سەرىك جۇمانعارين «اتامەكەننىڭ» ق ق س-دان تۇسەتىن كىرىس تۋرالى ەسەبىنە جاۋاپ بەردى

استانا. KAZINFORM - پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين ءماجىلىس وتىرىسىنان كەيىن وتكەن باسپا ءسوز ءماسليحاتىندا «اتامەكەن» ۇلتتىق كاسىپكەرلەر پالاتاسىنىڭ ق ق س- نى وزگەرتۋدەن تۇسەتىن كىرىس تۋرالى ەسەبىنە جاۋاپ بەردى.

- «اتامەكەن» ۇلتتىق كاسىپكەرلەر پالاتاسى قوسىلعان قۇن سالىعىنىڭ مەجەلەرىن وزگەرتۋدەن بيۋدجەتكە ارى كەتسە 3 تريلليون تەڭگە عانا تۇسەدى دەگەن ەسەپ ايتتى. ال ۇكىمەت 4-5 تريلليون تەڭگە تۇسەدى دەپ وتىر. ەرتەڭ كاسىپكەرلەر پالاتاسىنىڭ ەسەبى راس بولىپ، قوسىمشا كىرىس 3 تريلليون تەڭگە عانا بولسا، قالعان 2 تريلليون تەڭگەنى تاعى ۇلتتىق قوردان الاسىزدار ما، - دەپ سۇرادى جۋرناليست.

سەرىك جۇمانعارين «اتامەكەننىڭ» ەسەبىنەن ءبىراز قاتە تابىلعانىن، كەيىن پالاتا وكىلدەرى ۇكىمەتتىڭ ۋاجدەرىمەن كەلىسكەنىن ايتتى.

- جالپى ايتقاندا، «اتامەكەننىڭ» ەسەپتەگەنى - تەك ق ق س- دان تۇسەتىن اقشا. ءبىزدىڭ ەسەپتەگەنىمىز بۇكىل سالىق رەفورماسىنان تۇسەتىن اقشا بولاتىن. بۇل رەفورمادا بانكتەرگە، ويىن-ساۋىق نىساندارىنا قوسىمشا جۇكتەمەلەر بار. ونىڭ سىرتىندا كوپتەگەن جەڭىلدىكتى الىپ تاستايمىز دەپ وتىرمىز. سونىڭ ءبارىن ەسەپتەگەندە 4,5-5 تريلليون تەڭگە قوسىمشا كىرىس بولادى. مەنىڭ بىلۋىمشە، ءدال قازىر «اتامەكەن» مەن ءبىزدىڭ ەسەبىمىزدە ەشقانداي ايىرماشىلىق جوق، - دەدى ۆيتسە-پرەمەر.

ۇلتتىق ەكونوميكا ءمينيسترى «اتامەكەن» ۇ ك پ- نىڭ باستاپقى ەسەبى كەيىن وزگەرتۋگە ۇشىراعانىن ايتتى.

- «اتامەكەننىڭ» ءبىرىنشى ەسەبىنە قاراعاندا، اراسىندا قاتەلىكتەر كوپ بولدى. سوسىن ءبىز ولاردى تۇزەتىپ، ەكىنشى ەسەبىن اكەلگەندە ەكى جاقتىڭ بولجامى جاقىندادى، - دەدى سەرىك جۇمانعارين.

ەسكە سالساق، اتامەكەن» ۇلتتىق كاسىپكەرلەر پالاتاسىنىڭ ءتورالقا ءتوراعاسى رايىمبەك باتالوۆ قوسىلعان قۇن سالىعىن كوتەرۋدەن تۇسەتىن كىرىستىڭ ۇكىمەت كۇتكەندەي كولەمدە بولماۋى مۇمكىن ەكەنىن ايتقان ەدى.

اۆتور

ەسىمجان ناقتىباي