قىتايدىڭ التاي قالاسىندا «ۇلكەن التاي» وڭىرلىك كونفەرەنسياسى ءوتتى

استانا. قازاقپارات - قىتاي كاسىپكەرلەرى سەمەيدەگى جاڭا «سمارت سيتي» اۋدانىنىڭ قۇرىلىسىنا ينۆەستيتسيا سالادى. بۇل جونىندە قىتايدىڭ شىڭجاڭ-ۇيعىر اۆتونومدىق اۋدانىندا ءوتىپ جاتقان «ۇلكەن التاي» سۋب وڭىرلىك كونفەرەنسياسىندا كەلىسىم جاسالدى، دەپ حابارلايدى 24kz.

 كورشى ەلدىڭ ينۆەستورلارى اباي وبلىسىندا تۇرعىن ءۇي، جاڭا مەملەكەتتىك مەكەمەلەر، تۋريزم نىساندارى جانە ينفراقۇرىىم قۇرىلىسىنا قاتىسۋعا نيەتتى.

- قىتايدا «ۇلكەن التاي» سۋبوڭىرلىك كونفەرەنسياسى ءوتىپ جاتىر. حالىقارالىق ءىس-شاراعا قازاقستان، قىتاي، رەسەي، موڭعوليا ەلدەرىنەن 9 ايماق قاتىسۋدا. ءبارىنىڭ كوزدەگەنى مەيلىنشە كوپ ينۆەستيتسيا تارتىپ، ساۋدا- ەكونوميكالىق جانە مادەني- گۋمانيتارلىق ىنتىماقتاستىقتى ارتتىرا ءتۇسۋ. وسى جيىندا قازاقستان مەن قىتاي 30-عا جۋىق مەموراندۋمعا قول قويادى دەپ كۇتىلىپ وتىر.

ءىس-شارا قىتايدىڭ التاي قالاسىندا ءوتىپ جاتىر. وعان 4 مەملەكەتتىڭ التاي ولكەسىنە كىرەتىن ايماقتارى جينالدى. قازاقستاننان اباي، جەتىسۋ جانە شىعىس قازاقستان وبلىستارى قاتىسۋدا. كونفەرەنسيانىڭ العاشقى كۇنى دەلەگاتتار شىڭجاڭ ۇيعىر اۆتونومدىق اۋدانى پارتيا كوميتەتىنىڭ حاتشىسى ماشيڭرۇيمەن كەزدەستى. جيىندا تاراپتار ينۆەستيتسيا، ساۋدا-ساتتىق، لوگيستيكا، تۋريزم، اۋىل شاراۋاشىلىعى سالالارىنا قاتىستى ىنتىماقتاستىقتى نىعايتىپ، وسى باعىتتاعى ورتاق مۇددەنى جۇزەگە اسىرۋ جايىن تالقىلادى.

ماشيڭرۇي، ش ۇ ا ا پارتيا كوميتەتىنىڭ حاتشىسى:

 - شەكارالاس جاتقان ايماقتار قارىم-قاتىناستى ودان ءارى ارتتىرىپ، ءوزارا ءتيىمدى جوبالاردى جۇزەگە اسىرۋ مەحانيزمىن جۇيەلەپ الۋىمىز كەرەك. بىزدە قازاقستان تاۋارلارىنا سۇرانىس جوعارى. اسىرەسە، اۋىل شارۋاشىلىعى ونىمدەرى قىزىقتىرادى. بيداي، جۇگەرى، قوي، سيىر ەتى ەكولوگيالىق تازا. سونىمەن قاتار ءبىزدىڭ كاسىپكەرلەر مۇناي، گاز، پايدالى قازبا باعىتىندا ينۆەستيتسيا سالۋعا دايىن. سونداي-اق جوعارى سۇرىپتى تۇقىمداردى ەكسپورتتاي الامىز. ترانسشەكارالىق تۋريزمگە دە ءمان بەرۋگە دايىنبىز. بۇل باعىتتا ءبىزدىڭ ايماقتار ءبىرىن ءبىرى تولىقتىرىپ، ەكى جاققا دا ءتيىمدى ەتە الامىز.

