قىزىلوردا اكىمدىگى بۇرىن جوندەلگەن كوشەگە 1,2 ميلليارد تەڭگەگە كونكۋرس جاريالاعان
قىزىلوردا. KAZINFORM - قىزىلوردا قالاسىنىڭ پروكۋراتۋراسى بيۋدجەت قاراجاتىنىڭ ماقساتتى جۇمسالۋىنا جۇرگىزىلگەن تالداۋ ناتيجەسىندە 2,8 ميلليارد تەڭگەگە قۇقىق بۇزۋشىلىق انىقتادى.
- قالا اكىمدىگى 1,4 ميلليارد تەڭگەگە قالا كوشەلەرىن جوندەۋگە جاريالانعان كونكۋرستا بۇرىن جوندەۋ جۇمىستارى جۇرگىزىلگەن كوشەنى ەنگىزگەن. وسى تەكتەس، جۇمىستار ورنى مەن كولەمى ناقتى كورسەتىلمەگەن جوبالاۋ- سمەتالىق قۇجاتتاما نەگىزىندە كوشەلەردى كۇردەلى جوندەۋگە 1,2 ميلليارد تەڭگەگە، سونداي-اق قالا كوشەلەرىن جىل كولەمىندە سانيتارلىق تازالاۋ جۇمىستارى شارتقا سايكەس جۇزەگە اسىرىلىپ جاتقانىنا قاراماستان، قوسىمشا تازالاۋ جۇمىستارى ءۇشىن 223,2 ميلليون تەڭگەگە نەگىزسىز مەملەكەتتىك ساتىپ الۋ كونكۋرستارى جاريالانعان، - دەلىنگەن حابارلامادا.
ەنگىزىلگەن قاداعالاۋ اكتىسىنىڭ قارالۋ ناتيجەسىمەن 2,8 ميلليارد تەڭگەگە 3 كونكۋرستىڭ كۇشى جويىلىپ، بيۋدجەت قاراجاتىنىڭ نەگىزسىز جۇمسالۋىنا جول بەرىلمەدى.
اتالعان باعىتتا جۇمىستار جالعاسىپ جاتىر.
بۇعان دەيىن حابارلانعانداي، قىزىلوردا وبلىسىندا 2,3 ميلليون تەكشە مەتردەن استام سۋدى زاڭسىز پايدالانۋ فاكتىلەرى انىقتالعان ەدى.
