پرەزيدەنت جوعارى ەۋرازيالىق ەكونوميكالىق كەڭەستىڭ كەڭەيتىلگەن قۇرامداعى وتىرىسىنا قاتىستى
استانا. KAZINFORM - جيىندا ەۋرازيالىق ەكونوميكالىق وداقتىڭ نەگىزگى سەرىكتەستەرىمەن ساۋدا- ەكونوميكالىق ىنتىماقتاستىقتى دامىتۋعا قاتىستى وزەكتى ماسەلەلەرى تالقىلاندى.
سونداي-اق ونەركاسىپ، كولىك جانە لوگيستيكا، اگرارلىق سەكتور، سيفرلاندىرۋ جانە جاساندى ينتەللەكت سەكىلدى باستى باعىتتار بويىنشا ءوزارا ءتيىمدى ىقپالداستىق پەرسپەكتيۆاسى قاراستىرىلدى.
وتىرىستا يران پرەزيدەنتى ماسۋد پەزەشكيان (بەينەۇندەۋ فورماتىندا)، كۋبا پرەزيدەنتى ميگەل ماريو دياس-كانەل بەرمۋدەس، وزبەكستان پرەزيدەنتى شاۆكات ميرزيەۆ، ابۋ ءدابيدىڭ تاق مۇراگەرى شەيح حالەد بەن مۇحاممەد بەن زايد ءال ناحايان، موڭعوليا پرەمەر-ءمينيسترىنىڭ ءبىرىنشى ورىنباسارى ۋچرال نيام-وسورىن ءسوز سويلەدى.
كەلەسى جىلى جوعارى ەۋرازيالىق ەكونوميكالىق كەڭەسكە قازاقستان رەسپۋبليكاسى ءتوراعالىق ەتەدى.
جيىن سوڭىندا ءبىرقاتار قۇجاتقا، سونىڭ ىشىندە موڭعوليامەن ساۋدا كەلىسىمىنە جانە بىرىككەن اراب امىرلىكتەرىمەن ەكونوميكالىق سەرىكتەستىك جونىندەگى كەلىسىمگە قول قويىلدى.
بۇعان دەيىن پرەزيدەنت ابۋ ءدابيدىڭ تاق مۇراگەرىمەن جۇزدەستى.