كەزدەسۋدە قىتايمەن شەكارالاس جاتقان وڭىرلەردىڭ گەوگرافيالىق جانە ەكونوميكالىق مۇمكىندىكتەر تانىستىرىلدى. ءوزارا قارىم-قاتىناستى ودان ءارى ارتتىرىپ، ءتيىمدى جوبالاردى جۇزەگە اسىرۋ مەحانيزمىن جۇيەلەۋگە ۋاعدالاستى. ءبىرىنشى بولىپ ءسوز العان بەرىك ءۋالي اباي وبلىسىنىڭ ينۆەستيتسيالىق تارتىمدى تۇستارىن اتاپ قىتاي، رەسەي، ورتالىق ازيانى جالعايتىن كولىك-لوگيستيكالىق حاب رەتىندە دامۋ پەرسپەكتيۆالارىن ايتتى.

بۇدان كەيىن دەلەگاتتار قىتايلىق ينۆەستورلارمەن كەزدەستى. وعان ءوندىرىس، قۇرىلىس، تۋريزم جانە ەنەرگەتيكا سالالارىندا جۇمىس ىستەيتىن قىتايلىق كومپانيالار قاتىستى.

ايبەك راحىمبەكوۆ، اباي وبلىسى كاسىپكەرلىك جانە يندۋستريالىق-يننوۆاتسيالىق دامۋ باسقارماسىنىڭ باسشىسى:

- ءبىز جالپى قۇنى 1,5 ميلليارد تەڭگە بولاتىن 16 كەلىسىمگە قول قويدىق. ينۆەستورلار العاشقى قۇرىلىس جۇمىستارىن بيىلعى جىلدىڭ شىلدە ايىنان باستايمىز دەپ وتىر. ولار وبلىس ورتالىعىنان قوناقۇي سالماقشى. سونداي-اق «سمارت سيتي» جاڭا اۋدانىنان الەۋمەتتىك نىساندار مەن تۇرعىن ءۇي قۇرىلىسىنا ينۆەستيتسيا سالۋدى كوزدەپ وتىر. بۇدان دا باسقا ءوز جوبالارىن ۇسىنىپ وتىر. ءبىز ول ۇسىنىستارىن ىرىكتەپ، ءبىزدىڭ ايماققا قاجەتتى جوبالارىن تاڭداپ الاتىن بولامىز.

 قىتايلىق بىرنەشە كومپانيا سەمەيدەگى جاڭا «سمارت سيتي» اۋدانىنا ينۆەستيتسيا سالاتىن بولدى. ولار 75 مىڭ تۇرعىنعا ارنالعان جاڭا ىقشام اۋداننىڭ قۇرىلىسىنا قاتىسادى. وبلىس ورتالىعىنا قاجەتتى 40-تان استام اكىمشىلىك، كوممەرتسيالىق، الەۋمەتتىك نىساندار مەن ساياباقتاردىڭ قۇرىلىسى جۋىردا باستالادى.

 لي چجۋن، ينۆەستور:

 - ءبىزدى اباي وبلىسىنداعى جوبالار قىزىقتىرىپ وتىر. اسىرەسە، «سمارت سيتي» اۋدانىنا قاتىستى ۇسىنىستار تارتىمدى. وسى ايدىڭ اياعىندا سەمەيگە بارامىز. الدىمەن قۇجاتتاردى راسىمدەۋىمىز كەرەك. شىلدە ايىنىڭ اياعىنا دەيىن قۇرىلىستى باستاپ كەتۋىمىز كەرەك. ەڭ تاجىريبەلى ماماندارىمىز بەن زاماناۋي قۇرىلىس تەحنيكالارىن الىپ بارامىز. ەڭ باستىسى، كەلىسىم بار.

 سۋب وڭىرلىك كونفەرەنسيانىڭ نەگىزى ءبولىمى ەرتەڭ وتەدى. وندا تاراپتار ينۆەستيتسيا تارتۋ امالىن جاسايدى. ساۋدا-ساتتىق، ترانسشەكارالىق تۋريزم سالاسىن دامىتۋ جايىن تالقىلايدى. سونىمەن قاتار ينفراقۇرىلىم، ءبىلىم جانە عىلىم، مادەني سالا بويىنشا دا ىنتىماقتاستىقتى نىعايتۋ شارالارى قارالادى.