پرەزيدەنت «قازاقستان تەمىر جولى» ۇ ك» ا ق باسقارما ءتوراعاسى نۇرلان ساۋرانبايەۆتى قابىلدادى

استانا. KAZINFORM - قاسىم-جومارت توقايەۆقا ۇلتتىق كومپانيانىڭ بىلتىر اتقارعان جۇمىسى تۋرالى ەسەپ بەرىلدى.

«ق ت ج» ۇ ك» ا ق باسقارما ءتوراعاسىنىڭ ايتۋىنشا، نەگىزگى وندىرىستىك كورسەتكىشتەردە ءوسىمنىڭ وڭ قارقىنى ساقتالىپ وتىر. ەكسپلۋاتاتسيالىق جۇك اينالىمى 272 ميلليارد توننا-شاقىرىمدى قۇرادى. قازاقستان-قىتاي تۇيىسپەلەرى ارقىلى 32 ميلليون توننا جۇك تاسىمالداندى. بۇل - رەكوردتىق ءارى 2023 -جىلمەن سالىستىرعاندا 13,1 پايىزعا ارتىق كورسەتكىش. كونتەينەرلىك ترانزيت 8,8 پايىزعا ءوستى. تاسىمالدانعان كونتەينەرلەر سانى 1,4 ميلليون جيىرما پۇتتىق ەكۆيۆالەنتتى قۇرادى.

پرەزيدەنتكە ءىرى ينفراقۇرىلىمدىق جوبالاردىڭ ىسكە اسىرىلۋ بارىسى جانە ترانزيت الەۋەتىن دامىتۋ جونىندە بەرگەن تاپسىرمالارىنىڭ ورىندالۋى جايىندا باياندالدى. نۇرلان ساۋرانبايەۆتىڭ ايتۋىنشا، 2800 شاقىرىمنان استام تەمىر جولعا جوندەۋ جۇمىستارى جۇرگىزىلگەن. دوستىق - مويىنتى، داربازا - ماقتاارال باعىتتارىندا جانە الماتى تورابىنىڭ اينالما جولىندا 1000 شاقىرىمنان استام جاڭا جەلى سالىنىپ جاتىر. دوستىق - مويىنتى ۋچاسكەسى جانە جەتىگەن - قازىبەك- بەك اينالما جەلىسىنىڭ ەكىنشى جولدارىن سالۋ جۇمىستارى كەستەدەگى مەرزىمىنەن بۇرىن، ياعني بيىل اياقتالادى.

مەملەكەت باسشىسىنا قازاقستاندىق دالىزدەرگە جۇك اعىندارىن تارتۋ ءۇشىن تەرمينال جەلىسىنىڭ كەڭەيىپ جاتقانى تۋرالى مالىمەت بەرىلدى. شيان قالاسىنىڭ قۇرعاق پورتىندا قازاقستان-قىتاي تەرمينالى ىسكە قوسىلدى. بۇل ترانس كاسپي باعىتى ارقىلى قىتايدان كەلەتىن تاسىمالدىڭ ۇلعايۋىنا ىقپال ەتتى. الماتى قالاسىندا، ازەربايجاننىڭ اليات تەڭىز پورتىندا، ماجارستان استاناسى بۋداپەشت قالاسىندا، ماسكەۋ ماڭىنداعى سەلياتينو كەنتىندە شىعىس - باتىس باعىتى بويىنشا تەرمينالداردىڭ قۇرىلىسى باستالدى. قىتايلىق سەرىكتەس ليانيۋنگان پورتىمەن بىرلەسىپ، اقتاۋ پورتىندا كونتەينەرلىك حاب سالۋ جۇمىستارى قولعا الىندى.

سونىمەن قاتار مەملەكەت باسشىسى قولداۋ بىلدىرگەن ءبىرقاتار جاڭا جوبالار تانىستىرىلدى.

«ق ت ج» ۇ ك» ا ق باسقارما ءتوراعاسى پرەزيدەنتكە كومپانيا ينفراقۇرىلىمدى، تەرمينال جەلىسىن دامىتۋعا جانە سيفرلىق شەشىمدەردى ەنگىزۋگە باسا نازار اۋداراتىنىن جەتكىزدى.

قاسىم- جومارت توقايەۆ وسى باعىتتارداعى جۇمىستى جانداندىرۋدىڭ ماڭىزىن اتاپ ءوتتى. مەملەكەت باسشىسىنىڭ ايتۋىنشا، العا قويعان مىندەتتەردى جوسپارلى ىسكە اسىرۋ قازاقستاننىڭ ەۋرازياداعى ترانزيتتىك حاب رەتىندەگى الەۋەتىن نىعايتۋدا ايتارلىقتاي ناتيجەگە قول جەتكىزۋگە مۇمكىندىك بەرەدى.

اسحات رايقۇل

اۆتور