پرەزيدەنت «قورقىت اتا» اۋەجايىنىڭ جاڭا تەرمينالىمەن تانىستى

مەملەكەت باسشىسى قاسىم- جومارت توقايەۆ قىزىلوردادا «قورقىت اتا» اۋەجايىنىڭ جاڭا تەرمينالىمەن تانىستى.

وبلىس اكىمى نۇرلىبەك نالىبايەۆ پرەزيدەنتكە جاڭا جولاۋشىلار تەرمينالىنىڭ قۇرىلىسى جونىندە باياندادى:

- جاڭا تەرمينال جەكە دەمەۋشىنىڭ قاراجاتىنا سالىنىپ، كەيىن مەملەكەت مەنشىگىنە وتكىزىلەدى؛

- جوبا قۇنى - 20 ميلليارد تەڭگە. ونىڭ ىشىندە 15,7 ميلليارد تەڭگە - دەمەۋشىنىڭ اۋەجاي قۇرىلىسى ءۇشىن بولگەن قارجىسى. سونداي- اق جەرگىلىكتى بيۋدجەتتەن اۋەجايدىڭ سىرتقى ينجەنەرلىك- كوممۋنيكاتسيالىق ينفراقۇرىلىمىن جۇرگىزۋ ءۇشىن 4,3 ميلليارد تەڭگە قارجى بولىنگەن؛

- حالىقارالىق ستاندارتقا ساي بولاتىن اۋەجايدا جولاۋشىلارعا قىزمەت كورسەتۋ ءۇشىن بارلىق جاعداي جاسالادى؛

- جاڭا تەرمينال كەلەسى جىلى پايدالانۋعا بەرىلەدى. نىسان قولدانىسقا بەرىلگەننەن كەيىن جولاۋشىلار تاسىمالى ءبىر ساعاتتا 250 جولاۋشىعا قىزمەت كورسەتە الادى؛

- ءتۇرلى باعىتتارعا ۇشاتىن اۋە رەيستەرىنىڭ سانى ارتادى.

بۇدان بولەك، وبلىس اكىمى قىزىلوردا قالاسىندا زاماناۋي ۇلگىدە سالىنىپ جاتقان اۆتوبەكەتتىڭ بيىل جىل سوڭىندا ىسكە قوسىلاتىنىن جانە قالانىڭ تەمىرجول ۆوكزالىنا دا كۇردەلى جوندەۋ جۇمىستارى جۇرگىزىلىپ جاتقانىن جەتكىزدى.

ەسكە سالايىق، بۇگىن تاڭەرتەڭ مەملەكەت باسشىسى قىزىلوردا وبلىسىنا جۇمىس ساپارىمەن باردى.

قاسىم- جومارت توقايەۆتىڭ وڭىرگە ساپارى سىرداريا اۋدانى ناعي ءىلياسوۆ اۋىلىنىڭ تىنىس- تىرشىلىگىمەن تانىسۋدان باستالدى.

ودان ءارى پرەزيدەنت بىلتىر بوي كوتەرگەن «ەڭبەك اللەياسىندا» ەڭبەك ادامدارىمەن جۇزدەستى.

اۆتور

گۇلميرا الياكپاروۆا