تۇتىنۋشىلىق بەلسەندىلىكتىڭ ارتۋىن اۆتوكولىكتەرگە قىزىعۋشىلىقتىڭ قايتا جاندانۋى راستايدى - ۇ ب
استانا. KAZINFORM - وندىرىستىك مۇمكىندىكتەر سۇرانىس وسىمىنە ىلەسە الماي وتىر. بۇل تۋرالى ۇلتتىق بانك ءتوراعاسى تيمۋر سۇلەيمەنوۆ ايتتى.
- تۇتىنۋشىلىق بەلسەندىلىك ارتىپ كەلەدى. الدىڭعى ايلاردا ءبىراز تۇراقتى بولعاننان كەيىن ءساۋىر ايىندا قايتا كوتەرىلگەنى دە بايقالادى. سۇرانىستىڭ وسۋىنە تۇتىنۋشىلىق كرەديتتەۋدىڭ بەلسەندى ورىندالۋى مەن ناقتى كىرىستەردىڭ قالىپتى ءوسۋى سەبەپ بولدى. تۇتىنۋدىڭ جوعارى دەڭگەيى، اسىرەسە، ازىق-تۇلىككە جاتپايتىن تاۋارلار سەگمەنتىندە تولەم كارتالارى بويىنشا اينالىمنىڭ ۇلعايۋىمەن جانە بولشەك ساۋداداعى تاۋار اينالىمىنىڭ جاندانۋىمەن راستالدى، - دەدى تيمۋر سۇلەيمەنوۆ.
ونىڭ اتاپ وتۋىنشە، تۇتىنۋشىلىق بەلسەندىلىكتىڭ ارتۋىن راستايتىن قوسىمشا فاكتور - ءىرى ساتىپ الۋلارعا، اسىرەسە اۆتوكولىكتەرگە دەگەن قىزىعۋشىلىقتىڭ قايتا جاندانۋى.
- ينۆەستيتسيالىق بەلسەندىلىك تە جوعارى بولىپ، قاڭتار- ءساۋىر ايلارىندا 13,7 پايىزعا ءوستى. وعان ينفراقۇرىلىمدىق جوبالاردى ىسكە اسىرۋعا باعىتتالعان مەملەكەتتىك ينۆەستيتسيالار، اسىرەسە، ۇلتتىق قوردان بولىنەتىن ترانسفەرتتەر ەداۋىر ۇلەس قوستى. ءبىز ەكونوميكالىق بەلسەندىلىكتىڭ ونىمدىلىكتىڭ ارتۋىمەن نىعايعانىن قۇپتايمىز. الايدا وندىرىستىك مۇمكىندىكتەر سۇرانىس وسىمىنە ىلەسە الماي وتىر، - دەدى ۇ ب باسشىسى.
بۇعان دەيىن تيمۋر سۇلەيمەنوۆ كريپتوۆاليۋتاعا ينۆەستيتسيا سالۋعا قاتىستى پىكىر بىلدىرگەن ەدى.
اۆتور
مارلان جيەمباي
