ەرلان سايروۆ: بانكتەر Astana قارجى ورتالىعىن سالىقتان جالتارۋعا پايدالانىپ وتىر

استانا. KAZINFORM - ءماجىلىس دەپۋتاتى ەرلان سايروۆ پالاتا وتىرىسىنان كەيىن Astana حالىقارالىق قارجى ورتالىعى وففشور قۇرالىنا اينالعانى تۋرالى مالىمدەمەسىنىڭ ءمانىن ءتۇسىندىردى.

- Astana حالىقارالىق قارجى ورتالىعى نەگىزىندە شەتەلدىك ينۆەستورلاردى تارتۋ ءۇشىن قۇرىلعان. ءبىراق قازاقستاننىڭ ءىرى كومپانيالارى قازاقستاننىڭ سالىعىنان جالتارۋ ءۇشىن سول ا ح ق و- عا بارىپ تىركەلەدى. قازاقستاندىق كومپانيا بولىپ ەسەپتەلەتىن 70-تەن استام جەر قويناۋىن يگەرۋشى كومپانيا، Halyq Bank ،Freedom Bank سياقتى ءىرى بانكتەر، «قازپوشتانىڭ» ءوزى وسى ورتالىققا تىركەلگەن ولاردىڭ ءبارى سول سالىقتان جالتارىپ وتىر، - دەدى ول.

دەپۋتاتتىڭ ايتۋىنشا، بۇل قۇيتىرقىلىقتار بيۋدجەتكە كەرى اسەر ەتىپ وتىرعان كورىنەدى.

- قازىر ول ەسەپتەلىپ جاتىر، جۇزدەگەن ميلليارد تەڭگە. اسىرەسە جەر قويناۋىن يگەرۋشىلەردىڭ سوندا بارىپ تىركەلۋى رەسپۋبليكا بيۋدجەتىنە تىكەلەي اسەر ەتەدى. سوندىقتان قازاقستاندىق ءىرى كومپانيالاردىڭ، بانكتەر مەن جەر قويناۋىن يگەرۋشىلەردىڭ Astana حالىقارالىق قارجى ورتالىعىنا تىركەلۋىنە شەكتەۋ قويۋدى ۇسىنامىز، - دەدى ەرلان سايروۆ.

ايتا كەتەيىك، بۇگىن ءماجىلىستىڭ جالپى وتىرىسىندا ق ق س سالىناتىن اينالىمنىڭ تومەنگى شەگى 40 ميلليون تەڭگە بولۋى مۇمكىن ەكەنى بەلگىلى بولدى.

اۆتور

ەسىمجان ناقتىباي