ماماندار كەلگەن. ماڭعىستاۋ، باتىس قازاقستان وڭىرلەرىندە 2-3 جىل بۇرىن سۋمەن پروبلەما بولعانىن بىلەتىن شىعارسىز. سول كەزدە بۇلت شاقىرىپ، جاڭبىر جاۋعىزايىق دەگەن ۇسىنىس بەرىلدى. ءبىراق بۇل ماسەلەنىڭ بىرنەشە قىرى بار. ءبىر جاعىنان ەكولوگيانىڭ ماسەلەلەرى دە بار. بۇل تابيعات قوي. ءبىر جەردە جاڭبىر جاۋعانىمەن، كەلەسى ءبىر جەرگە زيانى ءتيۋى مۇمكىن. مىنا جەردە جاڭبىر جاۋعانىمەن، باسقا جەردەن ىلعالى اۋىپ كەتۋى مۇمكىن. ونىڭ ءبارىن زەرتتەۋ قاجەت»، - دەدى ول.
ۆيتسە- مينيستر بۇل ءتاسىل ءالى جان-جاقتى زەرتتەۋدى قاجەت ەتەدى دەپ وتىر.
«ەكولوگيا مينيسترلىگىمەن بىرگە جۇمىس ىستەدىك. ءبىراق قازىرگى تاڭدا ەشقانداي عىلىمي قورىتىندى دا، ناقتى تاجىريبە دە جوق. سوندىقتان ناقتى بىردەڭە ايتۋ قيىن. ونداي جوباعا سۋبسيديا بەرۋ دەگەن بىزدە ەشقانداي زاڭعا جاتپايدى»، - دەدى ازات سۇلتانوۆ.
اۆتور
ابىلايحان جۇماشيەۆ
