تۋريزمدەگى تۇيتكىل: ءبىرقاتار لاۋازىمدى تۇلعا جاۋاپكەرشىلىككە تارتىلدى
استانا. KAZINFORM - مەملەكەت باسشىسى ۇكىمەتكە تەز ارادا ەلدەگى بارلىق تۋريستىك باعىتتىڭ جاعدايىن رەتتەپ، ولقىلىق جىبەرگەن جاۋاپتىلاردى جازالاۋدى تاپسىرعان ەدى. كۋرورتتىق ايماقتاردى ينسپەكسيالاۋ جۇمىسى ناتيجەسىندە شارالار قابىلدانىپ، ءبىرقاتار لاۋازىمدى تۇلعالار جاۋاپكەرشىلىككە تارتىلدى.
بۇل تۋرالى ۇكىمەتتىڭ باسپا ءسوز قىزمەتى ءمالىم ەتتى.
مەملەكەت باسشىسىنىڭ تۋريستىك سالا ماسەلەلەرى جونىندەگى تاپسىرماسىنا سايكەس پرەمەر-ءمينيستردىڭ ورىنباسارى ەرمەك كوشەربايەۆتىڭ باسشىلىعىمەن ۆەدومستۆوارالىق جۇمىس توبى قۇرىلدى.
ونىڭ قۇرامىنا تۋريزم جانە سپورت، كولىك، ىشكى ىستەر، ەكولوگيا جانە تابيعي رەسۋرستار، سۋ رەسۋرستارى جانە يرريگاتسيا، دەنساۋلىق ساقتاۋ مينيسترلىكتەرىنىڭ جانە باسقا دا ۋاكىلەتتى مەملەكەتتىك ورگانداردىڭ باسشىلارى كىردى.
10-12- شىلدەدە الماتى، قاراعاندى، جەتىسۋ جانە اباي وبلىستارىنا ينسپەكسيالىق ساپار بارىسىندا ءبىرقاتار جۇيەلى زاڭ بۇزۋشىلىقتار انىقتالدى.
جۇمىس توبىنىڭ مۇشەلەرى تۋريستەرمەن كەزدەسۋلەر وتكىزىپ، قاپشاعاي سۋ قويماسىنداعى، الاكول جانە بالقاش كولدەرىندەگى ينفراقۇرىلىممەن تانىستى. ازاماتتاردىڭ تۋريستىك ينفراقۇرىلىمنىڭ جاي-كۇيىنە، سەرۆيستىڭ جەتكىلىكسىز دەڭگەيىنە جانە قاجەتتى قاۋىپسىزدىك شارالارىنىڭ بولماۋىنا قاتىستى حابارلامالارى راستالدى.
اسىرەسە، جەرگىلىكتى اتقارۋشى ورگاندار باسقاراتىن كوممۋنالدىق جاعاجايلاردىڭ جاعدايى ەرەكشە الاڭداۋشىلىق تۋعىزدى. وندا اباتتاندىرۋ نورمالارىن بۇزۋ، چەك بەرمەي جۇمىس ىستەيتىن بيزنەس سۋبەكتىلەرىندە كاسسالىق ءتارتىپتىڭ بولماۋى، سونداي-اق سانيتاريالىق تالاپتار مەن قاۋىپسىزدىك نورمالارىن ەلەمەۋ فاكتىلەرى تىركەلدى.
ينسپەكتسيا قورىتىندىسى بويىنشا جانە پرەزيدەنتتىڭ تاپسىرماسىن ورىنداۋ ءۇشىن جاۋاپتى لاۋازىمدى تۇلعالارعا قاتىستى تارتىپتىك جازا قولدانىلدى:
- تۋريزمدى دامىتۋعا جاۋاپتى تۋريزم جانە سپورت ۆيتسە-مينيسترىنە، سونداي-اق الماتى، قاراعاندى، اباي جانە جەتىسۋ وبلىستارى اكىمدەرىنىڭ ورىنباسارلارىنا قاتاڭ سوگىس جاريالاندى؛
- قونايەۆ، بالقاش قالالارىنىڭ، الاكول، ماقانشى اۋداندارىنىڭ اكىمدەرىنە، سونداي-اق اۋىلدىق وكرۋگتەردىڭ اكىمدەرىنە سوگىس جاريالاندى؛
- كاسىپكەرلىككە، تۋريزمگە، قورشاعان ورتانى قورعاۋعا، ساۋلەت پەن ساۋداعا جاۋاپتى وبلىستىق باسقارمالاردىڭ باسشىلارىنا جازالاۋ شارالارى قولدانىلدى؛
- ەكولوگيا جانە تابيعي رەسۋرستار، دەنساۋلىق ساقتاۋ، قارجى، سۋ رەسۋرستارى جانە يرريگاتسيا، ساۋدا جانە ينتەگراتسيا، كولىك مينيسترلىكتەرىنىڭ اۋماقتىق بولىمشەلەرىنىڭ باسشىلارى جاۋاپكەرشىلىككە تارتىلدى.
جەرگىلىكتى جەرلەردە ورتالىق مەملەكەتتىك ورگاندار وكىلدەرىنىڭ قاتىسۋىمەن كوشپەلى تەكسەرۋلەر جۇرگىزىلۋدە. تەكسەرۋ قورىتىندىسى بويىنشا تۋريستىك ينفراقۇرىلىمدى دامىتۋدىڭ جول كارتاسى ازىرلەنەتىن بولادى، وندا سالاداعى جۇيەلىك پروبلەمالاردى جويۋ جونىندەگى ءبىرىنشى كەزەكتەگى شارالار ايقىندالادى.
بۇدان باسقا، جۇمىس توبىنىڭ بازاسىندا تۋريستىك قىزمەتتەردىڭ ساپاسىن ارتتىرۋ، كۋرورتتىق ايماقتاردى اباتتاندىرۋ جانە جەرگىلىكتى جەرلەردە قۇقىقتىق ءتارتىپتى قامتاماسىز ەتۋ جونىندەگى جۇمىستى تۇراقتى نەگىزدە ۇيلەستىرەتىن جوبالىق كەڭسە جاساقتالدى.
ەسكە سالا كەتەيىك، بۇعان دەيىن ەرمەك كوشەربايەۆ الاكول كولىنىڭ جاعالاۋىنداعى دەمالىس ايماقتارىن تەكسەرگەن بولاتىن.
اۆتور
باقىتگۇل اباي قىزى
