پرەزيدەنت «استانا» حالىقارالىق قارجى ورتالىعىنىڭ باسشىسى رەنات بەكتۇروۆتى قابىلدادى
استانا. KAZINFORM - مەملەكەت باسشىسى «استانا» حالىقارالىق قارجى ورتالىعىنىڭ باسقارۋشىسى رەنات بەكتۇروۆتى قابىلدادى.
رەنات بەكتۇروۆ ورتالىقتىڭ بيىلعى ءبىرىنشى جارتىجىلدىقتاعى قىزمەتىنىڭ نەگىزگى ناتيجەلەرى مەن الداعى كەزەڭگە جوسپارىن تانىستىردى.
بۇگىندە قارجى ورتالىعى ارقىلى قازاقستانعا 12 ميلليارد دوللاردان استام ينۆەستيتسيا تارتىلعان. بۇل 2025 -جىلعا بەلگىلەنگەن ماقساتتى كورسەتكىشتەن اسادى.
ا ح ق و قۇرىلعان ساتتەن باستاپ ونىڭ قاتىسۋشىلارى بيۋدجەتكە 115 ميلليارد تەڭگە سالىق تولەدى. ونىڭ 29,8 ميلليارد تەڭگەسى وسى جىلدىڭ ءبىرىنشى جارتىجىلدىعىندا تۇسكەن.
قارجى ورتالىعىنا قاتىسۋشىلار سانىنىڭ ارتۋى مەن كومپانيالار قىزمەتىنىڭ جاندانۋى سالىق تۇسىمدەرىنىڭ ۇلعايۋىنا نەگىزگى سەبەپ بولىپ وتىرعانىن اتاپ ءوتتى.
2024 -جىلدىڭ العاشقى التى ايىندا ورتالىققا 500-دەن استام كومپانيا قوسىلدى.
بۇل قاتىسۋشىلاردىڭ جالپى سانىن 3 مىڭعا دەيىن ارتتىرۋعا جانە جاڭا جۇمىس ورىندارىن اشۋعا ايتارلىقتاي ىقپال ەتتى.
بيىلعى ەكىنشى توقساننىڭ سوڭىنداعى ەسەپ بويىنشا ا ح ق و يۋريسديكتسياسىنداعى كومپانيالار 7600-دەن استام جۇمىس ورنىن اشتى.
«استانا» حالىقارالىق قارجى ورتالىعىنىڭ بيزنەس-قوعامداستىقتى قولداۋعا باعىتتالعان شارالارى تۋرالى ايتتى.
ماۋسىم ايىندا AIFC Community باستاماسى اياسىندا العاشقى ءىس-شارا وتكەنىن حابارلادى.
بيىل 5-6-قىركۇيەكتە بولاتىن ءداستۇرلى Astana Finance Days 2024 شاراسىنا دايىندىق بارىسىن باياندادى.
پرەزيدەنت قارجى ورتالىعىن ودان ءارى دامىتۋ باعىتىندا ءبىرقاتار مىندەت جۇكتەدى.
اتاپ ايتقاندا، ەل ەكونوميكاسىنا ينۆەستيتسيا تارتۋ ءۇشىن ا ح ق و ينفراقۇرىلىمىن بەلسەندى پايدالانا وتىرىپ، بارلىق مەملەكەتتىك ورگان مەن قارجى ينستيتۋتتارىنىڭ كۇش-جىگەرىن بىرىكتىرۋ قاجەت ەكەنىن اتاپ ءوتتى.
اۆتور
جانات قاپالبايەۆا
