يراننىڭ بەندەر- ابباس پورتىنان بەرگەن جەر تەلىمىن قازاقستان نەگە ءالى يگەرمەي وتىر – س ءى م جاۋابى

استانا. KAZINFORM - سىرتقى ىستەر مينيسترلىگىنىڭ رەسمي وكىلى ايبەك سمادياروۆ يراننىڭ بەندەر-ابباس پورتىنان قازاقستانعا بەرىلگەن جەر تەلىمىنە نەگە ساۋدا تەرمينالى ءالى سالىنباي جاتقانىن ءتۇسىندىردى.

- يران - ءبىز ءۇشىن وتە ماڭىزدى كورشى. باعانا دا ايتتىم، قازاقستاننىڭ سىرتقى ىستەر ءمينيسترى جاقىن ارادا يران تارابىنىڭ شاقىرۋى بويىنشا رەسمي ساپارمەن بارادى. ارينە، وسى كەزدەسۋ كەزىندە ءسىز ايتقان ماسەلە دە تالقىلانادى. ءبىزدىڭ بەندەر- ابباسقا دەگەن كوزقاراسىمىز وتە جوعارى. پارسى شىعاناعىنا، افريكا ەلدەرىنە شىعاتىن ۇلكەن ءدالىزدىڭ ءبىر بولىگى دەپ ەسەپتەيمىز. ول جاقتى جاقسىلاپ، مۇقيات تەكسەرۋ كەرەك. ءبىزدىڭ كولىك سالاسىنىڭ ماماندارى جاقىندا بارىپ زەرتتەيدى، - دەدى ول.

جۋرناليست بۇل جوبا نەگە بىرنەشە جىلعا سوزىلىپ كەتكەنىن سۇرادى.

- ەندى گەوساياسي جاعدايدى ءوزىڭىز بىلەسىز عوي. ءاربىر كورشىمىز سانكسيانىڭ استىندا. بىزگە وڭاي ەمەس. سوندىقتان سىرتقى ساۋدا ماسەلەلەرى وتە كۇردەلى، - دەدى ايبەك سمادياروۆ.

ەسكە سالساق، يران يسلام رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى الي اكبار دجوۋكار اتالعان جەر تەلىمىنە قىزىعۋشىلىق تانىتىپ وتىرعان ادامدار كوپ ەكەنىن ايتقان بولاتىن.