ساۋدا مينيسترلىگى: ا ق ش تاريفتەرى قازاقستان ەكسپورتىنىڭ 4,8 پايىزىنا عانا اسەر ەتەدى
استانا. KAZINFORM - ساۋدا جانە ينتەگراتسيا مينيسترلىگى ا ق ش-تىڭ قوسىمشا تاريفتەرىن ەنگىزۋ ماسەلەسى بويىنشا تۇسىنىكتەمە جاسادى.
مينيسترلىكتىڭ مالىمەتىنشە، قازاقستان ا ق ش تاراپىنان قوسىمشا تاريفتەر ەنگىزۋ ماسەلەسىنە بايلانىستى كەلىسسوزدەردى جالعاستىرىپ جاتىر. وسى ۇدەرىس اياسىندا بيىل ماۋسىم ايىندا ق ر ساۋدا جانە ينتەگراتسيا مينيسترلىگىنىڭ وكىلدەرى ا ق ش تاراپىمەن ەكىجاقتى كەزدەسۋ وتكىزدى. قازاقستان ا ق ش-قا ءوزارا ءتيىمدى ساۋدا ىنتىماقتاستىعىن دامىتۋ، تاۋار جەتكىزۋ تىزبەكتەرىن تۇراقتى ساقتاۋ جانە نارىققا ءادىل قول جەتكىزۋ شارتتارىن قامتاماسىز ەتۋ ماسەلەلەرىن قامتيتىن رەسمي ۇسىنىس جولدادى. بۇل ۇسىنىس ا ق ش پرەزيدەنتى د. ترامپتىڭ 2025 -جىلعى 2 -ساۋىردەگى جارلىعى مەن وعان ەنگىزىلگەن كەيىنگى وزگەرىستەردى ەسكەرە وتىرىپ ازىرلەنگەن.
- كەلىسسوزدەر بارىسىندا تاراپتار ساۋدا-ەكونوميكالىق قاتىناستار بويىنشا كەڭەيتىلگەن ەكىجاقتى ديالوگ اياسىندا ۇسىنىلعان باستامالاردى جان-جاقتى قاراستىرىپ وتىر. قازاقستان تاراپى سىندارلى ىنتىماقتاستىققا بەيىل ەكەنىن راستايدى. قارسى تاراپ تا كەلىسسوزدەردى جالعاستىرۋعا اشىق. بۇل ءوز كەزەگىندە ءوزارا ءتيىمدى ءارى ەكى ەلدىڭ مۇددەلەرىنە ساي كەلەتىن شەشىمدەردى ازىرلەۋگە مۇمكىندىك بەرەدى. بۇعان دەيىن حابارلانعانداي، ەنگىزىلگەن تاريف شارالارى ا ق ش- قا قازاقستاننان جەتكىزىلەتىن جالپى ەكسپورت كولەمىنىڭ نەبارى %4,8- ىنا عانا اسەر ەتەدى، ال قالعان %95,2- ى جاڭا كەدەندىك باجدان تىس قالادى. قازىرگى ۋاقىتتا قازاقستان ا ق ش- قا مۇناي، ۋران، كۇمىس، فەرروقورىتپالار، تانتال، تيتان، بەريللي جانە وزگە دە ءونىم تۇرلەرىن ەكسپورتتايدى. بۇل ونىمدەردىڭ باسىم بولىگى جاڭا تاريفتىك رەتتەۋگە جاتپايدى جانە شەكتەۋسىز ەكسپورتتالىپ جاتىر، - دەپ ءتۇسىندىردى ۆەدومستۆو.
ساۋدا جانە ينتەگراتسيا مينيسترلىگىنىڭ باسپا ءسوز قىزمەتى اتاپ وتكەندەي، جاڭا تاريفتەردىڭ ىقپالى سارى فوسفور، فەرروسيليتسي، لينزالار، بيداي گليۋتەنى جانە امموني نيتراتى سىندى تاۋارلارعا تيەدى.
ايتا كەتەيىك، 2025 -جىلدىڭ ءبىرىنشى جارتى جىلدىعىندا ا ق ش- قا سارى فوسفور ەكسپورتى 2,2 مىڭ توننانى قۇرادى (جالپى ءوندىرىس كولەمى 43 مىڭ توننا). فەرروسيليتسي بويىنشا ەكسپورت كولەمى 1482,6 توننا (جالپى ءوندىرىس 41830,1 توننا). امموني نيتراتى (اممياك سەليتراسى) بويىنشا ا ق ش- قا تاسىمال جوق، 2025 -جىلعا ەكسپورت جوسپارلانباعان. بيداي گليۋتەنى (گليۋتەن) بويىنشا 2025 -جىلدىڭ العاشقى التى ايىندا ا ق ش- قا 6500 توننا ءونىم جونەلتىلدى (شامامەن 8,12 ميلليون ا ق ش دوللارى).
وسىدان بۇرىن 7 -شىلدەدە دونالد ترامپ Truth Social الەۋمەتتىك جەلىسىندە قازاقستان پرەزيدەنتى قاسىم-جومارت توقايەۆقا جولداعان حاتتى جاريالاپ، ا ق ش- تىڭ 1 -تامىزدان باستاپ قازاقستاننان كەلەتىن بارلىق يمپورتقا 25 پايىزدىق كەدەندىك باج سالىعىن ەنگىزەتىنىن حابارلادى.
بۇگىننەن باستاپ ا ق ش پرەزيدەنتى دونالد ترامپ ءبىرقاتار ەلگە، سونىڭ ىشىندە قازاقستانعا دا جاڭا كەدەندىك باج سالىعىن ەنگىزدى.
تىزىمدە 70-كە جۋىق مەملەكەت پەن ەۋروپالىق وداق اتالعان. يمپورتتىق باج سالىعىنىڭ كولەمى 10-نان 41 پايىزعا دەيىن وزگەرەدى. ەڭ جوعارى تاريفتەردىڭ كەيبىرى سيرياعا (41) ، لاوس پەن ميانماعا (40) جانە شۆەيتسارياعا (39 پايىز) بەلگىلەنگەن. قازاقستان ءۇشىن بۇل كورسەتكىش 25 پايىز.
