گەرمانيامەن ەكىجاقتى ساۋدا- ساتتىق قارقىندى دامىپ كەلەدى - پرەزيدەنت

قاسىم- جومارت توقايەۆ پەن ولاف شولتس ب ا ق وكىلدەرى ءۇشىن بريفينگ وتكىزدى. مەملەكەت باسشىسى بەرلينگە ساپارمەن كەلۋگە ارنايى شاقىرىپ، قوناقجايلىق كورسەتكەنى ءۇشىن ولاف شولتسكە ريزاشىلىعىن ءبىلدىردى، دەپ حابارلايدى قازاقپارات اقوردانىڭ باسپا ءسوز قىزمەتىنە سىلتەمە جاساپ.

- گەرمانيا - قازاقستاننىڭ ەۋروپا وداعىنداعى ستراتەگيالىق سەرىكتەسى، اسىرەسە ءوزارا ساۋدا- ەكونوميكالىق جانە ينۆەستيتسيالىق بايلانىستار جولعا قويىلعان. سوندىقتان ەكى ەلدىڭ ىنتىماقتاستىعىن نىعايتۋعا باسا ءمان بەرەمىز. ءبىز بۇگىن قۇرمەتتى كانتسلەر مىرزامەن ءبىرقاتار ماڭىزدى ماسەلەنى تالقىلادىق. قازاقستان مەن گەرمانيا اراسىنداعى بايلانىستاردى ودان ءارى دامىتۋعا ەرەكشە نازار اۋداردىق، - دەدى قاسىم- جومارت توقايەۆ.

پرەزيدەنت جۇرگىزىلگەن كەلىسسوزدەر قازاق- گەرمان قاتىناستارىن ودان ءارى نىعايتۋعا ەكى تاراپتىڭ نيەتتى ەكەنىن تاعى دا راستاعانىن اتاپ ءوتتى.

- قازىرگى جاعدايدا قازاقستان مەن گەرمانيا ەكى ەلدىڭ ورنىقتى دامۋىن قامتاماسىز ەتۋ ءۇشىن جاڭا ينۆەستيتسيالىق جوبالاردى جۇزەگە اسىرۋ ىسىنە بارىنشا پراگماتيكالىق تۇرعىدان قاراۋى كەرەك. ول ءۇشىن ءبىزدىڭ ساياسي ەرىك- جىگەرىمىز بەن وراسان زور ەكونوميكالىق الەۋەتىمىز بار. كەلىسسوزدەر بارىسىندا ساۋدا- ەكونوميكالىق ىنتىماقتاستىقتىڭ پەرسپەكتيۆالارىنا باسا ءمان بەرىلدى. ءبىز ەكىجاقتى ساۋدا- ساتتىقتىڭ قارقىندى دامىپ كەلە جاتقانىن اتاپ وتتىك. ەكسپورتتىق جانە يمپورتتىق تاۋارلار نومەنكلاتۋراسىن ودان ءارى كەڭەيتۋ ءۇشىن پارمەندى شارالار قابىلداۋعا ۋاعدالاستىق، - دەدى مەملەكەت باسشىسى.

پرەزيدەنت مۇناي- گاز حيمياسى، مەتاللۋرگيا، كولىك جانە لوگيستيكا سەكىلدى پەرسپەكتيۆتى سالالاردا بىرلەسكەن جوبالاردى جۇزەگە اسىرۋ ماسەلەلەرى جان- جاقتى قاراستىرىلعانىن ايتتى.

قاسىم- جومارت توقايەۆ قازاقستان تاراپىنىڭ جەتەكشى ەۋروپالىق كومپانيالارمەن قول جەتكىزگەن ۋاعدالاستىقتارىن جوعارى باعالادى.

- بۇگىنگى كەزدەسۋ قارساڭىندا Siemens, Deutsche Bahn, Siemens Energy, Linde جانە تاعى دا باسقا نەگىزگى سەرىكتەستەرمەن ماڭىزدى كوممەرتسيالىق كەلىسىمدەرگە قول قويىلۋىن قۇپتايمىن. بۇل قۇجاتتار مەملەكەتتەرىمىز اراسىنداعى ەكونوميكالىق بايلانىستاردى ودان ءارى نىعايتۋعا تىڭ سەرپىن بەرەدى، - دەدى مەملەكەت باسشىسى.

قاسىم- جومارت توقايەۆ ەنەرگەتيكا سالاسىنداعى كووپەراتسيانى دامىتۋدى باستى باسىمدىقتاردىڭ ءبىرى رەتىندە اتادى.

