پوليپروپيلەن ءوندىرىسى: قازاقستاننىڭ يندۋستريالىق دامۋىنىڭ جاڭا كەزەڭى
استانا. KAZINFORM - بۇرىن قازاقستان پوليپروپيلەندى نەگىزىنەن سىرتتان ساتىپ الاتىن. ونى وتاندىق وندىرىستە وندىرۋگە مۇمكىندىك بولعانىمەن، قوسىلعان قۇن تىزبەگىن قالىپتاستىرۋعا ناقتى قادام جاسالماعان ەدى.
الايدا 2022 -جىلدىڭ سوڭىندا ىسكە قوسىلعان KPI (Kazakhstan Petrochemical Industries Inc.) زاۋىتى بۇل جاعدايدى وزگەرتە باستادى.
پوليپروپيلەن - ستراتەگيالىق ماڭىزدى شيكىزات ءتۇرى بولماسا دا، قازىرگى زامانعى ونەركاسىپ ساياساتىنىڭ كەمەلدەنۋىن ناقتى كورسەتەتىن ماتەريالداردىڭ ءبىرى. مۇناي، گاز نەمەسە مەتالل سەكىلدى باستاپقى شيكىزات قاتارىنا جاتپايتىنىنا قاراماستان، ءدال وسىنداي ارالىق ونىمدەر قازىرگى يندۋستريادا قوسىلعان قۇن تىزبەگىنىڭ نەگىزىنە اينالىپ وتىر. بىرەگەي قاسيەتتەرىنىڭ ۇيلەسىمى ارقاسىندا قۇرىلىس پەن ماشينا قۇراستىرۋدان باستاپ، تاماق ونەركاسىبى مەن مەديتسيناعا دەيىنگى ءارتۇرلى سالالاردا قولدانىلادى.
سوڭعى جىلدارى ورتا ازيا ەلدەرى، سونىڭ ىشىندە قازاقستان دا، شيكىزات ەكسپورتىنا تاۋەلدىلىكتەن وڭدەۋ سەكتورىنا بىرتىندەپ كوشۋدى باستادى. بۇل ءۇردىستىڭ ايقىن كورىنىسى - پوليپروپيلەن ءوندىرىسى.
بۇرىن قازاقستان پوليپروپيلەندى نەگىزىنەن سىرتتان ساتىپ الاتىن. ونى وتاندىق وندىرىستە وندىرۋگە مۇمكىندىك بولعانىمەن، قوسىلعان قۇن تىزبەگىن قالىپتاستىرۋعا ناقتى قادام جاسالماعان ەدى. الايدا 2022 -جىلدىڭ سوڭىندا ىسكە قوسىلعان KPI (Kazakhstan Petrochemical Industries Inc.) زاۋىتى بۇل جاعدايدى وزگەرتە باستادى. بۇل جوبا كولەمى مەن تەحنولوگيالىق ارحيتەكتۋراسى جاعىنان عانا ەمەس، حالىقارالىق سەرىكتەستىكتەردىڭ قاتىسۋىمەن دە ەرەكشەلەنەدى: قۇرىلىسقا قىتايلىق مەردىگەرلەر تارتىلدى، ال رەسەيلىك سيبۋر ىسكە قوسۋ مەن تەحنولوگيالىق سۇيەمەلدەۋ كەزەڭىندە قولداۋ كورسەتتى. مۇنداي ارىپتەستىك جوبانىڭ تۇراقتى جۇمىس ىستەۋىنە نەگىز بولدى جانە ءوندىرىس ستاندارتتارىن بەكىتتى.
