سۋپەركومپيۋتەر قۇرۋ: قازاقستانعا قاجەت جابدىقتار جەتكىزىلدى
استانا. KAZINFORM - سۋپەركومپيۋتەردى قۇرۋعا قاجەت Nvidia-نىڭ العاشقى چيپتەرى جەتكىزىلدى. بۇل تۋرالى سيفرلىق دامۋ، يننوۆاتسيالار جانە ايروعارىش ونەركاسىبى ءبىرىنشى ۆيتسە-ءمينيسترى قانىش تولەۋشين ءمالىم ەتتى.
- پلاتفورماداعى ماڭىزدى باعىتتىڭ ءبىرى - سۋپەركومپيۋتەر. ءبىز Nvidia-نىڭ العاشقى چيپتەرىن الدىق. ولار ورناتىلىپ، مەملەكەتتىك ورگاندارعا تاراتىلدى. وسى چيپتەردىڭ نەگىزىندە مەملەكەتتىك قىزمەتشىلەردىڭ جۇمىسىنا كومەكتەسەتىن اگەنتتەر مەن جاساندى ينتەللەككە قاتىستى جۇيە ازىرلەنىپ جاتىر، - دەدى ق. تولەۋشين ەلوردادا پارلامەنت ءماجىلىسى جانىنداعى قوعامدىق پالاتانىڭ كوشپەلى وتىرىسىندا «جاساندى ينتەللەكت تۋرالى» زاڭ جوباسىن تالقىلاۋ كەزىندە.
ونىڭ ايتۋىنشا، شەتەلدە دە ەلىمىزدىڭ كلاستەرى بار. ول بىزگە كوبىرەك قۋاتتى قاجەت ەتەتىن باسقا كۇردەلى مودەلدەردى دايىنداۋعا مۇمكىندىك بەرەدى.
- ماسەلەن، ءبىز شەتەلدەگى كلاستەرلەردە وسىنداي اۋقىمدى مۇمكىندىكتەردى پايدالانا وتىرىپ، ۇلكەن مودەلدى ازىرلەدىك. ءبىز مۇنىمەن توقتامايمىز. بىزدە قۋاتتىراق سۋپەركومپيۋتەر بولادى. وسى ورايدا ا ق ش- تاعى رەتتەۋشىدەن بارلىق قاجەت رۇقساتتاردى الدىق. مەنىڭ ويىمشا، بيىل بىزدە جەتكىلىكتى قۋاتتى جۇيەنى جاساقتايمىز، ونى تەك مەملەكەتتىك ورگاندارعا عانا ەمەس، سونىمەن قاتار باعدارلاما ازىرلەۋشىلەرگە، ستارتاپتارعا، عالىمدار مەن ساراپشىلارعا تاراتامىز، - دەدى ۆيتسە- مينيستر.
ەسكە سالساق، اتالعان زاڭ جوباسى بيىل ناۋرىز ايىندا ماجىلىستە تانىستىرىلعان ەدى.
زاڭ جوباسى جاساندى ينتەللەكت تەحنولوگيالارىن (جۇيەلەرىن) پايدالانۋدىڭ ءبىرىڭعاي قۇقىقتىق بازاسىن بەلگىلەۋگە باعىتتالعان.
بۇعان دەيىن قازاقستان قۋاتى كۇشتى سۋپەركومپيۋتەر قۇرۋعا كىرىسكەنىن جازعان ەدىك.
بىلتىر كۇزدە مينيسترلىك سۋپەركومپيۋتەر ءۇشىن جابدىققا امەريكا قۇراما شتاتتارىنا الدىن الا تاپسىرىس بەرگەنىن مالىمدەدى.
دەگەنمەن، قازاقستانعا جابدىقتى جەتكىزۋ مەرزىمى ا ق ش ۇكىمەتىنىڭ قازاقستان رەسپۋبليكاسىنا چيپتەردى ەكسپورتتاۋ تۋرالى قورىتىندىسىن شىعارۋىنا بايلانىستى. امەريكالىق تاراپ ەكسپورت ليتسەنزياسىن الۋ پروتسەسى ۇزاققا سوزىلاتىنىن حابارلادى.
بيىل ءساۋىر ايىنىڭ باسىندا سيفرلىق دامۋ، يننوۆاتسيالار جانە ايروعارىش ونەركاسىبى ءمينيسترى جاسلان ماديەۆ قازاقستانعا قۋاتى كۇشتى سۋپەركومپيۋتەر قۇرۋعا قاجەت جابدىقتار تاياۋ ارادا جەتكىزىلەتىنىن ايتتى.
