پرەزيدەنت رەسپيراتور مەن گازتۇتقى شىعاراتىن زاۋىتقا باردى
استانا. KAZINFORM - مەملەكەت باسشىسى قاسىم-جومارت توقايەۆ MFA International كومپانياسىنىڭ ەلورداداعى كاسىپورنىن ارالاپ كوردى، دەپ حابارلايدى اقوردانىڭ باسپا ءسوز قىزمەتى.
بۇل - يندۋستريالىق رەسپيراتور مەن گازتۇتقى شىعارۋدا تۇركياداعى ەڭ ءىرى جانە ەۋروپاداعى ۇشتىككە ەنەتىن كومپانيا.
2020 -جىلى پاندەميانىڭ شارىقتاۋ شاعىندا MFA Maske كومپانياسى قىزمەت اۋماعىن كەڭەيتۋ جونىندە شەشىم قابىلداپ، قازاقستانعا ينۆەستيتسيا قۇيعان بولاتىن.
استانادا مەديتسينالىق، ونەركاسىپتىك رەسپيراتورلار، گازعا قارسى ۋلانۋدان، سونداي-اق حيميالىق، بيولوگيالىق، راديولوگيالىق جانە يادرولىق قاتەردەن ساقتايتىن گازتۇتقى شىعاراتىن زاۋىت قۇرىلىسىن باستادى. جوبا قۇنى - 10 ميلليون دوللار. كومپانيانىڭ جەكە ينۆەستيتسياسى ەسەبىنەن سالىنىپ جاتىر.
وسىعان دەيىن قاسىم-جومارت توقايەۆتىڭ بەكزات ساتتارحانوۆ اتىنداعى سپورت كەشەنىن ارالاپ كورگەنى تۋرالى جازدىق.
