قىتاي مەن قازاقستاننىڭ تاۋار اينالىمى رەكوردتىق 44 ميلليارد دوللارعا جەتتى - ەرلان قارين

استانا. KAZINFORM - قىتاي مەن ورتالىق ازيا ەلدەرى اراسىندا كونتەنت جاساۋ، تەحنولوگيالارمەن الماسۋ جانە مادەني باعىتتاعى بىرلەسكەن جۇمىس ايرىقشا وزەكتى بولا ءتۇستى.

بۇل تۋرالى ق ر مەملەكەتتىك كەڭەسشىسى ەرلان قارين قىتاي مەن ورتالىق ازيانىڭ «تاتۋ كورشىلىك جانە دوستىق: بولاشاققا بىرگە قادام» اتتى گۋمانيتارلىق الماسۋ فورۋمىندا ايتتى.

مەملەكەتتىك كەڭەسشى بۇگىن قىتاي مەن ورتالىق ازيا ەلدەرى اراسىنداعى ىنتىماقتاستىعى عانا ەمەس، ميلليونداعان ادامنىڭ تاعدىرى توعىسقان الىپ ءوڭىردىڭ بولاشاعى تالقىلانىپ وتىرعانىن اتاپ ءوتتى.

- ق ح ر ءتوراعاسى شي جينپيڭ ايتقانداي، «اشىقتىق پروگرەسكە باستايدى، ال تۇيىقتىق ارتتا قالۋشىلىققا اكەلەدى». ءبىزدىڭ ءوڭىر ەلدەرىنىڭ باستى ەرەكشەلىگى - اشىقتىق، جوعارى قارقىندى ەكونوميكالىق ءوسۋ، گۋمانيتارلىق جانە مەديا سالالارىنداعى تىعىز ىنتىماقتاستىق. مەدياتۇتىنۋدىڭ ترانسفورماتسياسىن، سيفرلاندىرۋ مەن اقپاراتتىق ترەندتەردى ەسكەرسەك، كونتەنت جاساۋ، تەحنولوگيالارمەن الماسۋ جانە ءوزارا مادەني بايىتۋ باعىتتارىنداعى بىرلەسكەن جۇمىس ايرىقشا وزەكتى بولا تۇسكەنىن كورىپ وتىرمىز، - دەدى ەرلان قارين فورۋمنىڭ اشىلۋىندا.

كەزىندە ۇلى جىبەك جولىنىڭ كەرۋەندەرى تەك تاۋار ەمەس، ءبىلىم دە تاسىمالداعان. سول كەزەڭنىڭ وزىندە العاشقى كوممۋنيكاتسيالىق جەلىلەر قالىپتاسا باستاعان ەدى.

- بۇگىندە ءبىز بۇل ءداستۇردى ينتەرنەت، سپۋتنيكتىك جانە سيفرلىق پلاتفورمالار ارقىلى جالعاستىرىپ، مەديالارىمىزدى ءبىرىڭعاي ىنتىماقتاستىق ىرعاعىنا بىرىكتىرىپ وتىرمىز. قازاقستان مەن قىتايدىڭ ىنتىماقتاستىعىنا كەلسەك، قىتاي - ءبىز ءۇشىن تاتۋ كورشى ءارى سەنىمدى دوس. ءبىز ءاردايىم ءوزارا ءتيىمدى ارىپتەستىككە قاتىستى ورتاق تۇسىنىستىك تابامىز. مەملەكەت باسشىسى قاسىم-جومارت توقايەۆ اتاپ وتكەندەي، قىتايمەن تولىققاندى ىنتىماقتاستىق - قازاقستاننىڭ تۇراقتى دامۋى ءۇشىن ۇزاقمەرزىمدى فاكتور بولىپ سانالادى، - دەدى قازاقستاننىڭ مەملەكەتتىك كەڭەسشىسى.

قىتاي قازاقستاننىڭ ەڭ ءىرى ساۋدا سەرىكتەسى بولىپ قالا بەرەدى. بىلتىر ەكىجاقتى تاۋار اينالىمى رەكوردتىق 44 ميلليارد اقش دوللارىنا جەتتى. وعان قوسا، قىتايدان قازاقستانعا تارتىلعان تىكەلەي شەتەلدىك ينۆەستيتسيا اعىمى وسكەن. مادەني- گۋمانيتارلىق سالاداعى بايلانىستار دا نىعايىپ كەلەدى.

- بۇگىندە قىتاي الەمدەگى ەڭ قارقىندى دامىپ كەلە جاتقان ءىرى ەكونوميكالاردىڭ ءبىرى جانە جەتەكشى تەحنولوگيالىق دەرجاۆاعا اينالۋدا. ءوز كەزەگىندە ورتالىق ازيا ەلدەرى دە ەلەۋلى الەۋەتكە يە بولىپ، تۇراقتى ەكونوميكالىق ءوسىم كورسەتىپ كەلەدى. قازاقستان ءارقاشان كورشىلەرىنىڭ تابىستارىنا قۋانادى، سەبەبى ءبارىمىز ورتاق دامۋ جولىندامىز جانە ءارقايسىمىزدىڭ جەڭىسىمىز - ورتاق جەڭىس، - دەدى ەرلان قارين.

بۇعان دەيىن ەرلان قارين مەملەكەت باسشىسى قاسىم-جومارت توقايەۆتىڭ فورۋم قاتىسۋشىلارىن قۇتتىقتاۋ حاتىن وقىپ بەرگەن ەدى.

اۆتور

ايجان سەرىكجان قىزى