ولجاس بەكتەنوۆ پەن بولگاريا پرەزيدەنتى ساۋدا-ەكونوميكالىق ىنتىماقتاستىق ماسەلەلەرىن تالقىلادى
استانا. KAZINFORM - قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆ پەن ەلىمىزگە العاشقى رەسمي ساپارمەن كەلگەن بولگاريا پرەزيدەنتى رۋمەن راديەۆ ەكى مەملەكەت باسشىلارىنىڭ كەلىسسوزدەرى بارىسىندا قول جەتكىزىلگەن ۋاعدالاستىقتاردى ىسكە اسىرۋ ماسەلەلەرىن تالقىلادى.
بۇل تۋرالى ۇكىمەتتىڭ باسپا ءسوز قىزمەتى حابارلادى.
ولجاس بەكتەنوۆ قازاقستان ۇكىمەتى جوعارى دەڭگەيدە قول جەتكىزىلگەن كەلىسىمدەردى تولىق ىسكە اسىرۋعا نيەتتى ەكەنىن اتاپ ءوتتى.
جيىندا ساۋدا- ەكونوميكالىق، ينۆەستيتسيالىق جانە كولىك- لوگيستيكالىق سالالارداعى ىنتىماقتاستىققا نازار اۋدارىلدى.
اتاپ ايتقاندا، قازاقستاندىق ورگانيكالىق اۋىل شارۋاشىلىعى ونىمدەرىنىڭ ءوزارا ساۋداسىن كەڭەيتۋ، ونى قايتا وڭدەۋ جانە ەكسپورتتاۋ، حيميا، قوسىلعان قۇنى جوعارى تاۋارلار بويىنشا بىرلەسكەن كاسىپورىندار قۇرۋ مۇمكىندىكتەرى قارالدى.
ىنتىماقتاستىقتى ودان ءارى ارتتىرۋدىڭ نەگىزگى پلاتفورمالارىنىڭ ءبىرى رەتىندە ترانسكاسپي حالىقارالىق كولىك باعىتى - «ورتا ءدالىزدى» دامىتۋ ماسەلەسى اتاپ ءوتىلدى.
سونىمەن قاتار ەكى ەلدىڭ بيزنەس- توپتارىنىڭ اقپاراتتىق تەحنولوگيالار، فارماتسيەۆتيكا، تۋريزم، سونداي-اق جالپى تاجىريبە الماسۋ سالاسىنداعى ينۆەستيتسيالىق ءوزارا ءىس-قيمىلىن دامىتۋ پەرسپەكتيۆالارى تالقىلاندى.
بولگاريا قازاقستاننىڭ ەۋروپالىق وداقتاعى ەڭ ءىرى 15 ساۋدا سەرىكتەسىنىڭ قاتارىنا كىرەدى. 2024 -جىلى ەكىجاقتى تاۋار اينالىمى $375 ميلليونعا دەيىن ارتتى. قازىرگى ۋاقىتتا جاڭا جۇمىس ورىندارىن اشۋ ارقىلى جالپى قۇنى $117 ميلليوننان اساتىن بىرلەسكەن جوبالار پىسىقتالىپ جاتىر.
ايتا كەتەلىك مەملەكەت باسشىسى «قازاقستان - بولگاريا» بيزنەس-فورۋمىنا قاتىستى.
اۆتور
نازىم بولەسوۆا
