وقۋ-اعارتۋ مينيسترلىگى جەكەمەنشىك مەكتەپتەردىڭ جاعدايىنا قاتىستى تۇسىنىك بەردى
استانا. KAZINFORM - ق ر وقۋ-اعارتۋ مينيسترلىگى جەكەمەنشىك مەكتەپتەرگە قاتىستى قانداي وزگەرىستەر ەنگىزىلىپ جاتقانىن ءتۇسىندىردى.
- قازىرگى كەزدە مەملەكەت باسشىسى قويعان ءبىلىم بەرۋ سالاسىن مەملەكەتتىك قارجىلاندىرۋ تەتىگىن رەفورمالاۋ جانە قارجىلاندىرۋدىڭ ناقتى كريتەريلەرىن ازىرلەۋ جونىندەگى تاپسىرمانى ەسكەرە وتىرىپ، ق ر وقۋ-اعارتۋ مينيسترلىگى جەكەمەنشىك مەكتەپتەردى مەملەكەتتىك قارجىلاندىرۋ جۇيەسىن جەتىلدىرۋ بويىنشا جۇيەلى جۇمىس باستادى، - دەلىنگەن ۆەدومستۆونىڭ Kazinform اگەنتتىگىنە بەرگەن جاۋابىندا.
مينيسترلىك جەكەمەنشىك مەكتەپتەردە مەملەكەتتىك تاپسىرىستى قارجىلاندىرۋ تەتىگىن قايتا قاراۋدىڭ مىناداي نەگىزگى تاسىلدەرىن ازىرلەدى:
جاڭادان اشىلاتىن جەكەمەنشىك مەكتەپتەردە مەملەكەتتىك تاپسىرىستى ورنالاستىرۋعا موراتوري ەنگىزۋ؛
كريتەريلەرگە سايكەس وڭىرلەردىڭ وقۋشى ورىندارىنا دەگەن قاجەتتىلىگىن جاباتىن باسىم جەكەمەنشىك مەكتەپتەرگە عانا مەملەكەتتىك قارجىلاندىرۋدى قامتاماسىز ەتۋ، ياعني مەملەكەتتىك مەكتەپتەردىڭ بولماۋى، ءۇش اۋىسىمدى وقىتۋدى جويۋ جانە اپاتتى مەكتەپتەردىڭ ورنىنا جاڭا ءبىلىم بەرۋ نىساندارىنىڭ سالىنۋى نەگىزگى باسىمدىق رەتىندە ايقىندالىپ وتىر؛
جەكەمەنشىك مەكتەپتەردىڭ بەلگىلەنگەن ستاندارتتارعا سايكەستىگىنە ليتسەنزيادان كەيىنگى باقىلاۋدى جۇرگىزىلەدى. بۇل تۇرعىدا ءبىلىم بەرۋ ساپاسىن قامتاماسىز ەتۋ، پەداگوگيكالىق كادرلارمەن جاساقتاۋ، بالالاردىڭ قاۋىپسىزدىگىن قامتاماسىز ەتۋ باعىتتارىنا ەرەكشە ءمان بەرىلەدى.
- مينيسترلىك بالالاردىڭ قاۋىپسىز، ساپالى جانە زاڭعا سايكەس جۇمىس ىستەيتىن مەكتەپتەردە ءبىلىم الۋ قۇقىعىن قورعايدى. ماقسات - جەكەمەنشىك مەكتەپ جۇمىسىن توقتاتۋ نەمەسە جابۋ ەمەس، كەرىسىنشە مەحانيزمدى جەتىلدىرۋ، تەك ناقتى قاجەتتىلىكتى جاباتىن مەكتەپتەرگە مەملەكەتتىك تاپسىرىس بەرۋ. جاڭادان اشىلعان جەكەمەنشىك مەكتەپتەرگە مەملەكەتتىك تاپسىرىس بەرۋگە موراتوري جاريالانادى. تاپسىرىستى الاتىن مەكتەپتەر ءۇش كريتەريگە سايكەس انىقتالادى: مەملەكەتتىك مەكتەپتەر بولماعان جەرلەردە، ءۇش اۋىسىمدىق مەكتەپتەردى جويۋ ماقساتىندا، سونداي-اق اپاتتىق جاعدايداعى مەكتەپ ورنىن اۋىستىرۋ ءۇشىن. جەكەمەنشىك مەكتەپتەردىڭ جۇمىسىن رەتتەۋ بويىنشا شارالار جەرگىلىكتى اتقارۋشى ورگاندارمەن بىرلەسە پىسىقتالىپ جاتىر، - دەپ اتالىپ وتكەن وقۋ-اعارتۋ مينيسترلىگىنىڭ مالىمەتىندە.
ەسكە سالساق، جىل باسىندا «Turkistan» گازەتىنە بەرگەن سۇحباتىندا مەملەكەت باسشىسى قاسىم-جومارت توقايەۆ جەكەمەنشىك مەكتەپتەردى مەملەكەتتەن قارجىلاندىرۋ جۇيەسىن رەفورمالاۋ كەرەك ەكەنىن ايتتى.
