تاۋار بيرجالارى وتاندىق بيزنەستى جىل سايىن 1 تريلليون تەڭگەدەن قاعىپ وتىر - پرەمەر

پرەمەر- مينيستر ءاليحان سمايىلوۆ ۇكىمەت وتىرىسىندا تاۋار بيرجالارىنا مەملەكەت ارتقان سەنىمنىڭ اقتالماعانىن ايتىپ، سالاداعى كەمشىلىكتەردى اتادى، دەپ حابارلايدى Kazinform.

«قازىرگى تاڭدا قازاقستاندا استىق، مۇناي ونىمدەرى، كومىر جانە باسقا دا تاۋارلاردىڭ ساۋدا- ساتتىعىن جاسايتىن 10 تاۋار بيرجاسى بار. ءبىز بيرجالىق ساۋداعا ۇلكەن ءۇمىت ارتىپ كەلدىك. سوڭعى 5 جىلدا زاڭناما 2 رەت وزگەردى. سوعان قاراماستان، بيرجالار ءالى كۇنگە دەيىن نارىقتاعى ءوز قىزمەتىن تولىقتاي ورىنداي العان جوق»، - دەدى پرەمەر- مينيستر.

سونداي- اق ءا. سمايىلوۆ جەر قويناۋىن پايدالانۋشىلاردىڭ تاۋار بيرجالارىن ءوز مۇددەلەرىنە قاراي پايدالانىپ كەتكەنىن اتاپ ءوتتى.

«بۇگىندە بيرجالىق ساۋدانىڭ نەگىزگى بولىگى جەرگىلىكتى قامتۋدى ساقتاۋ تۋرالى مىندەتتەمەلەرى جوق مامىلەلەرگە قىزمەت كورسەتۋگە باعىتتالعان. سالدارىنان جىل سايىن 1 تريلليون تەڭگەدەن استام قاراجات ءبىزدىڭ بيزنەسكە جەتپەي قالادى. بۇلاي بولماۋى كەرەك. جەر قويناۋىن پايدالانۋشىلاردىڭ ساتىپ الۋلارى ەل مۇددەسىنە جۇمىس ىستەۋى ءتيىس»، - دەدى ۇكىمەت باسشىسى.

پرەمەردىڭ ايتۋىنشا، تاۋار بيرجالارى ميكروكاسىپكەرلىك نىسانىنا جاتقىزىلعاندىقتان سالىقتى از تولەپ، تەكسەرۋلەردەن وڭاي قۇتىلىپ وتىر.

«جالپى، انىقتالعان كەمشىلىكتەردىڭ بارلىعى جاڭا زاڭناما شەڭبەرىندە جويىلۋى ءتيىس»، - دەدى ءاليحان سمايىلوۆ.

اۆتور

ەسىمجان ناقتىباي