پرەزيدەنت وقۋ-اعارتۋ ءمينيسترى عاني بەيسەمبايەۆتى قابىلدادى

استانا. KAZINFORM - قاسىم-جومارت توقايەۆ وقۋ-اعارتۋ ءمينيسترى عاني بەيسەمبايەۆتى قابىلدادى، دەپ حابارلادى اقوردانىڭ باسپا ءسوز قىزمەتى.

عاني بەيسەمبايەۆ ەلىمىزدەگى مەكتەپكە دەيىنگى، ورتا، تەحنيكالىق جانە كاسىپتىك ءبىلىم بەرۋ سالالارىن دامىتۋ ماقساتىندا قابىلدانىپ جاتقان شارالار جونىندە مالىمەت بەردى.

ونىڭ ايتۋىنشا، بىلتىر 137 مىڭ وقۋشىعا ارنالعان 154 جاڭا مەكتەپ اشىلعان. بۇل 29 ءۇش اۋىسىمدى، 12 اپاتتى مەكتەپتىڭ ماسەلەسىن شەشكەن. جاڭا وقۋ جىلىندا 365 مىڭ وقۋشىعا ەسەپتەلگەن 221 ءبىلىم وشاعىن پايدالانۋعا بەرۋ جوسپارلانىپ وتىر.

سونىمەن قاتار مەكتەپتەردى پاندىك كابينەتتەرمەن جابدىقتاۋ كورسەتكىشى 2 ەسە ارتىپ، ينتەرنەتتىڭ ساپاسى جاقسارعان. تاربيە جۇمىستارى باسىم باعىتتاردىڭ ءبىرى بولىپ قالا بەرەدى. «ادال ادام - ادال ەڭبەك - ادال تابىس» جالپىۇلتتىق قۇندىلىقتارىنا نەگىزدەلگەن «ءبىرتۇتاس تاربيە» باعدارلاماسى قولعا الىنعان.

مينيستر ورتا ءبىلىم ساپاسىن ارتتىرۋ تۋرالى ايتتى. ايتۋىنشا، مەكتەپ وقۋلىقتارى تولىقتاي سيفرلىق فورماتقا كوشىرىلگەن. قازاقستان اتىنان حالىقارالىق وليمپيادالارعا قاتىسقان ءاربىر ەكىنشى وقۋشى جۇلدەلى ورىندارعا يە بولىپ ءجۇر. بىلتىر ەل وقۋشىلارى 58 التىن مەدال جەڭىپ العان.

مينيستر تەحنيكالىق جانە كاسىپتىك ءبىلىم بەرۋ جۇيەسىن ترانسفورماتسيالاۋ، ينكليۋزيۆتى جانە ارنايى وقىتۋدى دامىتۋ جونىندەگى جوبالاردى تانىستىردى.

مەملەكەت باسشىسى وقۋ-اعارتۋ مينيسترىنە سالانى ودان ءارى جەتىلدىرۋ جانە بالالاردىڭ قاۋىپسىزدىگىن قامتاماسىز ەتۋ بويىنشا ءبىرقاتار تاپسىرما بەردى.

اۆتور

ەلميرا ورالبايەۆا