سارانداعى تۇرمىستىق تەحنيكا زاۋىتى 70 مىڭ دانا وتاندىق ءونىم شىعاردى

استانا. KAZINFORM - سارانداعى تۇرمىستىق تەحنيكا زاۋىتى 70 مىڭ دانا وتاندىق ءونىم شىعاردى. بۇل تۋرالى ۇكىمەت وتىرىسىنان كەيىنگى بريفينگتە ونەركاسىپ جانە قۇرىلىس ءمينيسترى قانات شارلاپايەۆ ايتتى.

«قاراعاندى وبلىسىنىڭ ساران قالاسىندا 70 مىڭ دانا وتاندىق تۇرمىستىق تەحنيكا شىعارىلدى. بۇعان قوسا، وسى جىلدىڭ 4-توقسانىندا Samsung تۇرمىستىق تەحنيكالارىن شىعارۋ قولعا الىنادى دەپ ۇمىتتەنەمىز. كەلىسىم قول قويۋ ساتىسىندا تۇر. ولار - تەلەديدارلار مەن كىر جۋاتىن ماشينالار. مۇنان بولەك، «الاتاۋ» يننوۆاتسيالىق جوبالار پاركىندە Huawei تەلەديدارلارى شىعارىلىپ جاتىر. ايىنا شامامەن 5-7,5 مىڭ تەلەديدار قۇراستىرامىز. الماتى تۇرمىستىق تەحنيكا زاۋىتى بار. ول تۇرمىستىق تەحنيكالاردىڭ بيۋدجەتتىك برەندتەرىن شىعارادى. ياعني، تۇرمىستىق تەحنيكا تۇرعىسىنان العاندا بىزدە وتاندىق ءوندىرىس جولعا قويىلعان»، - دەدى مينيستر.

سونىمەن قاتار ونىڭ اتاپ وتۋىنشە، Samsung كومپانياسىمەن ەلىمىزدە جىل سايىن 400 مىڭ تۇرمىستىق تەحنيكا شىعارۋ كەلىسىمى بار.

«سىرتتان اكەلىنەتىن تاۋارلارعا قاراعاندا وتاندىق تۇرمىستىق تەحنيكالار الدە قايدا ارزان بولادى دەپ ويلايمىن. تەحنيكانىڭ پلاستيكتەن جاسالاتىن كورپۋسى زاۋىتتىڭ وزىندە قۇيىلادى. قۇرال- جابدىقتار اكەلىنگەن. لوگيستيكالىق مول شىعىندى قاجەت ەتەتىن بولشەكتەر دە قازاقستاندا شىعارىلادى»، - دەدى ول.

اۆتور

مارلان جيەمباي