تاياۋ شىعىستاعى قاقتىعىس: يران اۋماعىنان 109 وتانداسىمىز ەلگە ورالدى
استانا. KAZINFORM - تاياۋ شىعىستاعى قارقىندى شيەلەنىسكەن جاعدايدا قازاقستان رەسپۋبليكاسى ءوز ازاماتتارىن يران يسلام رەسپۋبليكاسىنىڭ اۋماعىنان ەۆاكۋاتسيالاۋدى جەدەل ۇيىمداستىردى، دەپ حابارلايدى سىرتقى ىستەر مينيسترلىگى.
- ۇيلەسىمدى جۇمىس پەن ۆەدومستۆوارالىق ءوزارا ءىس-قيمىلدىڭ جوعارى دەڭگەيىنىڭ ارقاسىندا قازاقستاننىڭ سىرتقى ىستەر مينيسترلىگى، قۇزىرەتتى مەملەكەتتىك ورگاندارى مەن شەتەلدەگى ديپلوماتيالىق وكىلدىكتەرى 109 وتانداسىمىزدى ەلگە قايتاردى. ەۆاكۋاتسيا ءوڭىردىڭ دوستاس مەملەكەتتەرىنىڭ اۋماقتارى ارقىلى ترانزيتپەن جۇزەگە اسىرىلدى، اتاپ ايتقاندا 89 ادام يراننان تۇرىكمەنستان ارقىلى جانە 20 ادام ازەربايجان ارقىلى ءوتتى. بارلىق ازاماتقا كونسۋلدىق-قۇقىقتىق كومەك كورسەتىلدى جانە وتانعا ورالۋ ءۇشىن قاجەتتى جاعداي جاسالدى، - دەلىنگەن مينيسترلىك حابارلاماسىندا.
سىرتقى ىستەر مينيسترلىگى يران، تۇرىكمەنستان جانە ازەربايجان بيلىگىنە قازاقستاندىقتاردىڭ بۇكىل باعىتى بويىنشا قاۋىپسىز جانە ۋاقتىلى ءوتۋىن قامتاماسىز ەتۋدە ماڭىزدى ءرول اتقارعان كومەك پەن ناتيجەلى ءوزارا ءىس-قيمىل كورسەتكەنى ءۇشىن ريزاشىلىعىن بىلدىرەدى.
ەۆاكۋاتسيالىق ءىس-شارالاردى دايىنداۋ جانە وتكىزۋ بارىسىندا قازاقستاندىق ديپلوماتتار تاۋلىك بويى جەرگىلىكتى بيلىكپەن ءىس-قيمىلدى ۇيلەستىرىپ، مارشرۋتتاردىڭ لوگيستيكاسىن قامتاماسىز ەتتى، سونداي-اق قۇزىرەتتى ورگاندارمەن ءوزارا ءىس-قيمىل جاسادى جانە وتانداستارىمىزعا قاجەتتى قولداۋ كورسەتتى.
- قىسقا مەرزىمدە 200 دەن استام ازاماتىمىز حابارلاسىپ، ولارعا كومەك كورسەتىلدى. يرانداعى بارلىق قازاقستاندىقتارمەن ۇزدىكسىز بايلانىس ورناتىلىپ، ولاردىڭ الدىن الا كەلىسىلگەن ترانزيتتىك باعىتتارى بويىنشا ءجۇرىپ-تۇرۋى ۇيىمداستىرىلدى. وتانداستارىمىزدى ەلگە قايتارۋ بويىنشا جۇمىس جالعاسىپ جاتىر. قازىرگى ۋاقىتتا ق ر س ءى م باسقا قۇزىرەتتى ۆەدومستۆولارمەن بىرلەسىپ قازاقستان ازاماتتارىن يزرايل مەملەكەتىنەن ەۆاكۋاتسيالاۋدى پىسىقتاۋدا. شەتەلدەگى قازاقستاندىقتاردىڭ قۇقىقتارى، قاۋىپسىزدىگى مەن اماندىعى - ەلىمىزدىڭ سىرتقى ساياسي باعىتىنىڭ اسا ماڭىزدى باسىمدىعى، - دەپ اتاپ ءوتتى ۆەدومستۆو.
