ورتالىق ازيا مەن قىتاي كاسىپكەرلەرى سيفرلىق ىنتىماقتاستىق جونىندە ۋاعدالاستى
استانا. KAZINFORM - «ورتالىق ازيا - قىتاي» ىسكەرلىك كەڭەسىنىڭ وتىرىسىنا 6 مەملەكەتتىڭ ساۋدا-ونەركاسىپ پالاتالارى سيفرلىق ىنتىماقتاستىققا كوشۋ جونىندە ۋاعدالاستى.
«اتامەكەن» ۇلتتىق كاسىپكەرلەر پالاتاسىنىڭ ءتورالقا ءتوراعاسى رايىمبەك باتالوۆتىڭ ايتۋىنشا، بۇل شاراعا وزبەكستاننان، قىرعىزستاننان، تاجىكستاننان، تۇرىكمەنستاننان كاسىپكەرلەر كەلدى. قىتايدان دا ۇلتتىق كاسىپكەرلەر پالاتاسى سياقتى قۇرىلىم باستاماسىمەن 300-دەن استام كومپانيا وكىلدەرى كەلدى. ىسكەرلىك كەڭەس وتىرىسىنا دەيىن ولارمەن اۋقىمدى دايىندىق جۇمىستارى جۇرگىزىلگەن.
- بۇل جاي عانا حاتتامالىق جۇمىس ەمەس، ياعني جينالىپ، مەموراندۋمعا قول قويىپ، تاراپ كەتەتىن شارا ەمەس. ەڭ باستىسى، قازاقستاندىق جانە جالپى ورتالىق ازيالىق بيزنەس پەن قىتايلىق كومپانيالار اراسىندا الدىن الا ناقتى جۇمىس اتقارىلدى. بۇگىن تەك مەموراندۋمدار عانا ەمەس، ناقتى كەلىسىمشارتتار جاسالىپ، جوبالار قولعا الىنا باستادى. بۇل فورۋمعا ءوڭىر اكىمدەرى دە، ايماقتاردىڭ وكىلدەرى دە قاتىسىپ وتىر. قول قويىلعان كەلىسىمشارتتاردىڭ جۇزەگە اسا باستاۋى - ءبىز ءۇشىن ەڭ ماڭىزدى ناتيجە، - دەدى ر. باتالوۆ.
سونىمەن بىرگە، ءار ەلدىڭ ساۋدا-ونەركاسىپ پالاتالارىمەن سيفرلىق ىنتىماقتاستىققا كوشۋ جونىندە ۋاعدالاستىق جاسالدى. قازاقستاندا بۇل باعىتتا نە جاسالىپ جاتقانى، ۇكىمەت پەن ۇلتتىق پالاتانىڭ تاجىريبەسى تانىستىرىلعان.
- مەنىڭ ويىمشا، بۇل بيزنەسكە وتە ىڭعايلى، ولار قاي سالاعا ينۆەستيتسيا سالۋعا بولاتىنىن جانە ناقتى تالداۋلاردى كورە الادى. دەمەك، الدا بىزگە ۇلكەن ءارى جاۋاپتى جۇمىس جۇكتەلەدى. بۇل ءتاسىل بيزنەستىڭ ناقتى جوبالاردى جۇزەگە اسىرۋىنا، ىلگەرىلەتۋىنە مۇمكىندىك بەرەدى. تاعى ءبىر ماڭىزدى ماسەلە - كولىك پەن لوگيستيكا، جاسىل ءدالىز، كەدەندىك راسىمدەر مەن سەرتيفيكاتتاۋ سەكىلدى بيزنەستىڭ كۇندەلىكتى بەتپە-بەت كەلىپ وتىرعان تۇيتكىلدەرى. بۇل ماسەلەلەر تەك قىتايدان كەلەتىن يمپورتقا ەمەس، قازاقستان مەن ورتالىق ازيا ەلدەرىنىڭ قىتاي نارىعىنا شىعاتىن ەكسپورتتىق الەۋەتىن دە تەجەپ وتىر. بۇل - ۇلكەن جانە وتە ماڭىزدى ماسەلە، - دەدى رايىمبەك باتالوۆ.
ايتا كەتەيىك، بۇگىن ەلوردادا «ورتالىق ازيا - قىتاي» Ⅱ سامميتى وتەدى. وعان وڭىردەگى 5 مەملەكەتتىڭ باسشىلارى مەن قىتاي حالىق رەسپۋبليكاسىنىڭ ءتوراعاسى قاتىسادى.
اۆتور
ايجان سەرىكجان قىزى
