قىتاي مەن ەۋروپا اراسىنداعى قۇرلىق جۇك تاسىمالىنىڭ 80 پايىزى قازاقستان ارقىلى وتەدى - توقايەۆ
استانا. KAZINFORM - مەملەكەت باسشىسى قاسىم-جومارت توقايەۆ كاسپيدەن افريكاعا دەيىن سوزىلاتىن ازيا مەن ەۋروپا اراسىنداعى ەڭ سەنىمدى جانە قاۋىپسىز كولىك جەلىسىن قۇرۋدى ۇسىندى.
- قازاقستان كاسپي تەڭىزى پورتىن جاڭعىرتۋ مەن جۇيەلەۋ، جۇك تەرمينالدارىن سالۋ، كولىك كەمەلەرىن بىرلەسىپ ءوندىرۋ باعىتىندا جۇيەلى قادام جاساپ جاتىر. بۇل ترانسكاسپي باعدارىنىڭ تارتىمدىلىعىن ارتتىرا تۇسەدى، اسىرەسە قىتاي مەن ەۋروپا اراسىنداعى قۇرلىقتاعى جۇك تاسىمالىنىڭ 80 پايىزى ەلىمىزدىڭ اۋماعى ارقىلى وتەتىنىن ەسكەرسەك، - دەدى قاسىم-جومارت توقايەۆ ەلوردادا ءوتىپ جاتقان «ورتالىق ازيا - يتاليا» ءبىرىنشى سامميتىندە.
وسى ورايدا مەملەكەت باسشىسى يتاليالىق سەرىكتەستەردى اتالعان پروتسەسكە بەلسەندى قاتىسۋعا شاقىردى.
- يتاليانىڭ ەۋروپالىق كولىك جەلىسى مەن Global Gateway ستراتەگياسىمەن ءۇشىنشى ءدالىزدى تۇيىستىرۋگە قاتىستى جوبانى بەلسەندى قولداۋىنا سەنىم ارتامىز. سيريامەن بىرلەسىپ، بۇل كولىك باعىتىن كاسپيدەن افريكاعا دەيىن سوزىلاتىن ازيا مەن ەۋروپا اراسىنداعى ەڭ سەنىمدى جانە قاۋىپسىز كوپىرلەردىڭ بىرىنە اينالدىرۋعا ءۇمىتتىمىز، - دەيدى پرەزيدەنت.
قازاقستان ورتا ءدالىز ارقىلى تاسىمالداناتىن جۇك كولەمىن الداعى ءۇش جىلدا ەكى ەسە ارتتىرۋعا نيەتتى ەكەنىن جەتكىزدى.
- ايماقتا كولىك تەحنولوگياسىنىڭ بىرلەسكەن كاسىپورىندارىن قۇرىپ، يتاليادان وندىرىستەردى جەرگىلىكتى ەكونوميكادا وقشاۋلاۋعا قىزىعۋشىلىق بار. بۇل ەلدەرىمىزگە ايتارلىقتاي پايدا اكەلەدى. بۇل باعىتتا بىزدە جەمىستى ىنتىماقتاستىقتىڭ مىسالدارى بارشىلىق. مىسالى، قازاقستاندىق زاۋىتتاردىڭ بىرىندە يتاليالىق تەحنولوگيا بويىنشا اۋىلشارۋاشىلىعى تەحنيكاسىن قۇراستىرۋ جولعا قويىلعان. سونىمەن قاتار، يتاليالىق كومپانيانىڭ قاتىسۋىمەن كۇكىرت قىشقىلى زاۋىتىنىڭ، گاز وڭدەۋ زاۋىتىنىڭ قۇرىلىسى باستالدى، - دەدى قاسىم-جومارت توقايەۆ.
پرەزيدەنت قازاقستان اۋقىمدى ەكونوميكالىق رەفورمالاردى ىسكە اسىرىپ، زاڭنامانى جەتىلدىرۋ ارقىلى ەلدەگى ينۆەستيتسيالىق كليماتتى ودان ءارى جەتىلدىرۋگە نيەتتى ەكەنىن اتاپ ءوتتى.
- تاعى ءبىر وزەكتى مىندەت - ترانسقۇرلىقتىق بايلانىستى بەكەمدەۋ. ترانسكاسپي حالىقارالىق كولىك مارشرۋتىن دامىتۋ ارقىلى ءبىزدىڭ ەلدەر ەجەلگى جىبەك جولىن جاڭا نەگىزبەن قايتا جانداندىرىپ جاتىر. بىلتىر وسى ءدالىزدىڭ قازاقستانداعى بولىگىندە كونتەينەرمەن جۇك تاسىمالداۋ كولەمى 62 پايىزعا ءوسىپ، 4,5 ميلليون تونناعا جەتتى. ءۇش جىلدىڭ ىشىندە وسى كورسەتكىشتى ەكى ەسەلەۋگە نيەتتىمىز، - دەدى مەملەكەت باسشىسى.
ايتا كەتەيىك، ەلورداداعى تاۋەلسىزدىك سارايىندا مەملەكەت باسشىسى قاسىم-جومارت توقايەۆتىڭ قاتىسۋىمەن «ورتالىق ازيا - يتاليا» العاشقى سامميتى ءوتىپ جاتىر.
اۆتور
ەسىمجان ناقتىباي
