پرەمەر-ءمينيستردىڭ ءسوزى دوللاردىڭ قىمباتتاۋىنا اسەر ەتتى مە - رومان سكلياردىڭ جاۋابى

استانا. KAZINFORM- پرەمەر-ءمينيستردىڭ ورىنباسارى رومان سكليار ۇكىمەت ۇيىندەگى باسپا ءسوز ءماسليحاتىندا ۇكىمەت باسشىسى ولجاس بەكتەنوۆتىڭ تەڭگە باعامى مەن مۇناي باعاسى تۋرالى مالىمدەمەسىنەن كەيىن دوللار كۇرت قىمباتتادى دەگەن سىندارعا جاۋاپ بەردى.

- پرەمەر-ءمينيستردىڭ ءسوزى دوللار باعامىنىڭ وسۋىنە تۇرتكى بولدى دەپ بايلانىستىرۋ كەم دەگەندە بايىپتى پايىم ەمەس، - دەدى ول ب ا ق وكىلىنىڭ سۇراعىنا بەرگەن جاۋاپتا.

ءبىرىنشى ۆيتسە-پرەمەر ءوز بولجامىن دا ايتتى.

- دوللار باعامىنىڭ قانشا بولاتىنى تۋرالى مەنىڭ پىكىرىمە كەلسەك، ۇلتتىق بانك بيلىك يەرارحياسىنداعى جەكە دارا قۇرىلىم ەكەنىن ءتۇسىنۋىڭىز كەرەك. ول ۇكىمەتكە باعىنبايدى. اقشا- نەسيە ساياساتىن قالاي جۇرگىزۋ كەرەك دەپ ەسەپتەسە، سولاي جۇرگىزەدى. ول ساياساتتارى دۇرىس پا، تەرىس پە دەگەن سۇراق توڭىرەگىندە ۇزاق داۋلاسۋعا بولادى. ال مەنىڭ جانە مەنىڭ ارىپتەستەرىمنىڭ بولجامى دوللار باعامى ءبارى ءبىر قايتا تۇسەدى دەگەنگە سايادى. قازىرگىدەي جوعارى بولمايدى. تەڭگە باعامىنىڭ تۇراقتانعان ءساتىن بۇعان دەيىن دە تالاي كوردىك. ۇلتتىق بانك ول ءۇشىن ءبارىن ىستەيدى، نارىق ءوزى-اق رەتتەيدى دەپ ويلايمىن، - دەدى رومان سكليار.

ەسكە سالساق، ولجاس بەكتەنوۆ قازاقستان دامۋىنىڭ بازالىق سسەناريى بويىنشا دوللار باعامى 540 تەڭگە، ءبىر باررەل مۇنايدىڭ باعاسى 60 دوللار دەپ بەلگىلەنگەنىن ايتقان ەدى.

اۆتور

ەسىمجان ناقتىباي