تاسقىن كەزىندە اۋە تەحنيكاسىنىڭ جەتكىلىكسىزدىگىن سەزدىك - توتەنشە جاعدايلار ءمينيسترى
استانا. KAZINFORM - توتەنشە جاعداي قىزمەتىنىڭ وكىلدەرى كوكتەمدەگى تاسقىن كەزىندە وڭىرلەردە ينجەنەرلىك تەحنيكا مەن اۋە كولىگىنىڭ جەتكىلىكسىزدىگىن سەزىنگەن. بۇل تۋرالى مينيستر شىڭعىس ءارىنوۆ ۇكىمەت وتىرىسىندا ايتتى.
«مەملەكەت باسشىسى ەلىمىزدە بولعان ءىرى سۋ تاسقىنىنىڭ سالدارىن جويۋدا ادام ولىمىنە جول بەرمەۋ جانە حالىقتىڭ قاۋىپسىزدىگىن قامتاماسىز ەتۋدى تاپسىرعان بولاتىن. وسىعان بايلانىستى، مينيسترلىك بارلىق كۇشتەر مەن قۇرالداردى توتەنشە جاعداي ايماعىندا قالعان حالىقتى تەز ارادا ەۆاكۋاتسيالاۋعا جانە اۆاريالىق-قۇتقارۋ جۇمىستارىن جۇرگىزۋگە جۇمىلدىردى. قۇتقارۋ جۇمىستارى قولايسىز اۋا رايى جاعدايىندا جانە قيىن جەرلەردە جۇرگىزىلدى»، - دەدى ول.
مينيستر تاسقىن كەزىندە اۋە كولىگىنىڭ ورنىنا تەمىرجول تاسىمالىن پايدالانۋعا تۋرا كەلگەنىن اتاپ ءوتتى.
«اپات بولعان ايماقتاردا ينجەنەرلىك تەحنيكا مەن اۋە كولىگىنىڭ جەتىسپەۋشىلىگى قاتتى سەزىلدى. تارتىلعان تەحنيكانىڭ باسىم بولىگى ساپاسىز ءارى ۇزاق مەرزىمدى جۇمىستاردى جۇرگىزۋگە جارامسىز بولاتىن. وسىعان بايلانىستى، كوپتەگەن كۇشتەر مەن قۇرالداردى تەمىرجول ەشەلوندارىمەن جانە اۋە كەمەلەرىمەن جونەلتۋ جۇرگىزىلدى»، - دەدى ۆەدومستۆو باسشىسى.
اۆتور
ەسىمجان ناقتىباي
