سپورت سالاسىنداعى زاڭناما جاڭارتىلادى - پرەزيدەنت جولداۋى

استانا. KAZINFORM - مەملەكەت باسشىسى قاسىم-جومارت توقايەۆ «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى جولداۋىندا سپورت سالاسىنداعى زاڭنامانى جاڭارتۋدى تاپسىردى.

«بارشاڭىزعا ءمالىم، مەن بۇقارالىق سپورتتى دامىتۋعا ەرەكشە ءمان بەرىپ وتىرمىن. جاستارىمىز دەنى ساۋ، مىقتى ازامات بولىپ ءوسۋى كەرەك. سوندىقتان ۇلت ساۋلىعىن ساقتاۋ ءۇشىن بۇقارالىق سپورتتىڭ ماڭىزى ايرىقشا. جاقىندا مەن وليمپياداعا قاتىسۋشىلارمەن كەزدەستىم، سپورتتاعى ناقتى مىندەتتەر مەن باسىمدىقتارعا توقتالدىم. شىن مانىندە، بۇل سالاداعى زاڭنامانى جاڭارتاتىن كەز كەلدى دەپ ويلايمىن»، - دەدى مەملەكەت باسشىسى.

پرەزيدەنت اتالعان زاڭعا ەنگىزىلەتىن وزگەرتۋلەر بۇقارالىق سپورت پەن بالالار سپورتىن دامىتۋعا زور سەرپىن بەرەتىنى ايتتى.

«سونداي-اق بولاشاق جەڭىمپازدار شوعىرىن دايارلاۋعا جول اشادى. دەپۋتاتتار وسى ماڭىزدى زاڭ جوباسىنا ايرىقشا ءمان بەرگەنى ءجون دەپ سانايمىن»، - دەدى قاسىم-جومارت توقايەۆ.

پەداگوگيكالىق وقۋ ورىندارىنا قابىلەتتى جاستاردى قابىلداۋعا باسا ءمان بەرۋ كەرەك. وقىتۋ ىسىنە مەملەكەتپەن قاتار اتا-انالار دا جاۋاپتى.

«بۇدان بولەك، مەكتەپتەردىڭ جۇمىسىن جاقسارتۋ شارالارىن قولعا العان ءجون. مۇعالىمدەردىڭ بىلىكتىلىگىن ارتتىرۋعا جانە الەۋمەتتىك مارتەبەسىن كوتەرۋگە كوڭىل بولگەن ابزال. ۇستازدار - ۇلتتىڭ زياتكەرلىك قۋاتى. ولار ءبىلىمدى ۇرپاق تاربيەلەۋ ارقىلى ەلىمىزدىڭ وركەندەۋىنە جول اشادى. ۇزدىك وقۋ باعدارلاماسى، زاماناۋي مەكتەپتەر، وزىق باسقارۋ جۇيەسى بولسا دا، ۇستاز بىلىكتى بولماسا، ونىڭ ءبارى بەكەر ەكەنى انىق. سوندىقتان پەداگوگيكالىق جوعارى وقۋ ورىندارىنا تالاپتى، قابىلەتتى جاستاردى قابىلداۋعا باسا ءمان بەرۋ كەرەك. جالپى بۇل باعىتتاعى جۇمىستىڭ بەتالىسى جاقسى، ونى جالعاستىرۋ قاجەت»، - دەدى قاسىم- جومارت توقايەۆ.

پرەزيدەنتتىڭ ايتۋىنشا، بالانى مەكتەپكە دايىنداۋ ماسەلەسىنە ايرىقشا نازار اۋدارعان ءجون.

«مەكتەپكە دەيىنگى تاربيە بەرۋ جانە وقىتۋ ىسىنە مەملەكەتپەن قاتار اتا-انالار دا جاۋاپتى. سوندىقتان مەكتەپكە دەيىنگى ءبىلىم بەرۋ سالاسىندا ءار بالاعا بولىنەتىن قاراجات وتباسىنىڭ ناقتى تابىسىنا بايلانىستى بولۋى كەرەك. وسىلايشا، ءبىز ءبىلىم بەرۋ جۇيەسىن ودان ءارى جەتىلدىرۋ ارقىلى شىن مانىندە مۇقتاج ازاماتتارعا كومەك كورسەتەمىز جانە مەملەكەتتىك قولداۋدىڭ اشىق بولۋىن قامتاماسىز ەتەمىز. تۇپتەپ كەلگەندە، ازاماتتارىمىزدىڭ الەۋەتىن ارتتىرامىز»، - دەدى مەملەكەت باسشىسى.

اۆتور

رۋسلان عابباسوۆ