ورتالىق ازيا مەن قىتاي اراسىنداعى قاتىناس جان-جاقتى ستراتەگيالىق سەرىكتەستىك دەڭگەيىنە شىقتى - پرەزيدەنت
استانا. KAZINFORM - ورتالىق ازيا مەن قىتاي اراسىنداعى قاتىناس جان-جاقتى ستراتەگيالىق سەرىكتەستىك دەڭگەيىنە شىقتى. بۇل تۋرالى «ورتالىق ازيا-قىتاي» Ⅱ سامميتىندە مەملەكەت باسشىسى قاسىم-جومارت توقايەۆ ايتتى.
- وسى جەردە وتىرعان ورتالىق ازيا مەملەكەتتەرىنىڭ ءوزارا سەنىمى مەن بىرلەسكەن كۇش-جىگەرىنىڭ ارقاسىندا شىنايى تاتۋ كورشىلىك، دوستىق پەن ءوزارا قولداۋ رۋحىنداعى ىنتىماقتاستىقتىڭ تەڭدەسسىز مودەلى قالىپتاستى. وسىعان بايلانىستى ۇلى مەملەكەت قايراتكەرى، ءتوراعا شي جينپيڭ باسشىلىق جاسايتىن قىتايدىڭ بەلسەندى ءارى پايدالى رولىن اتاپ ءوتۋ ادىلەتتى بولار ەدى. قازاقستان كورشىلەس قىتاي اتىنان ماڭگى ءارى سەنىمدى ستراتەگيالىق سەرىكتەس پەن ناعىز دوس تاپتى، - دەدى مەملەكەت باسشىسى.
پرەزيدەنت 80 ميلليون تۇرعىنى بار اۋقىمدى نارىققا جانە مول تابيعي رەسۋرستارعا باي ورتالىق ازيا ءوڭىرى حالىقارالىق قارىم-قاتىناس پەن ساۋدا-ەكونوميكالىق، ينۆەستيتسيالىق جانە گۋمانيتارلىق ىنتىماقتاستىقتىڭ ماڭىزدى سۋبەكتىسى رەتىندە ۇستانىمىن كەزەڭ-كەزەڭىمەن نىعايتىپ كەلە جاتقانىن ايتتى.
- ورتالىق ازيا مەن قىتاي اراسىنداعى قارىم-قاتىناس ماڭگىلىك، اۋا رايىن تالعامايتىن، جان-جاقتى قامتىلعان ستراتەگيالىق سەرىكتەستىك دەڭگەيىنە شىققانىن زور ريزاشىلىقپەن اتاپ وتكىم كەلەدى، - دەدى قاسىم-جومارت توقايەۆ.
- «ورتالىق ازيا-قىتاي» فورماتى ءبىزدى جىبەك جىپپەن جالعاپ، تاريحي تاعدىرى ورتاق قوعامداستىق قۇرۋدىڭ جاڭا كوكجيەگىن ايقىنداپ بەردى. ءبىز ساۋدا-ساتتىقتا، ونەركاسىپتە، كولىك پەن لوگيستيكادا، اۋىل شارۋاشىلىعىندا، سيفرلاندىرۋدا، سونىمەن قاتار ەكونوميكانىڭ باسقا دا سالالارىندا ىنتىماقتاستىق تەتىكتەرىن ىسكە قوسا الدىق. شيان قالاسىندا ورتالىق ازيا مەن قىتاي حاتشىلىعىن قۇردىق. قازىرگى ۋاقىتتا ءبىز گەوگرافيانى، ءوزارا ينۆەستيتسيا مەن ينفراقۇرىلىمدىق جوبالاردى كەڭەيتۋ ءۇشىن بەلسەندى جۇمىس ىستەپ جاتىرمىز، - دەدى پرەزيدەنت.
مەملەكەت باسشىسى كۇنى كەشە قازاقستان مەن قىتاي اراسىندا ينۆەستيتسيالىق كەلىسىمگە قول قويىلعانىن، ول جوعارىدا اتالعان باسىم باعىتتارمەن ۇيلەسەتىنىن ايتتى.
- قولدا بار مۇمكىندىكتەر سينەرگياسى ءوڭىر مەملەكەتتەرىنىڭ قىتاي حالىق رەسپۋبليكاسىمەن ودان ءارى سەرپىندى جانە ءوزارا ءتيىمدى ىنتىماقتاستىعى ءۇشىن قۋاتتى نەگىز قالايتىنىنا سەنىمدىمىن. بۇل ءۇشىن بارلىق قاجەتتى شارت بار، - دەدى قاسىم-جومارت توقايەۆ.
اۆتور
مارلان جيەمباي
