رەسپۋبليكا اۋماعىنا كىرمەي-اق قانداس مارتەبەسىن الۋعا بولادى

استانا. قازاقپارات - بيىلعى جىلى 1-تامىزداعى جاعداي بويىنشا 10134 ەتنيكالىق قازاق تاريحي وتانىمەن تابىسىپ، قانداس مارتەبەسىن الدى. جالپى 1991 -جىلدان بەرى رەسپۋبليكاعا 1 ميلليون 138,5 مىڭ ەتنيكالىق قازاق ورالدى.

ەڭبەك جانە حالىقتى الەۋمەتتىك قورعاۋ مينيسترلىگىنەن جازعانداي، جىل باسىنان قازاقستانعا كەلگەن قانداستاردىڭ جارتىسى (47,5 پايىز) قىتايدان، 37 پايىزى - وزبەكستاننان، 5,8 پايىزى - تۇرىكمەنستاننان، 5,2 پايىزى - موڭعوليادان، 3,2 پايىزى - رەسەيدەن جانە 1,3 پايىزى باسقا ەلدەردەن.

«وسى جىلعى 1-تامىزداعى جاعداي بويىنشا ەڭبەككە قابىلەتتى جاستاعى ەتنيكالىق قونىس اۋدارۋشىلار سانى 59 پايىزدى، ەڭبەككە قابىلەتتى جاستان كىشى 31,3 پايىزدى جانە زەينەتكەرلەر 9,7 پايىزدى قۇرايدى.

ەڭبەككە قابىلەتتى جاستاعى قانداستاردىڭ ىشىنەن ءبىلىم دەڭگەيى بويىنشا %17,4- ى جوعارى ءبىلىمدى، %23,8- ى ورتا كاسىبي ءبىلىمدى، %54,6- ى جالپى ورتا ءبىلىمدى، جانە %4,2- ىنىڭ ءبىلىم جوق. قونىس اۋدارعان ەتنيكالىق قازاقتار رەسپۋبليكانىڭ ءتۇرلى وڭىرلەرىنە قونىستاندى»، - دەلىنگەن اقپاراتتا.

سونىمەن بىرگە، قانداستاردى قونىستاندىرۋ ءۇشىن كەلەسىدەي ەڭبەك كۇشى تاپشى وڭىرلەر انىقتالدى: اقمولا، اباي، قوستاناي، پاۆلودار، شىعىس جانە سولتۇستىك قازاقستان وبلىستارى.

قونىستاندىرۋ وڭىرلەرىندە 2024 -جىلعا ارنالعان قانداستاردى قابىلداۋ كۆوتاسى 2433 ادامدى قۇرايدى. 2024 -جىلعى 1-تامىزداعى جاعداي بويىنشا قونىستاندىرۋ وڭىرلەرىنە 1937 قانداس قونىس اۋداردى.

جوعارىدا اتالعان وڭىرلەردە قونىستانعان قانداستارعا كوشۋگە سۋبسيديا تۇرىندە مەملەكەتتىك قولداۋ شارالارى ۇسىنىلادى - ءبىر مەزگىلدە وتاعاسىنا جانە وتباسىنىڭ ءاربىر مۇشەسىنە 70 ا ە ك (258,4 مىڭ تەڭگە) مولشەرىندە؛ تۇرعىن ءۇي جالداۋعا جانە كوممۋنالدىق قىزمەتتەرگە اقى تولەۋگە - ءبىر جىل ىشىندە 15-تەن 30 ا ە ك (55,3-دەن 110,7 مىڭ تەڭگەگە دەيىن) مولشەرىندە.

«جىل باسىنان بەرى 1755 قانداسقا ءتۇرلى قولداۋ شارالارى كورسەتىلدى. اتاپ ايتقاندا، 479 ادام تۇراقتى جۇمىسقا ورنالاستىرىلدى. سونىمەن قاتار ەرىكتى قونىس اۋدارۋدىڭ تيىمدىلىگىن ارتتىرۋ ماقساتىندا ازاماتتاردى سولتۇستىك وڭىرلەرگە قونىس اۋدارۋعا قاتىساتىن جۇمىس بەرۋشىلەردى قولداۋ بويىنشا ينستيتۋتسيونالدىق شارالار قابىلداندى. تۇرعىن ءۇي ساتىپ الۋ، سالۋ ءۇشىن نەمەسە يپوتەكالىق تۇرعىن ءۇي قارىزدارى بويىنشا باستاپقى جارنانىڭ ءبىر بولىگىن جابۋ ءۇشىن ەكونوميكالىق ۇتقىرلىق سەرتيفيكاتى تۇرعىن ءۇي قۇنىنىڭ %50- ى نەمەسە ءبىر وتباسىنا 4,28 ميلليون تەڭگەگە دەيىن مولشەرىندە ءبىرجولعى وتەۋسىز جانە قايتارىمسىز نەگىزدە ەنگىزىلدى»، - دەپ مالىمدەدى مينيسترلىكتەن.

ەستەرىڭىزگە سالا كەتەيىك، 2023 -جىلدان باستاپ پيلوتتىق رەجيمدە قازاقستان ەلشىلىكتەرى ارقىلى «ءبىر تەرەزە» قاعيداتى بويىنشا قانداس مارتەبەسىن بەرۋ تەتىگى ىسكە اسىرىلادى. پيلوتتىق جوبا شەڭبەرىندە ەلىمىزگە بارۋ، جۇمىس ورنى، تۇرعىن ءۇي بەرۋ مۇمكىندىكتەرى تۋرالى ماسەلەنى شەشۋگە جانە رەسپۋبليكا اۋماعىنا كىرمەي-اق قانداس مارتەبەسىن الۋعا بولادى. بۇگىنگى تاڭدا ەتنيكالىق قازاقتاردان جاڭا فورماتتا 12495 ءوتىنىش قابىلداندى.

اۆتور

اسحات رايقۇل