گرۋزيا مەن قازاقستاننىڭ ساۋدا-ەكونوميكالىق ىنتىماقتاستىعىن نىعايتۋ ماسەلەسى تالقىلاندى
استانا. KAZINFORM - پرەمەر-مينيستر ولجاس بەكتەنوۆ گرۋزيانىڭ ەكونوميكا جانە تۇراقتى دامۋ ءمينيسترى ماريام كۆريۆيشۆيليمەن كەزدەسۋ وتكىزدى. بۇل تۋرالى ۇكىمەتتىڭ باسپا ءسوز قىزمەتى ءمالىم ەتتى.
وندا ساۋدا مەن ينۆەستيتسيالاردى دامىتۋدى، ينفراقۇرىلىمدىق جوبالاردى جۇزەگە اسىرۋدى، كولىك-لوگيستيكالىق بايلانىستاردى كەڭەيتۋدى، ونىڭ ىشىندە ترانسكاسپي حالىقارالىق كولىك باعىتى (ت ح ك ب) شەڭبەرىندە، سونداي-اق ا و ك- دەگى تاۋار اينالىمىن ارتتىرۋدى قوسا العاندا، ەكىجاقتى ىنتىماقتاستىق ماسەلەلەرى قارالدى.
پرەمەر-مينيستر قازاقستان گرۋزيانى تۇراقتى جانە ءوزارا ءتيىمدى ديالوگ قۇراتىن سەنىمدى ەكونوميكالىق ارىپتەس رەتىندە قاراستىراتىنىن اتاپ ءوتتى.
2025 -جىلعى قاڭتار-مامىر ايلارىندا ەكى ەل اراسىنداعى تاۋار اينالىمى $75,2 ميلليوندى قۇرادى، بۇل وتكەن جىلدىڭ سايكەس كەزەڭىمەن سالىستىرعاندا %35,7-عا ارتىق.
كەزدەسۋ بارىسىندا كولىكتىك-لوگيستيكالىق ءوزارا ءىس-قيمىلدى نىعايتۋعا كوڭىل ءبولىندى. 2025 -جىلدىڭ ءبىرىنشى جارتىجىلدىعىندا ەلدەر اراسىنداعى تەمىرجول جۇك تاسىمالىنىڭ كولەمى 159,5 مىڭ توننادان استى، بۇل 2024 -جىلدىڭ سايكەس كەزەڭىمەن سالىستىرعاندا %67- عا ارتىق.
ت ح ك ب- نى دامىتۋداعى ماڭىزدى قادام PTC Holding كومپانياسى سالعان جوبالىق قۋاتى جىلىنا 120 مىڭ ج ف ە قۇرايتىن گرۋزيانىڭ پوتي پورتىندا جاڭا قازاقستاندىق كونتەينەر تەرمينالىنىڭ ىسكە قوسىلۋى بولدى. بۇل گرۋزيانىڭ نەگىزگى تەڭىز حابتارىنىڭ ءبىرىنىڭ اۋماعىندا جۇزەگە اسىرىلعان العاشقى قازاقستاندىق ينفراقۇرىلىمدىق جوبا.
- بۇل ورتا ءدالىز بويىنشا جۇك اعىنىنىڭ كولەمىن ارتتىرۋدا ماڭىزدى ءرول اتقاراتىن بىرلەسكەن تابىستى جۇمىستىڭ جارقىن مىسالى. اتالمىش جوبا قىتايدىڭ ليانيۋنگان جانە سيان قالالارىنداعى لوگيستيكالىق تەرمينالداردى قوسا العاندا، تحكب شەڭبەرىندە قازاقستاننىڭ قولدانىستاعى ينفراقۇرىلىمىن ۇيلەسىمدى تۇردە تولىقتىرىپ وتىرعانىن اتاپ ءوتۋ ماڭىزدى. وسىلايشا، شىعىس ازيانى ەۋروپامەن بايلانىستىراتىن ءبىرتۇتاس، دايەكتى لوگيستيكالىق تىزبەك قۇرىلۋدا، - دەپ اتاپ ءوتتى ولجاس بەكتەنوۆ.
مارشرۋتتى ودان ءارى دامىتۋ ءدالىزدىڭ تيىمدىلىگىن ارتتىرۋعا، قوسىمشا ترانزيتتىك جۇكتەر مەن ينۆەستيتسيالاردى تارتۋعا، سونداي-اق قازاقستان مەن گرۋزيانىڭ ءوڭىردىڭ نەگىزگى لوگيستيكالىق ورتالىقتارى رەتىندەگى پوزيتسياسىن نىعايتۋعا مۇمكىندىك بەرەدى.
سونىمەن قاتار، باتۋمي مۇناي تەرمينالى مەن پورتىنىڭ قۋاتىن كەڭەيتۋ، قازاقستاندىق اۋىل شارۋاشىلىعى ونىمدەرىن - استىق، ۇن، ەت-ءسۇت جانە كونديتەرلىك ونىمدەردى گرۋزين نارىعىنا جەتكىزۋدى ۇلعايتۋ مۇمكىندىكتەرى تالقىلاندى.
گرۋزيانىڭ ەكونوميكا جانە تۇراقتى دامۋ ءمينيسترى ماريام كۆريۆيشۆيلي قازاقستانمەن ساۋدا، تۋريزم جانە لوگيستيكالىق ينفراقۇرىلىم سالالارىندا ارىپتەستىكتى كەڭەيتۋدىڭ ماڭىزدىلىعىنا توقتالدى.
سونىمەن قاتار تۋريستىك بايلانىستاردى نىعايتۋدىڭ، ەكونوميكالىق ءوسىمدى ىنتالاندىرۋ مەن كولىك جەلىسىن دامىتۋدىڭ ماڭىزدىلىعى اتاپ ءوتىلدى.
كەزدەسۋ قورىتىندىسى بويىنشا تاراپتار قول جەتكىزىلگەن ۋاعدالاستىقتاردى ىسكە اسىرۋعا جانە ۇكىمەتارالىق كوميسسيا شەڭبەرىندە جۇمىستى جالعاستىرۋعا دايىن ەكەندىكتەرىن جەتكىزدى.
ەسكە سالا كەتەيىك، بۇعان دەيىن ولجاس بەكتەنوۆ ەكونوميكالىق ساياسات جونىندەگى كەڭەستىڭ وتىرىسىن وتكىزگەنىن جازعان ەدىك.
