رومان سكليار قىرعىزستاننان سۇر سىزبامەن كولىك اكەلىنەتىندىگىن مويىندادى

استانا. KAZINFORM - پرەمەر-ءمينيستردىڭ ءبىرىنشى ورىنباسارى رومان سكليار قىرعىزستاننان سۇر سىزبامەن ەلىمىزگە كولىكتەر اكەلىنەتىندىگىن مويىندادى.

ۇكىمەت ۇيىندە ءوتىپ جاتقان باسپا ءسوز ءماسليحاتىندا ب ا ق وكىلدەرى رومان سكلياردان «قىرعىزستاننان كولەڭكەلى سىزبامەن ءالى كۇنگە دەيىن اۆتوموبيلدەر كىرگىزىلىپ جاتىر. ال قازاقستان بيۋدجەتى كەدەن سالىقتارىنان قاعىلىپ وتىر دەۋگە بولادى. مۇنى قاشان توقتاتاسىزدار؟» دەپ سۇراعان ەدى.

- ءيا، شىنىمەن دە مۇنداي پروبلەما بار. وزدەرىڭىزدە بىلەسىزدەر، بۇرىنىراقتا ەۋرازيالىق ەكونوميكالىق وداقتىڭ 5 مەملەكەتى وعان كىرگەندە، ءتيىستى شارتقا قول قوياتىن كەزدە بەلگىلى تۇسىنىككە كەلگەن. ارمەنيا مەن قىرعىزستان وزدەرىنە كەلەتىن يمپورت اۆتوموبيلدەرگە كەدەن جانە باسقا دا سالىقتاردى بەلگىلەۋ بارىسىندا بەلگىلى ءبىر جەڭىلدىكتەر العان. دەگەنمەن، ەۋرازيالىق ەكونوميكالىق وداق اياسىندا بۇل قارىم-قاتىناس ىشكى ەرەجەلەرمەن رەتتەلۋى ءتيىس. ەگەر قازاقستانعا كىرگىزىلگەن كولىكتەر كەدەندىك جانە باسقا دا تولەمدەردى تولەمەسە، وندا اتالعان كولىكتەر شەكارانى كەسىپ ءوتىپ، ەسەپكە الىناتىن كەزدە ونى وتەۋى قاجەت. 2022 -جىلدىڭ 1 -قىركۇيەگىنە دەيىن اكەلىنگەن كولىكتەردى زاڭداستىرۋعا باعىتتالعان ۇلكەن ناۋقان وتكەنىن بىلەسىزدەر. سوندىقتان بۇل ماسەلە كۇن تارتىبىنەن الىنۋى ءتيىس ەدى. الايدا، ەلىمىزگە سۇر سىزبامەن كولىك اكەلۋگە تىرىساتىندار ءالى دە بار. دەگەنمەن، ارناۋلى ورگاندار، كەدەن قىزمەتى بۇل ماسەلەمەن اينالىسىپ جاتىر. مەنىڭشە، ولار بۇل ءىستى تارتىپكە كەلتىرەدى دەپ ويلايمىن، — دەدى رومان سكليار.