ەۋروپا وداعى ءوز-ءوزىن جاقسى كورەدى - سلوۆاكيا پرەمەر-ءمينيسترى

استانا. KAZINFORM - ەۋروپا وداعى وزگە دە مەملەكەتتەردىڭ جەتىستىگىن زەردەلەۋى كەرەك. بۇل تۋرالى اقوردادا مەملەكەت باسشىسى قاسىم-جومارت توقايەۆپەن كەڭەيتىلگەن قۇرامداعى كەلىسسوز بارىسىندا سلوۆاكيا پرەمەر-ءمينيسترى روبەرت فيتسو ايتتى.

- كەيدە ەۋروپا وداعى ءوز- ءوزىن جاقسى كورەتىندەي اسەر بولادى. ەۋروپا وداعىنداعى ارىپتەستەرىمە تەك ۇيىم اياعىنداعى جۇمىسپەن شەكتەلمەي، الەمگە كەڭىنەن قاراپ، وزگە دە مەملەكەتتەردىڭ جەتىستىكتەرىن زەردەلەۋ كەرەك ەكەنىن ۇنەمى ايتىپ كەلەمىن. ءبىز دۇنيە جۇزىندەگى سەرىكتەستەرىمىزبەن بەلسەندى ىقپالداستىق ورناتىپ، ىنتىماقتاستىقتى نىعايتا بەرۋىمىز قاجەت، - دەدى روبەرت فيتسو.

سونىمەن قاتار ول 1944-1945 -جىلدارى سلوۆاكيانى ازات ەتۋگە ولشەۋسىز ۇلەس قوسقان قازاقستانعا شىنايى ريزاشىلىعىن ءبىلدىردى.

- كەڭەس اسكەرى ساپىندا قازاقستاننىڭ ميلليونعا جۋىق ساربازى قان مايداندا شايقاستى. ولاردىڭ ىشىندە 60 مىڭعا تارتا جاۋىنگەر سلوۆاكيانى جاۋدان قورعاۋ ءۇشىن جانىن پيدا ەتتى. سول سۇراپىل ۋاقىتتا سلوۆاكياعا جاساعان جاقسىلىقتارىڭىزدى ەشقاشان ۇمىتپايمىز، - دەدى سلوۆاكيا پرەمەر-ءمينيسترى.

ايتا كەتەيىك، قازاقستان مەن سلوۆاكيا جاھاندىق تەكەتىرەستەر مەن ساۋدا سوعىسى بەيبىت جولمەن شەشىلۋى كەرەك دەپ سانايدى.

اۆتور

مارلان جيەمباي