پرەزيدەنتكە ناۋرىز مەيرامىنا وراي قۇتتىقتاۋ جەدەلحاتتارى كەلىپ جاتىر

Си Цзиньпин, Байден, Эрдоган поздравили Казахстан с Наурыз мейрамы
Коллаж: akorda.kz/wikipedia.org/instagram.com/joebiden

استانا. KAZINFORM - مەملەكەت باسشىسىنىڭ اتىنا ناۋرىز مەيرامىنا وراي شەت مەملەكەتتەردىڭ باسشىلارى مەن حالىقارالىق ۇيىمداردىڭ جەتەكشىلەرىنەن قۇتتىقتاۋلار كەلىپ جاتىر.

قىتاي حالىق رەسپۋبليكاسىنىڭ ءتوراعاسى شي جينپيڭ قاسىم-جومارت توقايەۆ پەن قازاقستاندىقتاردى ناۋرىز مەيرامىمەن قۇتتىقتادى.

- مەن قازاق- قىتاي بايلانىستارىن دامىتۋعا باسا ءمان بەرەمىن. ەكى ەل اراسىنداعى ءداستۇرلى دوستىقتى نىعايتۋعا نەگىزدەلگەن ءوزارا ءتيىمدى جانە جان- جاقتى ىنتىماقتاستىقتى كەڭەيتۋ ءۇشىن سىزبەن كۇش-جىگەر بىرىكتىرۋگە دايىنمىن، - دەپ جازىلعان جەدەلحاتتا.

ا ق ش پرەزيدەنتى دجوزەف بايدەن قۇتتىقتاۋىندا ەلدەرىمىزدىڭ كليماتتىق داعدارىس، ەنەرگەتيكالىق قاۋىپسىزدىك جانە ەكولوگيا ماسەلەلەرىن شەشۋ ىسىندەگى كەيىنگى جىلدارى قول جەتكىزگەن تابىستارىن ماقتان تۇتاتىنىن اتاپ وتكەن.

- بۇل ىنتىماقتاستىق ۇرپاق بولاشاعىن جارقىن ەتۋگە سەپتىگىن تيگىزەدى. ءۇمىت پەن جاڭارۋدىڭ نىشانى بولىپ سانالاتىن ناۋرىزدا ەلدەرىمىزدىڭ اراسىنداعى سەرىكتەستىك پەن حالىقتارىمىزدىڭ دوستىعى ودان ءارى نىعايا بەرەتىنىنە سەنىمدىمىن، - دەلىنگەن جەدەلحاتتا.

تۇركيا پرەزيدەنتى رەجەپ تايپ ەردوعان قۇتتىقتاۋىندا ناۋرىزدىڭ جاقسىلىق پەن مولشىلىقتىڭ مەيرامى ەكەنىنە نازار اۋدارعان.

- ورتاق مادەنيەتىمىزدىڭ ماڭىزدى بولىگى سانالاتىن وسى ايتۋلى كۇندە دوستىق پەن باۋىرلاستىق بايلانىستارىمىز ودان ءارى نىعايا تۇسەرىنە سەنىم بىلدىرەمىن، - دەپ جازىلعان جەدەلحاتتا.

وزبەكستان پرەزيدەنتى شاۆكات ميرزيەۆ ءوز قۇتتىقتاۋىندا باۋىرلاس حالىقتار بۇل مەيرامدى مىڭداعان جىلدان بەرى سالتاناتتى تۇردە ءارى كەڭ كولەمدە تويلاپ كەلە جاتقانىن ايتتى.

- ءوزارا سەنىمگە، قۇرمەت پەن ورتاق مۇددەگە نەگىزدەلگەن باۋىرلاس جانە كورشىلەس ەكى ەل اراسىنداعى ىنتىماقتاستىق ودان ءارى نىعايىپ، قارقىندى تۇردە دامي بەرەتىنىنە سەنىمدىمىن، - دەپ جازىلعان جەدەلحاتتا.

قىرعىزستان پرەزيدەنتى سادىر جاپاروۆ قۇتتىقتاۋ جەدەلحاتىندا كونەدەن كەلە جاتقان ناۋرىز مەيرامى قىرعىز بەن قازاق حالىقتارىنىڭ تاريحى مەن قۇندىلىقتارىنىڭ ورتاق ەكەنىن بىلدىرەتىنىن اتاپ وتكەن.

- الداعى ۋاقىتتا جۇزەگە اسىرىلاتىن ەكىجاقتى ءىس-شارالاردىڭ ناتيجەلەرى ەلدەرىمىز اراسىنداعى ساياسي ديالوگتىڭ جوعارى دەڭگەيدە ەكەنىن ناقتىلاپ، قىرعىز-قازاق ىنتىماقتاستىعىن ودان ءارى نىعايتۋعا ىقپال ەتەتىنىنە سەنىم بىلدىرەمىن، - دەپ جازىلعان جەدەلحاتتا.

تاجىكستان پرەزيدەنتى ەمومالي راحمون قۇتتىقتاۋ جەدەلحاتىندا مىڭداعان جىلدان بەرى ادامزاتقا جول سىلتەپ كەلە جاتقان بەرەكەلى ناۋرىزدىڭ كونە عۇرىپتارى مەن باي رۋحاني تاعىلىمى قازىر دە ادامدارعا شاتتىق سىيلايتىنىن ايتقان.

