سالىقتىڭ كولەمى كەم دەگەندە 20 پايىزعا وڭتايلاندىرىلادى
بيزنەس سۋبەكتىلەرىنىڭ سالىقتىق ەسەبىن 30 پايىزعا ازايتۋ جوسپارلانىپ وتىر. بۇل تۋرالى «التىن ساپا» جانە «پارىز» سىيلىقتارىنىڭ يەگەرلەرىن ماراپاتتاۋ راسىمىندە پرەزيدەنت قاسىم-جومارت توقايەۆ ايتتى، دەپ حابارلايدى Kazinform.
«ۇكىمەت پەن بيزنەس-قوعامداستىق بىرلەسىپ، كاسىپكەرلىكتى دامىتۋعا كەدەرگى كەلتىرەتىن ارتىق تالاپتاردى انىقتاۋ ءۇشىن اۋقىمدى جۇمىستار جۇرگىزدى. سونىڭ ناتيجەسىندە، 10 مىڭنان استام زاڭ نورماسى جاڭا رەتتەۋشى ساياساتتىڭ نەگىزگى تالاپتارىنا ساي كەلمەيتىنى انىقتالدى. بۇگىندە ونىڭ 90 پايىزى كۇشىن جويدى. قالعانى جىل سوڭىنا دەيىن رەتكە كەلتىرىلەدى. سىن-قاتەرلەردى باسقارۋدىڭ اۆتوماتتاندىرىلعان جۇيەسى باقىلاۋشى ورگانداردىڭ بيزنەسكە قىسىمىن شەكتەۋدىڭ ماڭىزدى قۇرالىنا اينالادى. ول 2024 -جىلدىڭ 1-قاڭتارىنان باستاپ ىسكە قوسىلادى جانە ادامنىڭ قاتىسۋىنسىز تەكسەرۋدى بەلگىلەۋگە مۇمكىندىك بەرەدى. ناتيجەسىندە، بيزنەسكە جوسپارلى ينسپەكسيا جاساۋ ەكى ەسە قىسقارادى. ال ايىپپۇلدار سانى بىرنەشە ەسە ازايادى»، - دەدى قاسىم- جومارت توقايەۆ.
مەملەكەت باسشىسىنىڭ اتاپ وتۋىنشە، بيزنەس پەن مەملەكەت اراسىنداعى قاتىناستاردىڭ جۇيەلى تۇردە جاڭعىرۋىنا قازىر ازىرلەنىپ جاتقان جاڭا سالىق كودەكسى ىقپال ەتەدى.
اتاپ ايتقاندا، وندا فيسكالدى ورگانداردى اكىمشىلەندىرۋدىڭ سەرۆيستىك مودەلىنە كوشىرۋ ماسەلەسى قامتىلادى.
«بيزنەس سۋبەكتىلەرىنىڭ سالىقتىق ەسەبىن 30 پايىزعا ازايتۋ جوسپارلانىپ وتىر. سالىقتىق تولەمدەر سانى كەم دەگەندە 20 پايىزعا وڭتايلاندىرىلادى. كولىك قۇرالدارىنا ارنالعان سالىق بويىنشا ەسەپ ايىرىسۋ مەن دەكلاراتسيا، سونداي- اق جەر مەن مۇلىك سالىعىنا قاتىستى جۇكتەمە ءبىر ميلليون تەڭگەدەن از بولسا، ەسەپ ايىرىسۋ الىنىپ تاستالادى. كاسىپكەرلەردىڭ بانكتەردەگى شوتتارىن بۇعاتتاۋ كەزىندە ولاردىڭ سالىقتىق قارىزىنا تەڭ كولەمدەگى قارجىسىنا عانا شەكتەۋ قويىلادى»، - دەدى پرەزيدەنت.
اۋىل تۇرعىندارىنا شاعىن نەسيە بەرۋ ءۇشىن 100 ميلليارد تەڭگە بولىنەدى.
«تاعى ءبىر ماڭىزدى مىندەت - ازىق- تۇلىك قاۋىپسىزدىگىن قامتاماسىز ەتۋ. ءۇش جىلدا اگروونەركاسىپ كەشەنىندەگى وڭدەلگەن ءونىم ۇلەسىن 70 پايىزعا جەتكىزۋ قاجەت. بۇل جۇمىستى ۇكىمەت بيزنەس وكىلدەرىمەن بىرلەسىپ اتقارۋعا ءتيىس»، - دەدى قاسىم- جومارت توقايەۆ.
پرەزيدەنت وسى سالانىڭ يمپورتقا تاۋەلدىلىگىن ازايتۋ ءۇشىن ءىرى ينۆەستيتسيالىق جوبالار قولعا الىنىپ جاتقانىن ايتتى.
«الداعى ۋاقىتتا ءسۇت ونىمدەرىن شىعاراتىن 115 فەرما سالىنادى. ولار جىل سايىن 600 مىڭ تونناعا دەيىن ءونىم بەرەتىن بولادى. سونداي- اق 15 ءىرى قۇس فابريكاسى ىسكە قوسىلادى. بۇل كاسىپورىندار جىلىنا 120 مىڭ توننا ەت وندىرەدى. مۇنىڭ ءبارى جالاڭ سيفر ەمەس، بۇل - ناقتى مىندەتتەر. ءاربىر ءىرى جوبا اۋىل حالقىنىڭ تۇرمىس ساپاسىن جاقسارتۋعا تىكەلەي اسەر ەتەدى. ايماقتاردى دامىتۋعا مول مۇمكىندىك بەرەدى. مەن بۇل ماسەلەگە ءاردايىم باسا ءمان بەرەتىنىمدى بىلەسىزدەر»، - دەدى مەملەكەت باسشىسى.
پرەزيدەنت اسا ماڭىزدى مىندەتتەردىڭ ءبىرى اۋىلدى جان- جاقتى دامىتۋعا قاتىستى ەكەنىن اتاپ ءوتتى.
«سەبەبى، اۋىلدى دامىتۋ - تۇپتەپ كەلگەندە، بۇكىل قازاقستاندى دامىتۋ دەگەن ءسوز. سوندىقتان بيىل ءبىز «اۋىل اماناتى» جوباسىن باستادىق. اۋىل تۇرعىندارىنا شاعىن نەسيە بەرۋ ءۇشىن 100 ميلليارد تەڭگە بولىنەدى. سونىڭ ارقاسىندا 18 مىڭنان استام جاڭا جۇمىس ورنى اشىلادى. كەلەسى جىلدان باستاپ بيزنەستى دامىتۋعا ارنالعان ءبىرىڭعاي كەشەندى باعدارلاما قولعا الىنادى. بولاشاعى بار شاعىن جانە ورتا بيزنەسكە باسىمدىق بەرىلەدى. ياعني مەملەكەت وندىرىستىك قابىلەتى جوعارى جانە ەكسپورتقا ءونىم شىعاراتىن كاسىپكەرلەرگە قولداۋ كورسەتەدى»، - دەدى قاسىم- جومارت توقايەۆ.
اۆتور
رۋسلان عابباسوۆ
