ولجاس بەكتەنوۆ ىشكى ىستەر مينيسترلىگىنىڭ باسقارۋ اكادەمياسىنىڭ اشىلۋىنا قاتىستى
استانا. KAZINFORM - پرەزيدەنت قاسىم-جومارت توقايەۆتىڭ تاپسىرماسى بويىنشا جاريالانعان «زاڭ جانە ءتارتىپ» اپتالىعى اياسىندا استانادا ق ر ءى ءى م باسقارۋ اكادەمياسىنىڭ اشىلۋى ءوتتى، دەپ حابارلايدى ۇكىمەتتىڭ باسپا ءسوز قىزمەتى.
پرەمەر-مينيستر ولجاس بەكتەنوۆ قۇتتىقتاۋ سوزىندە جاڭا وقۋ ورنى پرەزيدەنتتىڭ قوعامدىق قاۋىپسىزدىكتى نىعايتۋ، مەملەكەتتىك باسقارۋدىڭ تيىمدىلىگىن ارتتىرۋ جانە كادرلىق الەۋەتتى جاڭعىرتۋ جونىندەگى جۇيەلى ساياساتىنىڭ اياسىندا جۇزەگە اسىرىلىپ وتىرعان اسا قادام ەكەنىن اتاپ ءوتتى. سوڭعى جىلدارى اعىمداعى سىن-قاتەرلەرگە قارسى كۇرەستى كۇشەيتۋ باعىتىندا ناقتى شارالار قابىلداندى. اتاپ ايتقاندا، ەسىرتكى قىلمىسىنا قارسى ءىس-قيمىل كوميتەتى قۇرىلدى، كيبەرقاۋىپتەرگە جانە تۇرمىستىق زورلىق-زومبىلىققا قارسى ءىس-قيمىل بويىنشا مامانداندىرىلعان بولىمشەلەر اشىلدى، سيفرلى ينفراقۇرىلىم مەن تالدامالىق بازا نىعايتىلىپ جاتىر.
- اكادەميانىڭ قۇرىلۋى - مەملەكەت باسشىسى جاريالاعان قۇقىق قورعاۋ جۇيەسىنىڭ دامۋ جولىنداعى ەلەۋلى كەزەڭ. ءبىزدىڭ مىندەتىمىز - كادرلىق الەۋەتتى نىعايتۋ ارقىلى قۇقىقتىق ءتارتىپتى قامتاماسىز ەتۋدىڭ جاڭا مودەلىن ەنگىزۋ. ينستيتۋتسيونالدىق رەفورمالار قۇقىق قورعاۋ ورگاندارىنىڭ سەرۆيستىك مودەلىن دامىتۋعا ىقپالىن تيگىزەدى. پرەزيدەنت ۇسىنعان باسىم باعىت - ازاماتتاردىڭ قاۋىپسىزدىگى جانە «زاڭ جانە ءتارتىپ» قاعيداتىن قامتاماسىز ەتۋ، - دەپ اتاپ ءوتتى ولجاس بەكتەنوۆ.
پرەزيدەنتتىڭ تاپسىرماسى بويىنشا ىسكە قوسىلعان قۇقىق قورعاۋ ورگاندارىن قايتا جاڭعىرتۋ - ستراتەگيالىق ويلاي الاتىن باسقارۋشىلار بۋىنىن قالىپتاستىرۋعا مۇمكىندىك بەرەدى. سونداي-اق تەحنولوگيالىق نوۆاتسيالاردى ەنگىزۋ قۇرالدارىن كەڭەيتىپ، جاھاندىق سيفرلاندىرۋ جانە جاساندى ينتەللەكتىنى جاپپاي ەنگىزۋ جاعدايىندا كوشباسشىلىق پەن باسەكەگە قابىلەتتى جۇمىستىڭ زاماناۋي تاسىلدەرىن مەڭگەرۋگە جول اشادى.
اكادەميانىڭ اشىلۋى بارىسىندا ولجاس بەكتەنوۆ سونىمەن قاتار وقۋ ورنى ينفراقۇرىلىمىمەن، جانە قۇقىق قورعاۋ ورگاندارى قولداناتىن زاماناۋي تەحنولوگيالارمەن، اتاپ ايتقاندا سيفرلى زەرتحانا، سيفرلى شەشىمدەر اۋديتورياسى، جول قاۋىپسىزدىگىن قامتاماسىز ەتۋدە جاساندى ينتەللەكتى كومەگىمەن تالداۋ، كىرىكتىرىلگەن رادار ورناتىلعان پاترۋلدىك اۆتوموبيلدەردى قاشىقتان باقىلاۋ پلاتفورماسى، روبوتتاندىرىلعان تەحنيكا، «اقىلدى كوزىلدىرىك» جانە باسقا دا وزىق تەحنولوگيالارمەن تانىستى.
ىشكى ىستەر ءمينيسترى ەرجان سادەنوۆ پرەمەر-مينيسترگە ۆەدومستۆوارالىق جوعارى اكادەميالىق كۋرس تىڭداۋشىلارىن سىناقتان وتكىزۋ ناتيجەلەرىن كورسەتتى. اكادەميا باعدارلاماسى باسقارۋ قۇزىرەتتىلىگىنى دامىتۋعا، زاماناۋي تاسىلدەردى مەڭگەرۋگە باعىتتالعان. جىل سايىن مۇندا باسشىلىق قۇرامدى دايارلاۋ باعىتتارى بويىنشا 100-دەن استام ادام، سونداي-اق ماگيستراتۋرا جانە دوكتورانتۋرا باعدارلامالارى بويىنشا 30 ادام ءبىلىم الادى.
بۇگىندە اكادەميا ىشكى ىستەر ورگاندارىنىڭ اۋماقتىق بولىمشەلەرىنەن تىڭداۋشىلاردىڭ العاشقى لەگىن دايىنداۋدى باستادى. ءى ءى م باسقارۋ اكادەمياسىنىڭ اشىلۋىنا باس پروكۋراتۋرا، ۇلتتىق قاۋىپسىزدىك كوميتەتى، جوعارعى سوت كەڭەسى، مينيسترلىكتەر، اكىمدىكتەر باسشىلىعى، پارلامەنت دەپۋتاتتارى، ءى ءى م قوعامدىق كەڭەسىنىڭ مۇشەلەرى، ءى ءى م جۇيەسىندەگى جوو باسشىلىعى مەن وقىتۋشىلارى، سالالىق ۆەدومستۆولاردىڭ شەتەلدىك دەلەگاتسيالارى، حالىقارالىق ۇيىمداردىڭ، عىلىمي جانە ساراپتامالىق قوعامداستىقتىڭ، سونداي- اق جەكە سەكتور وكىلدەرى قاتىستى.
بۇدان بۇرىن پرەمەر-مينيستر ولجاس بەكتەنوۆ سەنات دەپۋتاتتارىنىڭ جاستار اراسىندا ءتارتىپ پەن جاۋاپكەرشىلىكتى ارتتىراتىن جاڭا باعدارلاما ازىرلەۋ ۇسىنىسىنا جاۋاپ بەردى.
