پرەزيدەنت: ايەلدەر مەن بالالاردى زورلىق-زومبىلىقتان قورعاۋ - ماڭىزدى مىندەت
استانا. KAZINFORM - وتباسىلىق زورلىق-زومبىلىقپەن كۇرەس جانە ايەلدەر مەن بالالاردى قورعاۋ - ماڭىزدى مىندەت. بۇل تۋرالى مەملەكەت باسشىسى قاسىم-جومارت توقايەۆ قۇقىق قورعاۋ ورگاندارىنىڭ كەڭەيتىلگەن القا ماجىلىسىندە مالىمدەدى.
- كەلەسى ماڭىزدى مىندەتتىڭ ءبىرى - وتباسىلىق زورلىق-زومبىلىقپەن كۇرەس جانە ايەلدەر مەن بالالاردى قورعاۋ. وسى باعىتتا زاڭنامالىق، ينستيتۋتسيونالدىق تۇرعىدان باتىل قادامدار جاسالۋدا. وتباسىلىق زورلىق-زومبىلىق جاساعانى ءۇشىن بەرىلەتىن جازا ەداۋىر كۇشەيتىلدى. ءبىر جىل بۇرىن ءتيىستى زاڭ قابىلداندى. زاڭعا ەنگىزىلگەن تۇزەتۋلەر مەن باسقا دا شارالار ناقتى ناتيجە بەرە باستادى. ورتاشا جانە اۋىر دەڭگەيدەگى وتباسىلىق-تۇرمىستىق قىلمىس سانى جىل باسىنان بەرى 30 پايىزعا تومەندەدى. جالپى، سوڭعى 5 جىلدا ايەلدەرگە قاتىستى قۇقىق بۇزۋشىلىقتار ەكى ەسە ازايدى. ەڭ باستىسى، قازىر قوعامدىق سانا تۇبەگەيلى وزگەرىپ جاتىر، - دەدى پرەزيدەنت.
سونىمەن قاتار مەملەكەت باسشىسى ازاماتتارىمىزدىڭ بويىندا وتباسىنداعى قاتىگەزدىك پەن وزبىرلىققا مۇلدەم توزبەۋشىلىك قاسيەتى قالىپتاسىپ جاتقانىن اتاپ ءوتتى. زارداپ شەككەندەرگە قول ۇشىن بەرەتىن، ال قۇقىق بۇزۋشىلاردى جازعىراتىن قايىرىمدى قوعام ورنىعىپ كەلەدى. ەلىمىزدە «قازاقستان بالالارى» اتتى ارنايى باعدارلاما ازىرلەنىپ جاتىر.
- قۇجاتتا وسكەلەڭ ۇرپاقتىڭ مۇددەسىن قورعاۋعا ارنالعان ماڭىزدى تەتىكتەر ۇسىنىلماق. ناشاقورلىق پەن ەسىرتكى بيزنەسىنە قارسى كەشەندى جۇمىس اتقارىلىپ جاتىر. بيىلدىڭ وزىندە 83 ەسىرتكى زەرتحاناسى جويىلىپ، اينالىمنان الىنعان ەسىرتكى زاتتارىنىڭ كولەمى 84 پايىزعا ۇلعايدى. ەسىرتكى وندىرگەنى ءۇشىن بەرىلەتىن جازا قاتاڭداتىلدى. ءتىپتى، ءومىر بويى باس بوستاندىعىنان ايىرىلۋى مۇمكىن. ءبىراق بۇل سالاداعى جۇمىس ءالى دە تولىعىمەن بىتكەن جوق، تۇيتكىلدەر جەتكىلىكتى، شەشىلمەگەن ماسەلەلەر ەلىمىزدىڭ قاۋىپسىزدىگىنە، تۇراقتىلىعىنا سىن-قاتەر توندىرۋدە. بۇكىل قوعامدى الاڭداتىپ وتىرعان ەڭ قاۋىپتى ءۇردىس: جاستار ناشاقورلىققا ءۇيىر بولا باستادى. بۇل - ۇلكەن قاتەر، ونى جاسىرماۋىمىز كەرەك، - دەدى پرەزيدەنت.
قاسىم-جومارت توقايەۆ قازاقستاندا كىرىستى جىلىستاتۋعا جانە تەرروريزمدى قارجىلاندىرۋعا قارسى كۇرەستىڭ حالىقارالىق وزىق ستاندارتتارعا ساي ءتيىمدى جۇيەسى قالىپتاسقانىن ايتتى. 2019 -جىلدان بەرى ج ءى ءو- دەگى كولەڭكەلى ەكونوميكانىڭ ۇلەسى 23 پايىزدان 16 پايىزعا دەيىن تومەندەدى. ءبىراق ءالى جوعارى دەڭگەي ساقتالىپ وتىر.
- مەملەكەت جاۋاپكەرشىلىگى مول ءارى ادال كاسىپكەرلەردى قورعاپ، قولداۋ بىلدىرەدى. مەنىڭ ارنايى تاپسىرمام بويىنشا باس پروكۋراتۋرا جالپى سوماسى 34 تريلليون تەڭگە بولاتىن شەتەلدىكتەردىڭ قاتىسى بار جۇزدەگەن ينفراقۇرىلىمدىق جوباعا قۇقىقتىق تۇرعىدان كومەك كورسەتىپ كەلەدى. الايدا وتاندىق بيزنەستى نەگىزسىز قىلمىستىق قۋدالاۋ ماسەلەسى تولىق شەشىمىن تاپقان جوق. باس پروكۋراتۋرا بۇل جۇمىستى جالعاستىرعانى ءجون، - دەدى مەملەكەت باسشىسى.
ايتا كەتەيىك، مەملەكەت باسشىسى قاسىم-جومارت توقايەۆ قۇقىق قورعاۋ ورگاندارىنىڭ كەڭەيتىلگەن القا ماجىلىسىندە ءسوز سويلەدى.
اۆتور
ەلميرا ورالبايەۆا