- ناۋرىز مەرەكەسىنىڭ يگى داستۇرلەرى ەلدەرىمىز اراسىنداعى دوستىق پەن سان قىرلى ىنتىماقتاستىقتى نىعايتۋعا سەپتىگىن تيگىزەدى. سونداي-اق ءوزارا ىقپالداستىعىمىز ستراتەگيالىق سەرىكتەستىك پەن وداقتاستىق اياسىندا ودان ءارى كەڭەيە بەرەتىنىنە سەنىمدىمىن، - دەپ جازىلعان جەدەلحاتتا.

تۇرىكمەنستان پرەزيدەنتى سەردار بەردىمۇحامەدوۆ قۇتتىقتاۋىندا الەمنىڭ كوپتەگەن ەلىندە كەڭىنەن تويلاناتىن وسى عاجاپ مەرەكە كوكتەمنىڭ كەلۋى مەن تابيعاتتىڭ قايتا تۇلەۋىن بىلدىرەتىنىن جەتكىزگەن.

- ناۋرىزدىڭ بارشاعا ءمالىم داستۇرلەرى مەن مادەني ادەت-عۇرپى ىنتىماقتاستىق پەن ءوزارا تۇسىنىستىكتى دارىپتەيدى. بۇل قۇندىلىقتار قازىرگى كەزەڭدە ەڭ وزەكتى ماسەلە سانالادى جانە حالىقتارىمىز اراسىنداعى بەيبىتشىلىك پەن دوستىقتى نىعايتۋعا ىقپال ەتەدى، - دەپ جازىلعان جەدەلحاتتا.

ازەربايجان پرەزيدەنتى يلحام اليەۆ قۇتتىقتاۋ جەدەلحاتىندا كوكتەمگى كوتەرىڭكى كوڭىل-كۇي سىيلايتىن ناۋرىز مەرەكەسىنىڭ ەجەلگى داستۇرلەرىنىڭ ساقتالۋى سان عاسىرلىق مادەني مۇرامىزعا كورسەتكەن قۇرمەتىمىزدىڭ ءبىر بەلگىسى سانالاتىنىن جازعان.

- جۋىردا ازەربايجانعا جاساعان مەملەكەتتىك ساپارىڭىزدى، شىنايى جانە ءوزارا سەنىم جاعدايىندا وتكەن كەزدەسۋىمىزدى، ەكىجاقتى قارىم-قاتىناستاردىڭ بارلىق سالاسى مەن ىنتىماقتاستىعىمىزدىڭ پەرسپەكتيۆاسى بويىنشا جۇرگىزگەن جان- جاقتى كەلىسسوزدەرىمىزدى زور ريزاشىلىقپەن ەسكە الامىن. الداعى ۋاقىتتا دا ازەربايجان مەن قازاقستاننىڭ دوستىعىن، باۋىرلاستىعىن ودان ءارى نىعايتۋعا بار كۇش- جىگەرىمىزدى جۇمسايتىنىمىزعا سەنىمدىمىن، - دەپ جازىلعان جەدەلحاتتا.

يران يسلام رەسپۋبليكاسىنىڭ پرەزيدەنتى يبراحيم رايسي قۇتتىقتاۋ جەدەلحاتىندا ناۋرىز مەرەكەسىن بەيبىتشىلىك پەن تاتۋلىقتىڭ، دوستىق پەن ىنتىماقتىڭ سيمۆولى دەپ اتاپ وتكەن.

- كۇن مەن ءتۇن تەڭەلىپ، تابيعاتتىڭ جاڭعىرۋىمەن ادامداردىڭ بويىندا ىزگى قاسيەتتەر قالىپتاسادى. وسى ارقىلى ادامزات جات قىلىقتان ارىلىپ، قوعامىمىز كەمەلدەنە تۇسەدى، - دەلىنگەن جەدەلحاتتا.

سونىمەن قاتار ءوز قۇتتىقتاۋلارىن تۇرىكمەنستان حالك ماسلاحاتىنىڭ ءتوراعاسى گۋربانگۋلى بەردىمۇحامەدوۆ، ۇ ق ش ۇ باس حاتشىسى يمانعالي تاسماعامبەتوۆ، ەكونوميكالىق ىنتىماقتاستىق ۇيىمىنىڭ باس حاتشىسى حۋسراۆ نوزيري، تۇركى مەملەكەتتەرى ۇيىمىنىڭ باس حاتشىسى كۋبانىچبەك ومىراليەۆ، تۇركسوي ۇيىمىنىڭ باس حاتشىسى سۇلتان رايەۆ جانە وزگە دە حالىقارالىق ۇيىمداردىڭ، كومپانيالاردىڭ، وقۋ ورىندارىنىڭ باسشىلارى مەن باسقا دا رەسمي تۇلعالار جولدادى. قۇتتىقتاۋلار ءالى دە كەلىپ ءتۇسىپ جاتىر.

اۆتور

ابىلايحان جۇماشيەۆ

سوڭعى جاڭالىقتار