تۇركيا وكىلى تۇركى الەمىنىڭ ىنتىماعى تۋرالى: تاريحي مۇمكىندىك ءبىر رەت قانا بەرىلەدى
استانا. KAZINFORM - تۇركيا ۇلى ۇلتتىق ءماجىلىسىنىڭ ءتوراعاسى نۋمان كۋرتۋلمۋش تۇركى مەملەكەتتەردىڭ پارلامەنتتىك اسسامبلەياسىنىڭ پلەنارلىق وتىرىسىندا باۋىرلاس مەملەكەتتەردىڭ وكىلدەرىن گەوساياسي احۋال قۇبىلىپ تۇرعان كەزەڭدە تاريح بەرىپ وتىرعان مۇمكىندىكتى بىرلەسىپ پايدالانۋعا شاقىردى.
- ماۋەرەنناھردان كاۆكازعا دەيىن، كاۆكاز ايماعىنان انادولىعا دەيىن، انادولىدان ەۋروپاعا دەيىن سوزىلىپ جاتقان ۇلان-بايتاق تەرريتوريادا ورنالاسقان تۇركى الەمىنە قازىرگى جاڭا كەزەڭ جاڭا مۇمكىندىكتەر ۇسىنىپ وتىر. وسىنى پايدالانا ءبىلۋىمىز كەرەك. وزىمىزگە تۇسكەن مىندەتتى ناقتى اتقارىپ شىعۋ - ءبارىمىز ءۇشىن پارىز. ويتكەنى تاريحي مۇمكىندىك ءبىر رەت قانا بەرىلەدى جانە قايتادان قاشان بەرىلەتىنىن ەشكىم بىلمەيدى. سوندىقتان قولىمىزعا ءتۇسىپ تۇرعان مۇمكىندىكتى بارىنشا پايدالانىپ قالۋىمىز كەرەك. تۇركى الەمى - 300 ميلليون ادامنان تۇراتىن مادەني الەم عانا ەمەس، بۇكىل الەمنىڭ ەڭ ستراتەگيالىق ايماعىندا ورنالاسقان، تابيعي قورى مول، باي اۋماق. سوندىقتان الەمگە جاڭا وركەنيەت ۇسىناتىنداي الەۋەتى بار، - دەدى ول.
نۋمان كۋرتۋلمۋش تۇركى مەملەكەتتەرى تاۋەلسىزدىگىن العاننان بەرى قارىشتاپ دامىپ كەلە جاتىر دەپ ەسەپتەيتىنىن ايتتى.
- ءبىراق تاۋەلسىزدىكتى جاريالاپ قويۋ جەتكىلىكسىز. تاۋەلسىزدىكتىڭ قۇرىلىمىن نىعايتۋ كەرەك. بۇل - ادەبيەت پەن تاريحتى، عىلىم مەن تەحنولوگيانى قامتيتىن بۇكىل سالاداعى تاۋەلسىزدىكتى بىلدىرەدى. ازىق-تۇلىك قاۋىپسىزدىگى بولسىن، بۇكىل سالادا تاۋەلسىز بولاتىنداي دەڭگەيگە جەتۋىمىز كەرەك. ولاي بولماسا تاۋەلسىزدىك قاعاز جۇزىندە عانا قالادى. ەڭ باستى تاۋەلسىزدىك - مادەني تاۋەلسىزدىك. كۇشتى مەملەكەتتەردىڭ ىقپالىنان اجىراۋ - وڭاي ەمەس. وعان قاجەتتى تاريحي مۇرامىز بارشىلىق، - دەدى تۇركيا ۇلى ۇلتتىق ءماجىلىسىنىڭ ءتوراعاسى.
ايتا كەتەيىك، بۇگىنگى پلەنارلىق وتىرىس قورىتىندىسى بويىنشا تۇركپا-عا ءتوراعالىق ازەربايجاننان قازاقستانعا ءوتىپ، استانا دەكلاراتسياسى قابىلدانادى.
سونداي-اق، بۇگىن پرەزيدەنت قاسىم-جومارت توقايەۆ تۇركپا-عا مۇشە ەلدەر پارلامەنتتەرىنىڭ سپيكەرلەرىمەن كەزدەستى.
اۆتور
ەسىمجان ناقتىباي
