رۋسلان جاقسىلىقوۆتى قاماۋعا الدى دەپ حابارلاعانداردىڭ ۇستىنەن قىلمىستىق ءىس قوزعالدى

استانا. KAZINFORM - ىشكى ىستەر مينيسترلىگى Kazinform ساۋالىنا جولداعان جاۋاپتا قورعانىس ءمينيسترى بولعان رۋسلان جاقسىلىقوۆتىڭ قاماۋعا الىنۋ تۋرالى اقپاراتقا بايلانىستى مالىمەت بەردى.

- سۇراۋحاتتا كورسەتىلگەن ادامنىڭ قاماۋعا الىنعانى تۋرالى بۇقارالىق اقپارات قۇرالدارىندا كورىنەۋ جالعان اقپارات تاراتۋ فاكتىسى بويىنشا استانا قالاسىنىڭ پوليتسيا دەپارتامەنتى قىلمىستىق كودەكتىڭ 274-بابى 2-بولىگى بويىنشا (بۇقارالىق اقپارات قۇرالدارىن نەمەسە تەلەكوممۋنيكاتسيالار جەلىلەرىن پايدالانا وتىرىپ، كورىنەۋ جالعان اقپارات تاراتۋ) سوتقا دەيىنگى تەرگەۋ جۇرگىزىپ جاتىر، - دەپ جازىلعان رەسمي جاۋاپتا.

ءبىراق مينيسترلىك قىلمىستىق ءىس ناقتى كىمدەردىڭ ۇستىنەن قوزعالعانىن ايتۋدان باس تارتىپ وتىر. ال ر. جاقسىلىقوۆتىڭ قاماۋعا الىنعانىن ءانونيمدى تەلەگرام-ارنالار تاراتىپ، كەيىن ونى كەيبىر اقپارات پورتالدارى كوشىرىپ باسقان بولاتىن.

- ق ر قىلمىستىق-پروتسەستىك كودەكسىنىڭ 201-بابىنا سايكەس سوتقا دەيىنگى تەرگەپ-تەكسەرۋ دەرەكتەرى جاريا ەتىلمەۋى ءتيىس. تەرگەۋ جۇرگىزىلىپ جاتىر. انىق-قانىعى تەرگەۋ بارىسىندا انىقتالادى. باسقا مالىمەت بەرە المايمىز، - دەدى ىشكى ىستەر مينيسترلىگىندەگىلەر.

بۇعان دەيىن باس پروكۋروردىڭ ورىنباسارى اسەت شىندالييەۆ تە بۇرىنعى قورعانىس ءمينيسترى رۋسلان جاقسىلىقوۆتىڭ قاماۋعا الىنعانى جونىندە تاراعان مالىمەتكە قاتىستى پىكىر بىلدىرگەن بولاتىن.

اۆتور

ەسىمجان ناقتىباي