- وزدەرىڭىزگە ءمالىم، قازاقستان جىل باسىنان بەرى گەرمانياعا «دوستىق» مۇناي قۇبىرى ارقىلى 500 مىڭ توننا مۇناي جونەلتتى. مۇنىڭ ءبارى ءوزارا كەلىسىمنىڭ ناتيجەسىندە جۇزەگە استى. گەرمانيالىق دوستارىمىزدىڭ ءوتىنىشى بويىنشا جەتكىزىلەتىن مۇناي كولەمىن ۇلعايتۋعا، ونىڭ ۇزاقمەرزىمدى بولۋىن قامتاماسىز ەتۋگە ەلىمىزدىڭ دايىن ەكەنىن راستادىم، - دەدى مەملەكەت باسشىسى.

پرەزيدەنت ءوز سوزىندە ەكى ەلدىڭ ءوزارا ىقپالداستىعىن كەڭەيتەتىن جاڭا مۇمكىندىكتەرگە دە توقتالدى.

- قازاقستان مەن گەرمانيانىڭ باسەكەلەستىكتەگى ارتىقشىلىقتارىن «شيكىزات، ونەركاسىپ جانە تەحنولوگيا» فورمۋلاسىنا ساي ۇيلەستىرۋ ەكى تاراپ ءۇشىن سينەرگەتيكالىق تۇرعىدا ايتارلىقتاي ءتيىمدى بولماق. مەن كانتسلەرگە شيكىزاتتى يگەرۋ جونىندەگى بىرلەسكەن جوبالاردى جۇزەگە اسىرۋ ءۇشىن كونسورتسيۋم قۇرۋدى ۇسىندىم. ءبىز جاڭارتىلاتىن ەنەرگيا كوزدەرىنە، اسىرەسە، «جاسىل» سۋتەگىنە قاتىستى نەمىستىڭ وزىق تەحنولوگيالارى مەن عىلىمي جەتىستىكتەرىن ترانسفەرت جاساۋعا مۇددەلىمىز، - دەدى قاسىم- جومارت توقايەۆ.

مەملەكەت باسشىسى ترانسكاسپيي كولىك باعدارىنىڭ ترانزيتتىك قۋاتىن ارتتىرۋ، سونداي- اق ونى ترانسەۋروپالىق كولىك جەلىسىمەن جانە Global Gateway باستاماسىمەن ۇشتاستىرۋ ءۇشىن بىرلەسە جۇمىس ىستەۋگە دايىن ەكەنىن مالىمدەدى.

قاسىم- جومارت توقايەۆتىڭ پىكىرىنشە، اگروونەركاسىپ سەكتورىنداعى، سونداي- اق قارجى، يننوۆاتسيا، سيفرلاندىرۋ سالالارىنداعى ىنتىماقتاستىقتى نىعايتۋ ءۇشىن مول مۇمكىندىك بار.

- بۇگىندە ەكونوميكالىق جوبالاردى قارجىلاندىرۋ اياسىندا ءبىز Deutsche Bank, Euler Hermes, KfW سەكىلدى بانكتەرمەن، سونداي- اق ايماقتىق قارجى قۇرىلىمدارىمەن بىرلەسىپ جۇمىس ىستەپ جاتىرمىز. وسى ءتىزىمدى كەڭەيتۋ ءۇشىن نەمىس قارجى ينستيتۋتتارىن بارىنشا تىعىز ىقپالداستىق ورناتۋعا شاقىرامىز، - دەدى پرەزيدەنت.

كەلىسسوزدەر بارىسىندا مادەني- گۋمانيتارلىق سالاداعى ىنتىماقتاستىققا دا ايرىقشا ءمان بەرىلدى. مەملەكەت باسشىسى جاڭا قازاق- نەمىس ءبىلىم بەرۋ مەكەمەلەرىنىڭ قۇرىلۋىن، اتاپ ايتقاندا، بيىل ماۋسىم ايىندا اقتاۋ قالاسىندا قازاقستان- گەرمانيا ورنىقتى ينجەنەريا ينستيتۋتىنىڭ اشىلۋىن قۇپتايتىنىن جەتكىزدى.

قاسىم- جومارت توقايەۆ مەملەكەتتەر اراسىنداعى ىقپالداستىقتىڭ جوعارى دەڭگەيىن ساقتاۋ ءۇشىن گەرمانيا كانتسلەرىن قازاقستانعا رەسمي ساپارمەن كەلۋگە شاقىردى.

فەدەرالدىق كانتسلەر ولاف شولتس ءوز سوزىندە قازاقستان گەرمانيانىڭ ورتالىق ازياداعى جەتەكشى ساۋدا- ەكونوميكالىق سەرىكتەسى ەكەنىن اتاپ ءوتتى.

