قىتايلىق كومپانيا سۋ شارۋاشىلىعى سالالارىنداعى جوبالارعا قاتىسۋعا قىزىعۋشىلىق تانىتتى

استانا. KAZINFORM - پرەمەر-ءمينيستردىڭ ورىنباسارى قانات بوزىمبايەۆ پەن Power China Chengdu Engineering Corporation ديرەكتورلار كەڭەسىنىڭ ءتوراعاسى حە يانفەن ەنەرگەتيكا جانە سۋ رەسۋرستارى سالالارىنداعى ءوزارا ءتيىمدى ىنتىماقتاستىقتى كەڭەيتۋ پەرسپەكتيۆالارىن تالقىلادى.

Power China Chengdu - جوبالاۋ مەن ينۆەستيتسيالاۋدان باستاپ قۇرىلىس پەن پايدالانۋعا بەرۋگە دەيىنگى تولىق قىزمەتتەر سيكلىن ۇسىناتىن الەمدەگى جەتەكشى كومپانيالاردىڭ ءبىرى.

بۇگىندە Power China Chengdu قازاقستاندا ءبىرقاتار ءىرى جوبالاردى ىسكە اسىردى: «مويناق» سۋ ەلەكتر ستانسياسى، «جاڭاتاس» جانە «شەلەك» جەل ەلەكتر ستانسيالارى. قازىرگى تاڭدا «حرومتاۋ» جانە «ارقالىق» جەل ەلەكتر ستانسيالارىن ىسكە قوسۋعا دايىندىق جۇرگىزىلۋدە.

كەلىسسوزدەر بارىسىندا قىتايلىق تاراپ يرريگاتسيا جانە سۋ شارۋاشىلىعى سالالارىنداعى جوبالارعا قاتىسۋعا قىزىعۋشىلىق تانىتتى. ءوز كەزەگىندە قانات بوزىمبايەۆ ەلدەگى ءىرى ينفراقۇرىلىمدىق جوبالار تۋرالى ايتىپ ءوتتى، ولاردىڭ قاتارىندا الاتاۋ قالاسىنىڭ قۇرىلىسى مەن كوممۋنالدىق جانە ەنەرگەتيكالىق سەكتورلاردى جاڭعىرتۋ جونىندەگى ۇلتتىق جوبا بار.

كادر دايارلاۋ ماسەلەسىنە ەرەكشە نازار اۋدارىلدى. قانات بوزىمبايەۆ تاراپتاردىڭ بىرلەسكەن جۇمىسىنىڭ ماڭىزدى باعىتتارىنىڭ ءبىرى رەتىندە تاراز قالاسىنداعى قازاق ۇلتتىق سۋ شارۋاشىلىعى جانە يرريگاتسيا ۋنيۆەرسيتەتىنىڭ بازاسىندا جاس مامانداردى دايارلاۋ تۋرالى ايتتى.

كەزدەسۋ سوڭىندا تاراپتار بىرلەسكەن باستامالاردىڭ الەۋەتىن اتاپ ءوتىپ، ىنتىماقتاستىقتى ودان ءارى نىعايتۋعا ءوزارا نيەتتەرىن راستادى.

ايتا كەتەيىك، امەريكالىق Lindsay Corporation قازاقستاندا يرريگاتسيالىق جابدىقتاردى قۇراستىرۋمەن اينالىسپاق.