پرەزيدەنت Orbis Heavy Machinery ارنايى جانە كوممەرتسيالىق تەحنيكا زاۋىتىنا باردى
استانا. KAZINFORM - قاسىم-جومارت توقايەۆ KIA ماركالى ارنايى جانە كوممەرتسيالىق تەحنيكالار قۇراستىراتىن زاۋىت جۇمىسىمەن تانىستى. بۇل تۋرالى اقوردانىڭ باسپا ءسوز قىزمەتى حابارلادى.
كاسىپورىن ىسكە قوسىلعان 2022 -جىلدان بەرى 700 دەن اسا اۆتوكولىك شىعارىلعان.
وندىرىسكە قۇيعان ينۆەستيتسيانىڭ جالپى كولەمى 11 ميلليارد تەڭگەدەن استى. مۇندا وندىرۋشىلەردەن جەتكىزىلگەن بولشەكتەردى دانەكەرلەۋ، سىرلاۋ، شاناق مونتاجداۋ جۇمىستارى اتقارىلادى. سونىمەن قاتار كوممەرتسيالىق اۆتوكولىكتەرگە ارنالعان قوسىمشا جابدىقتار ءوندىرىسى جولعا قويىلعان. 240 مامان تۇراقتى جۇمىسپەن قامتىلعان.
كومپانيا وندىرىستىك قۋاتى مەن ءونىم ءتۇرىن كەڭەيتۋ ءۇشىن باسقا دا حالىقارالىق برەندتەرمەن كەلىسسوز جۇرگىزىپ جاتىر.
پرەزيدەنت ەڭبەك ۇجىمىنا تابىس تىلەپ، KIA Bongo اۆتوكولىگىنىڭ شاناعىنا ەستەلىك قولجازبا قالدىردى.