ەڭ قىزىعى - KPI تەك ءونىم ءوندىرىپ قانا قويماي، وتاندىق نارىقتى ءوز اينالاسىنا شوعىرلاندىرىپ جاتىر. 2025 -جىلدىڭ العاشقى جارتىجىلدىعىنىڭ قورىتىندىسى بويىنشا، كومپانيا ىشكى نارىقتىڭ %70- دان استامىن قامتاماسىز ەتىپ وتىر (بىلتىر - %57). بۇل ءوسىم تەك يمپورتتىڭ ازايۋىمەن ەمەس، سونىمەن قاتار وتاندىق قايتا وڭدەۋ كاسىپورىندارىنىڭ كوبەيۋىمەن جانە جۇمىس ىستەپ تۇرعان وندىرىستەردىڭ جۇكتەمەسىنىڭ ارتۋىمەن دە بايلانىستى. 2025 -جىلدىڭ قاڭتار-مامىر ايلارىندا زاۋىت 175 مىڭ توننا پوليپروپيلەن ءوندىردى، ال ەل ىشىندەگى قايتا وڭدەۋ كولەمى %28- عا ءوستى.
بۇل رەسمي باعدارلامانىڭ شەڭبەرىندە جۇرگىزىلىپ جاتقان يندۋستريالاندىرۋ ەمەس. بۇل - نارىقتىڭ تۇراقتى شيكىزات كوزىنە تاۋەلدىلىك ارقىلى تابيعي تۇردە دامۋى. KPI تۇتىنۋشىلاردى تەحنولوگيالىق تۇرعىدان سۇيەمەلدەپ، جاڭا كاسىپورىندار ءۇشىن ارنايى كوممەرتسيالىق ۇسىنىستار ۇسىنىپ، 12 ءتۇرلى پوليپروپيلەن ماركاسىن شىعارىپ وتىر. سونىمەن قاتار جاڭادان اشىلعان كومپانيالارمەن تىعىز جۇمىس ىستەيدى. وسى ساياسات اياسىندا 2025 -جىلى Central Asia PlastWorld كورمەسىندە الماتىداعى TI كومپانياسىمەن جاسالعان كەلىسىم - جاي عانا كوممەرتسيالىق مامىلە ەمەس، شاعىن جانە ورتا بيزنەسكە باعىتتالعان تۇراقتى تۇتىنۋشىلار بازاسىن قالىپتاستىرۋداعى ماڭىزدى قادام.
ەكسپورت ازىرگە باستى باعىت ەمەس. تۇركيا، قىتاي، رەسەي جانە ەۋروپاعا جەتكىزىلىمدەر تۋرالى ايتىلعانىمەن، ەگجەي- تەگجەيلى اقپارات بەرىلگەن جوق. ازىرشە ىشكى نارىققا باسىمدىق بەرىلىپ وتىر. بۇل - پراگماتيكالىق شەشىم: لوگيستيكالىق قيىندىقتار بار، ال ەل ىشىندەگى سۇرانىس ءالى قالىپتاسۋ ۇستىندە. وسىنداي جاعدايدا KPI تەك ءوندىرۋشى ءرولىن عانا ەمەس، قايتا وڭدەۋشىلەر ءۇشىن سەرىكتەس، كەڭەسشى ءرولىن دە اتقارىپ وتىر - تەحنولوگيانى يگەرۋگە، لوگيستيكاعا، وقىتۋعا كومەكتەسەدى. مۇنداي قولداۋ رەسمي قۇجاتتاردا جازىلا بەرمەسە دە، قالىپتاسىپ جاتقان ونەركاسىپتىك ينفراقۇرىلىم ءۇشىن وتە ماڭىزدى.
الداعى كەزەڭدە پوليپروپيلەن كلاستەرىنىڭ تۇراقتى دامۋى كولىك، قويمالىق ينفراقۇرىلىم، جابدىقتارعا قولجەتىمدىلىك جانە ماماندار دايارلاۋ سىندى ىلەسپە سالالاردىڭ دامۋ قارقىنىنا بايلانىستى بولادى. بۇگىندە KPI وسى ۇدەرىستىڭ قارقىنىن بەلگىلەپ وتىر. ەندى بۇل قارقىننىڭ قانشالىقتى ۇزاق ءارى تۇراقتى بولاتىنىن ۋاقىت كورسەتەدى.
