پرەزيدەنت پرەمەر-مينيستر ولجاس بەكتەنوۆتى قابىلدادى

استانا. KAZINFORM - مەملەكەت باسشىسى پرەمەر- مينيستر ولجاس بەكتەنوۆتى قابىلدادى، دەپ حابارلايدى اقوردانىڭ باسپا ءسوز قىزمەتى.

ولجاس بەكتەنوۆ ەلىمىزدىڭ الەۋمەتتىك- ەكونوميكالىق جاعدايى، ەگىن وراعى جانە سۋ تاسقىنىنان زارداپ شەككەن وڭىرلەردەگى تۇرعىن ۇيلەردى قالپىنا كەلتىرۋ جۇمىستارى تۋرالى باياندادى.

ونىڭ ايتۋىنشا، بيىل وڭدەۋ ونەركاسىبى جانە قۇرىلىس سالاسى ەكونوميكالىق دامۋدىڭ نەگىزگى فاكتورىنا اينالدى؛

- اۋىل شارۋاشىلىعىندا دا ايتارلىقتاي ءوسىم بار. ەلىمىزدەگى نەگىزگى ءداندى داقىلدار القابىنىڭ 4,5 ميلليون گەكتارعا جۋىعى نەمەسە 27 پايىزى جينالعان؛

- ورتا ەسەپپەن ءبىر گەكتاردان 15 سەنتنەر ءونىم الىنىپ وتىر. شامامەن 6,6 ميلليون توننا استىق باستىرىلدى. بۇل بىلتىرعى كورسەتكىشتەن 40 پايىزعا ارتىق؛

- شارۋاشىلىقتارعا ارزانداتىلعان ديزەل وتىنىن جەتكىزۋ كەستەگە ساي جۇرگىزىلىپ جاتىر.

ول سۋ تاسقىنىنان زارداپ شەككەن تۇرعىنداردى باسپانامەن قامتۋ جونىندە مالىمەت بەردى. ايتۋىنشا، بۇگىنگە دەيىن 7463 وتباسى جاڭا قونىسقا كوشتى. 479 باسپانانىڭ قۇرىلىسى اياقتالۋعا جاقىن. سونىمەن قاتار 9171 وتباسىنا جوندەۋ جۇمىستارى ءۇشىن وتەماقى تولەندى.

كەزدەسۋ سوڭىندا مەملەكەت باسشىسى جۇرگىزىلىپ جاتقان جۇمىستىڭ ماڭىزىن اتاپ ءوتىپ، ەلىمىزدى ودان ءارى الەۋمەتتىك-ەكونوميكالىق تۇرعىدان دامىتۋعا قاتىستى ءبىرقاتار تاپسىرما بەردى.

اۆتور

ەلميرا ورالبايەۆا