پرەزيدەنت يتاليانىڭ جوعارى وقۋ ورىندارىن قازاقستاندا فيليالىن اشۋعا شاقىردى
استانا. KAZINFORM - مەملەكەت باسشىسى قاسىم-جومارت توقايەۆ يتاليانىڭ جوعارى وقۋ ورىندارىن ەلىمىزدە فيليالدارىن اشۋدى ۇسىندى.
- ءبىزدىڭ ستراتەگيالىق سەرىكتەستىگىمىزدىڭ ماڭىزدى ەلەمەنتتەرىنىڭ ءبىرى - ەۋروپاداعى ءبىلىم بەرۋ سالاسىنداعى ىنتىماقتاستىق. قازىر شامامەن 4 مىڭعا جۋىق قازاقستاندىق ستۋدەنت يتاليادا ءبىلىم الىپ جاتىر. ءبىزدىڭ ستۋدەنتتەرگە ۇزدىك ۋنيۆەرسيتەتتەردە ءبىلىم الۋعا مۇمكىندىك بەرەتىن گرانتتار مەن شاكىرتاقىلار ۇسىنعانى ءۇشىن يتاليا ۇكىمەتىنە العىس ايتامىن. وسى مۇمكىندىكتى پايدالانا وتىرىپ، يتالياندىق تەحنيكالىق جوعارى وقۋ ورىندارىن قازاقستاندا ءوز فيليالدارىن اشۋعا شاقىرعىم كەلەدى. ءبىز اسىرەسە جاساندى ينتەللەكت ينجەنەرلەرىن دايارلاۋعا ەرەكشە نازار اۋدارىپ وتىرمىز، - دەدى قاسىم-جومارت توقايەۆ ەلوردادا ءوتىپ جاتقان «ورتالىق ازيا - يتاليا» ءبىرىنشى سامميتىندە.
پرەزيدەنتتىڭ مالىمدەۋىنشە، تەحنوپاركتەر مەن جاساندى ينتەللەكت تەحنولوگيالارىن دامىتۋعا باسىمدىق بەرىلەدى.
- بۇعان دالەل رەتىندە ەلىمىزدە يتاليان مادەنيەتى ينستيتۋتىنىڭ فيليالىنىڭ اشىلۋىن ايتۋعا بولادى. قازىر ەلىمىزدە جاساندى ينتەللەكت سالاسى بويىنشا مامانداردى دايارلاۋ باعدارلاماسى جۇزەگە اسىرىلىپ جاتىر، - دەيدى ق. توقايەۆ.
ايتا كەتەيىك، ەلوردادا «ورتالىق ازيا - يتاليا» ءبىرىنشى سامميتى ءوتىپ جاتىر. وعان قازاقستان پرەزيدەنتى قاسىم-جومارت توقايەۆ، يتاليا مينيسترلەر كەڭەسىنىڭ ءتوراعاسى دجوردجا مەلوني، قىرعىزستان پرەزيدەنتى سادىر جاپاروۆ، وزبەكستان پرەزيدەنتى شاۆكات ميرزيەۆ، تۇرىكمەنستان پرەزيدەنتى سەردار بەردىمۇحامەدوۆ، تاجىكستان پرەزيدەنتى ەمومالي راحمون قاتىسىپ جاتىر.
يتاليا ورتالىق ازيا ەلدەرىنىڭ تۇراقتى دامۋىندا سەنىمدى سەرىكتەس ەكەنىن دالەلدەدى.
- ەجەلدەن ورتالىق ازيا شىعىس پەن باتىس اراسىنداعى كوپىر قىزمەتىن اتقارىپ، وركەنيەتارالىق ديالوگتى دامىتۋدا ماڭىزدى ءرول اتقاردى. قازىر ءوڭىرىمىز بۇرىن-سوڭدى بولماعان بىرلىك پەن تاتۋ كورشىلىك پەن جالپىعا ورتاق پروگرەسس قاعيداتتارىنا بەرىك تاباندىلىعىن تانىتىپ وتىر. ورتالىق ازيا حالىقارالىق ارەنادا سىندارلى كۇن ءتارتىبىن العا جىلجىتا وتىرىپ، حالىقارالىق قاتىناستارداعى ىقپالدى ويىنشى رەتىندە ءوز ۇستانىمىن دايەكتى تۇردە نىعايتىپ كەلەدى. بۇل گەوساياسي شيەلەنىستەردىڭ كۇشەيۋى مەن جاھاندىق ساۋدا قاراما-قايشىلىقتارى اياسىندا ەرەكشە ماڭىزدى، - دەدى قاسىم- جومارت توقايەۆ.
پرەزيدەنتتىڭ ايتۋىنشا، يتاليا دامىعان ەكونوميكاسى، قۋاتتى ونەركاسىپتىك الەۋەتى جانە كوپتەگەن سالالارداعى وزىق تەحنولوگيالارى بار ەل رەتىندە جەتەكشى يندۋسترياالدى دەرجاۆا سانالادى.
- وتىز جىلدان استام ۋاقىت ىشىندە يتاليا ورتالىق ازيا ەلدەرىنىڭ تۇراقتى دامۋىنا تولىق ۇلەس قوسىپ، سەنىمدى سەرىكتەس ەكەنىن دالەلدەدى. «ورتالىق ازيا پليۋس» فورماتىنداعى ءبىزدىڭ مۇمكىندىكتەرىمىزدىڭ سينەرگەتيكاسى ءوڭىر مەملەكەتتەرى مەن يتاليا اراسىنداعى ءوزارا ءتيىمدى ىنتىماقتاستىقتى كەڭەيتۋ ءۇشىن قۋاتتى سەرپىن جاسايتىنىنا سەنىمدىمىن، - دەدى مەملەكەت باسشىسى.
بۇدان بۇرىن حابارلانعانداي، ەلورداداعى تاۋەلسىزدىك سارايىندا مەملەكەت باسشىسى قاسىم-جومارت توقايەۆتىڭ قاتىسۋىمەن «ورتالىق ازيا - يتاليا» العاشقى سامميتى ءوتىپ جاتىر.
ايتۋلى ءىس-شاراعا قۇرمەتتى مەيمانداردان يتاليا مينيسترلەر كەڭەسىنىڭ ءتوراعاسى دجوردجا مەلوني، قىرعىزستان پرەزيدەنتى سادىر جاپاروۆ، وزبەكستان پرەزيدەنتى شاۆكات ميرزيەۆ، تۇرىكمەنستان پرەزيدەنتى سەردار بەردىمۇحامەدوۆ، تاجىكستان پرەزيدەنتى ەمومالي راحمون قاتىسىپ وتىر.
اۆتور
رۋسلان عابباسوۆ
