تەڭگەنىڭ نىعايۋىنا مۇمكىندىك بار - ەكونوميستەر ترامپتىڭ ىقپالى تۋرالى

الماتى. KAZINFORM - دونالد ترامپتىڭ اق ۇيگە ورالۋى بولاشاقتا تەڭگە باعامىنا قالاي اسەر ەتۋى مۇمكىن؟ قازاقستاندىق ەكونوميستەر پىكىر ءبىلدىردى.

экономист
Коллаж: А. Бейсембаев, А. Қысықовтың жеке мұрағаты/Kazinform

- دونالد ترامپتىڭ يناۋگۋراتسياسى كەشە ءوتتى. دوللار باعامىنىڭ ديناميكاسىن باقىلادىق، ول ازداپ تومەندەدى. بۇل - «سىبىسقا قاراي ساتىپ ال، فاكتىگە قاراي سات» دەپ سيپاتتاۋعا بولاتىن قۇبىلىس. بىلتىر قاراشا ايىندا دونالد ترامپ سايلانعاننان كەيىن دوللار تۇراقتى تۇردە نىعايا تۇسكەن، ءبىراق يناۋگۋراتسيا تۇسىندا السىرەي باستادى. كەشە ەۋرو مەن فۋنت ستەرلينگ سياقتى باسقا ۆاليۋتالاردىڭ كوتەرىلگەنىن كوردىك. نارىقتىڭ مۇنداي ارەكەتى تاڭ قالدىرماۋى كەرەك، - دەيدى ەكونوميست ارمان بەيسەمبايەۆ.

ونىڭ ايتۋىنشا، دوللار باعامىنىڭ ديناميكاسى جاڭادان سايلانعان ا ق ش پرەزيدەنتى قابىلداعان شەشىمدەرگە بايلانىستى بولادى. وسىعان دەيىن دونالد ترامپ ءتۇرلى شارا كەشەنىن ەنگىزۋگە ۋادە بەرگەن ەدى.

- ءدال قازىر قازاقستانعا ايتارلىقتاي اسەر ەتەدى دەپ ويلامايمىن. ءبىراق ۇزاق مەرزىمدى پەرسپەكتيۆادا بەلگىلى ءبىر قاۋىپتەر بار. ولار جىلدىڭ ەكىنشى جارتىسىندا ترامپتىڭ ساياساتى قالاي باعىت الاتىنىنا قاراي بايقالۋى مۇمكىن. سونداي-اق ەكىنشى جارتىجىلدىقتا رەسەي مەن ۋكراينا اراسىنداعى جاعداي شەشىلۋى كەرەك. ونىڭ دا ناتيجەسى بىزگە ايتارلىقتاي اسەر ەتەدى، - دەپ اتاپ ءوتتى ول.

ەكونوميست ا ق ش پەن قىتاي اراسىنداعى قارىم-قاتىناستىڭ دا ىقپالى ءتيۋى مۇمكىن ەكەنىن ايتادى.

- قورىتىندىلاي كەلە، ءبىرىنشى جارتىجىلدىقتا تەڭگە باعامى ءبىر دوللارعا شاققاندا 530 تەڭگە شاماسىندا قالاتىن شىعار. دەگەنمەن، ۆاليۋتانىڭ قالىپتى نىعايۋىنا تولىق مۇمكىندىك بار جانە 505-510 تەڭگە دەڭگەيىنە قايتا ورالۋىمىز ابدەن مۇمكىن. بۇل - شىنايى سسەناري، ويتكەنى قارجى نارىقتارى تولقىندى قوزعالىستاردى باستان كەشىرەدى. الايدا، جىلدىڭ ەكىنشى جارتىسىندا بەلگىلى ءبىر قاۋىپتى بولجامدار ورىندالسا، مۇنداي جاعدايدا تەڭگە باعامى ءبىر دوللار ءۇشىن 530 تەڭگەگە ورالۋى، ءتىپتى 550 تەڭگەگە دەيىن السىرەۋى مۇمكىن. بۇعان قوسا، ترامپ ساۋدا سوعىسىن اشۋى مۇمكىن ەكەنىن ۇمىتپاۋىمىز كەرەك. ال، ا ق ش- تىڭ قىتايعا سوققىسى رەسەيگە ءسوزسىز اسەر ەتەدى. ونىڭ ءبىر ۇشى قازاقستان ەكونوميكاسىنا تيەتىنى انىق، - دەيدى ارمان بەيسەمبايەۆ.

ەكونوميست اسقار قىسىقوۆ تا تەڭگە باعامىنداعى جاعدايعا قاتىستى پىكىرىمەن ءبولىسىپ، ونىڭ ديناميكاسىنا ەكى نەگىزگى فاكتور - مۇناي باعاسى مەن رەسەي رۋبلى اسەر ەتەتىنىن جەتكىزدى.

- ترامپ «بۇكىل الەمدى مۇنايعا قارىق قىلدىرامىن» دەسە دە، بۇل باعانىڭ كۇرت تومەندەۋىنە اكەلەدى دەپ ويلامايمىن. باعا ءسال ءتۇسۋى مۇمكىن، ءبىراق تىم ارزانداپ كەتە قويماس، - دەيدى ساراپشى. - ال رەسەي رۋبلىنىڭ كۇيى كەرى اسەر ەتۋى ىقتيمال. ايتالىق، كوپ نارسەنى يمپورتتايمىز.

ول قازىر قازاقستاننىڭ ۆاليۋتا نارىعىندا ديەۆالۆاتسيالىق بولجامدارعا بايلانىستى شەتەل ۆاليۋتاسىنا سۇرانىس جوعارى ەكەنىنە توقتالىپ، سوندىقتان ۇلتتىق بانك ينتەرۆەنتسيالار جۇرگىزۋگە ءماجبۇر ەكەنىن اتاپ ءوتتى.

- ۆاليۋتا باعامىنا قىسىم ءالى دە جالعاسادى دەپ ويلايمىن، ءبىراق ۇلتتىق بانكتە تۇراقتىلىقتى ساقتاۋدىڭ بارلىق قۇرالى بار ەكەنىن ەسكەرۋ قاجەت. ۆاليۋتا نارىعىنىڭ تۇراقسىزدانۋىن بولدىرمايدى. سوندىقتان ۇزاق مەرزىمدى پەرسپەكتيۆادا تەڭگە باعامى السىرەيدى، ءبىراق كۇرت اۋىتقۋلار بولمايدى. ءبىرىنشى جارتىجىلدىقتا باعام ءبىر دوللارعا 530-550 تەڭگە شەگىندە ساقتالادى دەپ ويلايمىن، - دەيدى ساراپشى.

كەشە قور نارىعىنىڭ كۇندىزگى ساۋدا قورىتىندىسى بويىنشا، دوللاردىڭ ورتاشا باعامى 0,28 تەڭگەگە تومەندەپ، 529,94 تەڭگە بولدى، ال بۇگىن 2,36 تەڭگەگە ارزاندادى.

اۆتور

الما مۇقانوۆا

سوڭعى جاڭالىقتار