تالدىقورعان-قالباتاۋ-وسكەمەن اۆتوجولىن قايتا جاڭارتۋ جۇمىستارىنىڭ نەگىزگى بولىگى اياقتالدى
«قازاۆتوجول» ۇلتتىق كومپانياسى «تالدىقورعان-قالباتاۋ-وسكەمەن» اۆتوجولىن قايتا جاڭارتۋ بويىنشا (287-615 شاقىرىم ارالىعىندا) جەتىسۋ وبلىسىندا ۇزىندىعى 314 شاقىرىمدى قۇرايتىن نەگىزگى جۇمىستاردى اياقتادى.
قايتا جاڭارتۋ بارىسىندا اۆتوجولدىڭ تەحنيكالىق ەرەكشەلىكتەرى جاقسارتىلدى: 32 شاقىرىم 1-تەحنيكالىق ساناتقا، ال 282 شاقىرىم Ⅱ تەحنيكالىق ساناتقا اۋىستىرىلدى (جولدىڭ ەنى 9 مەترگە ۇزارتىلدى).
قازىرگى تاڭدا 314 شاقىرىم ارالىقتا جولدىڭ جوعارى قاباتىنا قيىرشى تاستى-ماستيكالىق اسفالت جابىنى توسەلدى.
«قۇرىلىس بارىسىندا 5 اسفالت بەتون زاۋىتى، 500-دەن اسا جول- قۇرىلىس تەحنيكاسى مەن 700-گە جۋىق جۇمىسشى جۇمىلدىرىلدى (ونىڭ ىشىندە كوبىسى جەرگىلىكتى ەلدى مەكەننىڭ ازاماتتارى).
جول پايدالانۋشىلارعا قولايلى جاعداي جاساۋ ماقساتىندا 12 دەمالىس الاڭى جانە 10 زاماناۋي سانيتارلىق-گيگيەنالىق توراپ سوعۋ جوسپارلانعان، ونىڭ ىشىندە 4 سانيتارلىق-گيگيەنالىق تورابى قولدانىسقا بەرىلدى»، - دەلىنگەن كومپانيا حابارلاماسىندا.
اۆتوجولدىڭ بۇل ۋچاسكەسى ارقىلى ەندى الماتى قالاسىنان الاكولگە دەيىن جىلدام ءارى قولايلى جەتۋگە مۇمكىندىك بەرىپ، ەلىمىزدەگى ىشكى تۋريزمنىڭ دامۋىنا وڭ سەپتىگىن تيگىزەتىن بولادى.
ايتا كەتەيىك، «تالدىقورعان- قالباتاۋ- وسكەمەن» اۆتوجولىنىڭ قايتا جاڭارتۋ جۇمىستارىنىڭ ۇزىندىعى 768 شاقىرىمدى قۇرايدى. بۇل جولدىڭ 58 شاقىرىمى 1- ب ساناتىنا، ال 710 شاقىرىمى Ⅱ ساناتقا جاتادى. جوبا ءۇش وبلىستى قامتيدى: جەتىسۋ، اباي جانە شىعىس قازاقستان. جوبا اياسىندا 81 كوپىر مەن جول وتكەلدەرىن، سونداي- اق 521 سۋ وتكىزگىش قۇبىرلارىن سالۋ جوسپارلانۋدا. سونىمەن قاتار جوبا اياسىندا سانيتارلىق- گيگيەنالىق قۇرىلعىلارى بار دەمالىس ورىندارىن سوعۋ قاراستىرىلعان.
نىساندى قايتا جاڭارتۋ جۇمىستارىن 2024 -جىلدىڭ سوڭىنا دەيىن اياقتاۋ جوسپارلانىپ وتىر.
اۆتور
اسحات رايقۇل
