قىتاي كولىكتەرى تۋرالى سونشالىق قاتاڭ سىن ەستىمەپپىن - رومان سكليار

استانا. KAZINFORM - پرەمەر-ءمينيستردىڭ ءبىرىنشى ورىنباسارى رومان سكليار تاۋەلسىزدىك سارايىنداعى «ورتالىق ازيا- قىتاي» سامميتىنىڭ كۋلۋارىندا قىتاي كولىكتەرىنىڭ ساپاسى تۋرالى پىكىر ءبىلدىردى.

- مەن قىتايلىق اۆتوكولىكتەر تۋرالى قاتاڭ سىناعان پىكىر ەشقاشان ەستىمەپپىن. قالاي دەگەنمەن دە بۇل بەلگىلى ءبىر دەڭگەيدەگى فوبيا دەپ ويلايمىن. قىتاي ايتارلىقتاي ساپالى ءونىم شىعارىپ وتىر. مەن ءتىپتى ول كولىكتەردىڭ سىرتقى بەينەسى قانداي تارتىمدى ەكەنىن ايتىپ تا تۇرعان جوقپىن. بۇرىندارى كورەيالىق اۆتوموبيلدەر تۋرالى دا وسىنداي سىندار ايتىلاتىن. قىتايلىق اۆتوموبيلدەر ايتارلىقتاي سەنىمدى، قولدانىسقا قولايلى، ەڭ باستىسى باعاسى قىمبات ەمەس، - دەگەن رومان سكليار كىمنىڭ قاي ەلدىڭ كولىگىن مىنەتىنى ءوز قالاۋى مەن قالتاسىنا بايلانىستى دەگەن پايىم ايتتى.

پرەمەر-ءمينيستردىڭ ءبىرىنشى ورىنباسارى كەي ءوندىرۋشى كولىك قۇنىن تۇسىرمەي، قىمبات كولىكتەر شىعارىپ وتىرعانىن ايتتى.

- كەيبىر اۆتوموبيل ءوندىرۋشى كولىك قۇنىن تۇسىرمەي، الدەقايدا قىمبات كولىكتەر شىعارىپ وتىر. ولاردىڭ ءوز ساتىپ الۋشىلارى بار، - دەدى ول.

بۇعان دەيىن ونەركاسىپ جانە قۇرىلىس ۆيتسە-ءمينيسترى ولجاس ساپاربەكوۆ تە قىتاي كولىكتەرىنىڭ ساپاسى تۋرالى پىكىر بىلدىرگەن بولاتىن.

اۆتور

ەسىمجان ناقتىباي