ولجاس بەكتەنوۆ امەريكالىق ءىرى تەحنولوگيالىق كومپانيا باسشىسىمەن كەزدەستى

استانا. KAZINFORM - قازاقستان پرەمەر-ءمينيسترى ولجاس بەكتەنوۆ امەريكالىق ءىرى تەحنولوگيالىق كومپانيالاردىڭ ءبىرى EPAM Systems ديرەكتورلار كەڭەسىنىڭ ءتوراعاسى، باس ديرەكتورى ءارى پرەزيدەنتى اركاديي دوبكينمەن سيفرلاندىرۋ، IT- ءبىلىم بەرۋ جانە قازاقستاننىڭ تەحنولوگيالىق ەكوجۇيەسىن دامىتۋ سالاسىنداعى ىنتىماقتاستىق ماسەلەلەرىن تالقىلادى.

بۇل تۋرالى ۇكىمەتتىڭ باسپا ءسوز قىزمەتى ءمالىم ەتتى.

اڭگىمەلەسۋ بارىسىندا الەمدىك تەحنولوگيالار نارىعىن دامىتۋدىڭ زاماناۋي ترەندتەرى جانە جاڭا بىرلەسكەن بيزنەس- شەشىمدەردى، زەرتتەۋ باستامالاردى، ونىڭ ىشىندە ۇلتتىق جاساندى ينتەللەكت ورتالىعىندا جاساندى ينتەللەكت زەرتحاناسىن اشۋ شەڭبەرىندە ازىرلەۋ پەرسپەكتيۆاسى قاراستىرىلدى.

EPAM Systems - باعدارلامالىق قامتاماسىز ەتۋدى ازىرلەۋ جانە كونسالتينگ سالاسىنداعى الەمدىك كوشباسشى. بۇگىنگى تاڭدا EPAM كومپانياسى قازاقستاننىڭ 17-دەن استام قالاسىندا تانىستىرىلعان جانە 1000-عا جۋىق قىزمەتكەرى بار، 2024 -جىلى Astana Hub-قا قاتىسۋ شەڭبەرىندە $40 ميلليون استام سوماعا قىزمەتتەر ەكسپورتتالدى.

تاراپتار IT- ءبىلىم بەرۋدى دامىتۋ باعىتىندا 5000-نان استام ماماندى وقىتقان EPAM Kazakhstan وقۋ ورتالىعىنىڭ ماڭىزىن اتاپ ءوتتى. Tech Orda باعدارلاماسى ارقىلى كومپانيا 700-دەن استام ستۋدەنتكە Java, Python جانە Data Engineering سياقتى نەگىزگى باعىتتار بويىنشا IT داعدىلارىن ۇيرەتتى. بيىل وقۋ ءۇشىن تاعى 300 ستۋدەنت تاڭدالدى.

«پرەزيدەنت قاسىم- جومارت توقايەۆ ستراتەگيالىق مىندەت قويدى. قازاقستان جاپپاي سيفرلاندىرۋ جانە جاساندى ينتەللەكتىنى جەدەل دامىتۋ اۋماعىنا اينالۋعا ءتيىس. ءبىز وسى باعىتتا جۇمىس جۇرگىزىپ جاتىرمىز. 5 جىل ىشىندە IT- قىزمەتتەر ەكسپورتىنىڭ كولەمى $30 ميلليون- نان $600 ميلليون- عا دەيىن ءوستى. دەگەنمەن، بۇل جەتكىلىكسىز، بىزدە ۇلكەن الەۋەت بار. قازاقستاندىق ماماندار دارىندى ءارى باسەكەگە قابىلەتتى. الەمدىك الپاۋىتتارمەن ىنتىماقتاستىق بىزگە تيىمدىلىكتى ارتتىرۋعا جانە وزىق قارقىنمەن دامۋدى قامتاماسىز ەتۋگە مۇمكىندىك بەرەدى»، - دەپ اتاپ ءوتتى ولجاس بەكتەنوۆ.

ءوز كەزەگىندە اركادي دوبكين قازاقستانداعى قولايلى ينۆەستيتسيالىق احۋالدى اتاپ ءوتىپ، سيفرلاندىرۋ جانە ەكونوميكانىڭ ناقتى سەكتورلارىنا جاڭا تەحنولوگيالاردى ەنگىزۋ سالاسىنداعى ودان ءارى ىنتىماقتاستىق ءۇشىن ءبىرقاتار ۇسىنىستاردى ايتتى.

كەزدەسۋ قورىتىندىسى بويىنشا سيفرلىق دامۋ، يننوۆاتسيالار جانە ايەروعارىش ونەركاسىبى مينيسترىنە قاجەتتى كومەكتى قامتاماسىز ەتە وتىرىپ، جوبالاردى سۇيەمەلدەۋدى كۇشەيتۋ تاپسىرىلدى.

اۆتور

باقىتگۇل اباي قىزى