سونداي- اق ەنەرگەتيكا، ورنىقتى دامۋ، سيفرلاندىرۋ جانە كليماتتىڭ وزگەرۋىنە قارسى كۇرەس سالالارىنداعى ىنتىماقتاستىقتى كەڭەيتۋدىڭ ماڭىزدى ەكەنىن ايتتى.

بۇدان بولەك، كانتسلەر گەرمانيا مەن ەۋروپا وداعى پرەزيدەنت قاسىم- جومارت توقايەۆتىڭ باستاماسىمەن قازاقستاندا جۇزەگە اسىرىلىپ جاتقان رەفورمالاردى تولىق قولدايتىنىن مالىمدەدى.

قازاقستان مەن گەرمانيا باسشىلارى بۇقارالىق اقپارات قۇرالدارى وكىلدەرىنىڭ سۇراقتارىنا جاۋاپ بەردى.

اتاپ ايتقاندا، مەملەكەت باسشىسىنا قازاقستاننىڭ رەسەيمەن قارىم- قاتىناسى جونىندە، ۋكراينا توڭىرەگىندەگى قاقتىعىستارعا قاتىستى جانە سانكسيالاردى ساقتاۋ تۋرالى سۇراقتار قويىلدى.

- شىن مانىندە، قازاقستان مەن رەسەيدىڭ اراسىن الەمدەگى ەڭ ۇزىن قۇرلىقتىق شەكارا ءبولىپ جاتىر. ەلدەرىمىز اراسىندا ساۋدا، گۋمانيتارلىق بايلانىستار بويىنشا ءداستۇرلى ىنتىماقتاستىق ورناعان. 2013 -جىلى ەكى ەل وداقتاستىق قارىم- قاتىناس تۋرالى شارتقا قول قويدى. ۋكرايناداعى قاقتىعىسقا كەلەر بولساق، قازاقستان اسكەري ءىس- قيمىلداردىڭ تەز ارادا توقتاتىلۋىن جانە ب ۇ ۇ جارعىسى نەگىزىندە بەيبىت كەلىسسوز جۇرگىزىلۋىن جاقتايدى. مەن بۇگىن قۇرمەتتى كانتسلەر مىرزاعا جاعدايدىڭ شىن مانىندە وتە كۇردەلى ەكەنىن ايتتىم. رەسەي دە، ۋكراينا دا كەلىسسوز جۇرگىزۋگە دايىن ەكەنىن راستايدى. الايدا كەلىسسوزدىڭ قانداي الاڭدا جۇرگىزىلەتىنى ازىرشە بەلگىسىز. سوندىقتان پاراساتتى، سالماقتى، ساليقالى ديپلوماتيانىڭ كەزەڭى تۋادى دەپ ويلايمىن. ولار ءبىرىن- ءبىرى ايىپتاۋدى دوعارىپ، ەكى جاققا دا ءتيىمدى كەلىسسوزدىڭ جولىن تابۋى كەرەك. قازاقستان ۋكراينا قاقتىعىسىن شەشۋدىڭ قانداي دا ءبىر جولدارىن ۇسىنىپ جاتقان وزگە ەلدەر مەن مەملەكەتتەر توبىنىڭ كۇش- جىگەرىن قولدايدى. ءبىز ءوز تاراپىمىزدان بارلىق قاجەتتى شارانى قابىلدايمىز. ال قازاقستان مەن رەسەيدىڭ شەكاراسىنا كەلەر بولساق، وعان دەليميتاتسيا جاسالىپ، ايتارلىقتاي دەڭگەيدە دەماركاتسيالاندى. ونى ەكى ەل پارلامەنتتەرى ناقتىلاپ، ءتيىستى قۇجاتتى راتيفيكاتسيالادى. سوندىقتان رەسەيمەن ارادا قانداي دا ءبىر تەرريتوريالىق داۋ جوق. قازاقستان مەن رەسەي ەكىجاقتى دەڭگەيدە جانە ءتيىستى ينتەگراتسيالىق بىرلەستىكتەر اياسىندا تۇراقتى دوستىق قارىم- قاتىناس ورناتقان. سانكسيانى اينالىپ ءوتۋ ماسەلەسىنە كەلەر بولساق، قازاقستان سانكسيا رەجيمىن مۇلتىكسىز ساقتايتىنىن مالىمدەدى. ءبىز سانكسيا رەجيمىن ساقتاۋ جونىندە ءتيىستى ۇيىمدارمەن ۇدايى بايلانىستامىز. گەرمانيا تاراپىنىڭ سانكسيا رەجيمىن اينالىپ ءوتۋ ىقتيمالدىعىنا قاتىستى ەشقانداي كۇمانى بولماۋعا ءتيىس دەپ ويلايمىن، - دەدى قاسىم- جومارت توقايەۆ.

اۆتور

ايدار وسپاناليەۆ