زاڭسىز الىنعان 450 ميلليارد تەڭگەنىڭ اكتيۆى مەملەكەتكە ەرىكتى تۇردە قايتارىلدى

استانا. KAZINFORM - زاڭسىز الىنعان 450 ميلليارد تەڭگەنىڭ اكتيۆتى مەملەكەتكە ەرىكتى تۇردە قايتارىلدى. بۇل تۋرالى باس پروكۋراتۋرانىڭ اكتيۆتەردى قايتارۋ جونىندەگى كوميتەتى ءتوراعاسى نۇرداۋلەت سۇيىندىكوۆ ايتتى.

«كوميتەت جۇمىس ىستەپ جاتقان ادامداردىڭ كوپشىلىگى ىنتىماقتاستىق پەن ەرىكتى تۇردە (زاڭسىز الىنعان اكتيۆتەردى) قايتارۋ راسىمدەرىنە وزدەرى باستاما جاساپ جاتىر. ناتيجەسىندە بۇگىنگى كۇنگە ەلىمىزدىڭ پرەمەر- ءمينيسترى جەتەكشىلىك ەتەتىن ارناۋلى كوميسسيا جالپى سوماسى 450 ميلليارد تەڭگەگە جۋىق 40-تان استام كەلىسىم جاساۋدى ماقۇلدادى. ولار زاڭ سۋبەكتىلەرىمەن ارناۋلى مەملەكەتتىك قورعا 300 ميلليارد تەڭگەدەن استام اقشا اۋدارۋدى كوزدەيدى. ونىڭ 170 ميلليارد تەڭگەگە جۋىعى بۇگىندە قور شوتىنا ءتۇستى. جاسالعان كەلىسىمدەر بويىنشا 100 ميلليارد تەڭگەدەن استام سوماعا اكتيۆتەر مەملەكەتكە زاتتاي تۇسەدى. 82 ميلليارد تەڭگەنىڭ مۇلكى قايتارىلعان اكتيۆتەردى باسقارۋ جونىندەگى كومپانياعا بەرىلىپ تە قويدى. ونىڭ ىشىندە كاسىپورىنداردىڭ اكسيالارى مەن ۇلەستەرى، كوممەرتسيالىق جانە تۇرعىن جايلار، ەلىمىزدەگى جانە شەتەلدەگى تاڭداۋلى جىلجىمايتىن مۇلىك، سونداي-اق جەر ۋچاسكەلەرى، زەرگەرلىك بۇيىمدار، ساندىك زاتتار جانە باسقا دا قۇندى مۇلىك بار»، - دەدى كوميتەت ءتوراعاسى ورتالىق كوممۋنيكاتسيالار قىزمەتىندەگى بريفينگتە.

ونىڭ اتاپ وتۋىنشە، ولاردىڭ وتىمدىلىگى جوعارى جانە نارىقتا ۇلكەن سۇرانىسقا يە. بۇل ءوز كەزەگىندە مەملەكەتكە الىناتىن قارجىلىق پايدانى ارتتىرادى

«مىسالى، الماتىدا 176 ميلليون تەڭگەگە باعالانىپ، مەملەكەتكە قايتارىلعان جەر ۋچاسكەسى جاقىندا 657 ميلليون تەڭگەگە، ياعني 4 ەسە جوعارى باعاعا ساتىلدى. بارلىق تۇسكەن قاراجات الەۋمەتتىك جانە ەكونوميكالىق جوبالاردى قارجىلاندىرۋعا جۇمسالادى»، - دەدى نۇرداۋلەت سۇيىندىكوۆ.

اۆتور

مارلان جيەمباي