«ورتالىق ازيا-قىتاي» فورماتىنىڭ ۇزاقمەرزىمدى دامۋ ستراتەگياسىن ازىرلەۋ قاجەت - توقايەۆ
استانا. KAZINFORM - مەملەكەت باسشىسى قاسىم-جومارت توقايەۆ «ورتالىق ازيا - قىتاي» فورماتىنىڭ 2026-2030 -جىلدارعا ارنالعان ۇزاقمەرزىمدى دامۋ ستراتەگياسىن ازىرلەۋ قاجەت دەپ سانايدى.
مەملەكەت باسشىسى «ورتالىق ازيا- قىتاي» حاتشىلىعى قىزمەتىنە قاتىستى ۇسىنىس ايتتى.
- بۇل فورماتتى دامىتۋدىڭ 2026-2030 -جىلدارعا ارنالعان ۇزاقمەرزىمدى ستراتەگياسىن ازىرلەۋ ماڭىزدى دەپ سانايمىز. حاتشىلىققا جاۋاپتى ميسسيا جۇكتەلىپ وتىر، ياعني بىرلەسكەن جوبالاردى جۇزەگە اسىرۋعا جاردەمدەسۋ، ىنتىماقتاستىقتى ارتتىرۋ جانە ساۋدا راسىمدەرىن ۇيلەستىرۋ بويىنشا ۇسىنىستار ەنگىزۋ ءىس-شارالارىنا نازار اۋدارۋى قاجەت، - دەدى قاسىم-جومارت توقايەۆ.
پرەزيدەنتتىڭ پىكىرىنشە، بۇگىنگى سامميت ەلدەرىمىزدىڭ تاتۋ كورشىلىك قاتىناستى، ءوزارا ءتيىمدى ىنتىماقتاستىقتى نىعايتۋعا جانە ورنىقتى دامۋعا مۇددەلى ەكەنىن راستادى.
مەملەكەت باسشىسى جيىن بارىسىندا ايتىلعان ۇسىنىستار ماڭگى دوستىق پەن ستراتەگيالىق سەرىكتەستىككە بەرىك نەگىز قالايتىنىنا سەنىم ءبىلدىردى.
اۆتور
رۋسلان عابباسوۆ
